Shendongdiki birqanchilighan türmide Uyghur diyaridin yötkep apirilghan tutqunlarning barliqi ashkarilandi

Muxbirimiz shöhret hoshur
2019-03-01
Élxet
Pikir
Share
Print
Uyghur rayonidin mehbuslarning yötkep kélin'genliki melum bolghan shandong ölkisidiki türmilerdin biri.
Uyghur rayonidin mehbuslarning yötkep kélin'genliki melum bolghan shandong ölkisidiki türmilerdin biri.
Social Media

Uyghur rayonidin xitay ölkilirige yötkep apirilghan mehbuslar heqqidiki éniqlashlirimiz dawamida shendung ölkisidiki türmilerdimu Uyghur mehbuslarning barliqi ashkarilandi. Shendungdiki türme xadimliridin biri Uyghur rayonidin yötkep apirilghan mehbuslarning bir emes, belki birqanchilighan türmilerde bar ikenlikini bayan qilsa, yene bir türme xadimi ochuq halda özi wezipe ötewatqan türmidimu Uyghur rayonidin yötkelgen mehbuslarning barliqini, emma tepsiliy ehwalini dep bérelmeydighanliqini bildürdi.

Ilgiriki éniqlashlirimiz dawamida xéylongjyangning teyley türmisi, sichüenning yibing türmisi, shenshining süyjyago türmisi؛ ichki mongghulning shalachi we wutachi türmiliri shundaqla gensuning köp sandiki türmiliride Uyghur rayonidin yötkep apirilghan mehbuslarning barliqi ashkarilan'ghan idi. Bügün biz shendung ölkilik türme bashqurush idarisi we herqaysi türme xadimliridin bu heqte melumat soriduq.

Shendong ölkilik birinchi türmining bir xadimi téléfonimizni qobul qilghan bolsimu, emma u bu türmide Uyghur rayonidin yötkelgen mehbuslarning bar-yoqluqi heqqidiki so'alimizgha jawab bermidi. Alaqidar tor uchurlirida körsitilishiche, shendung ölkiside jinen türmisi, lujong türmisi we jijow türmisi qatarliq 20 nechche türme bar iken. Biz bulardin ‏ayallar birinchi türmisige téléfon qilduq. Türmining nöwetchi xadimi Uyghur rayonidin yötkelgen mehbuslarning qanchinchi kamér yaki rayonida ikenliki heqqidiki so'alimizgha bu toghriliq özlirining jawab bérish mes'uliyitining yoqluqini bayan qilip, so'aldin özini qachurdi. Biz uningdin Uyghur rayonidin yötkelgen mehbuslarning bu türmide bar yaki yoqluqini sorighinimizda u bu so'alning jawabini yuqiri derijilik hökümet orunliri yaki türme rehberliridin sorishimiz kéreklikini éytti. Bu xadim türmidiki Uyghur mehbuslarning sani heqqidiki so'alimizghimu jawab bérishtin oxshash sewebni körsitip özini qachurdi. 

Uyghur rayonidin xitay ölkilirige yötkelgen mehbuslar heqqide bir qisim inchike uchurlarni ashkarilighan italiyediki "Zimistan" tori bu heqtiki uchurlarning dölet mexpiyetlik süpitide qattiq sir tutuluwatqanliqi, hetta da'irilerning türme xadimliri bilen ehwalni ashkarilimasliq heqqide toxtam tüzgenlikini ashkarilighan idi.

Shendong ölkilik türme bashqurush idarisining bash mulazimet xadimi Uyghur rayonidin yötkelgen mehbuslarning qaysi türmide ikenliki heqqidiki so'alimizgha bergen jawabida yötkep apirilghan Uyghurlarning bir emes, belki birqanchilighan türmilerde bar ikenlikini ashkarilidi. Biz uningdin shendungning jinen shehiridiki türmide qanche Uyghur barliqini sorighinimizda u jinendimu Uyghurlarning birqanche türmide barliqini isharet qilip, qaysi türmidiki Uyghur mehbuslarni sorawatqanliqimizni soridi. Biz uningdin Uyghurlar qamalghan türmilerning téléfon nomurlirini soriduq. U türmilerning téléfon nomurlirining köpinchisini bilmeydighanliqi, bilgenlirinimu dep bérelmeydighanliqini éytti. Biz uningdin her bir türmide texminen qanchidin Uyghur barliqini soriduq. Bu xadim bu melumatlarning dölet mexpiyetlik ikenlikini eskertip, bu so'alimizgha jawab bérelmeydighanliqini tekrarlidi. Bu xadim yene bizning Uyghur mehbuslarning nöwettiki ehwali, türme xadimliri bilen arisida qandaq bir mesililerning yüz bériwatqanliqi heqqidiki so'alimizghimu özining bilmeydighanliqini emes, belki jawab bérelmeydighanliqini éytti. U sözining axirida Uyghur rayonidin yötkelgen mehbuslar heqqide bir qisim uchurlarni bilidighan we bir qismini bilmeydighanliqi, bilgenlirini bolsa dep bérelmeydighanliqini eskertti. 

Téléfonimizni qobul qilghan shendung ölkilik birinchi türme xadimimu Uyghur rayonidin yötkelgen mehbuslarning ehwali heqqidiki so'alimizgha jawab bérishni izchil ret qildi. Emma u axirida bu türmide Uyghur rayonidin yötkelgen mehbuslarning bar yaki yoqluqi heqqidiki so'alimizgha bergen jawabida Uyghurlarning bu türmide bar ikenlikini, emma sani we ehwalini dep bérelmeydighanliqini éytti. Biz so'alimizni tekrarliduq, umu oxshash jawabini tekrarlidi. 

Hörmetlik radi'o anglighuchilar, shendungdiki türmilerdin téléfonimizni qobul qilghan 10 din artuq türme xadimlirining hemmisi so'alimizgha toluq jawab bérishtin özini qachurghan bolsimu, héchqaysisi Uyghur rayonidin yötkep apirilghan mehbuslarning mewjutluqini inkar qilalmidi.

Toluq bet