Perhat muhemmed: siyasiy yighinlar, belkim qaraqash partkom hujumining qozghatquch sewebliridin biri

Muxbirimiz shöhret hoshur
2017.01.16
Share on WhatsApp
Share on WhatsApp
xoten-herbiy-saqchi-qoralliq.jpg Xitayning xoten'ge yötkep kelgen qoralliq küchliri. 2014-Yili 3-awghust.
AFP

Xitay 28-dékabir küni yüz bergen qaraqash partkom binasigha hujum qilish weqesining seweb we tepsilatini dawamliq halda yoshurmaqta. Muxbirimizning bu heqtiki éniqlashliri dawamida mezkur weqediki hujumchilardin üch nepirining hujum élip bérishtin bir kün awwalgha qeder öz tewelikidiki siyasiy terbiye yighinlirigha qatniship kelgenliki ashkarilandi. Bu heqte pikir bayan qilghan dunya Uyghur qurultiyi mu'awin re'isi perhat muhemmed ependi, nöwette xotende élip bériliwatqan siyasiy telim-terbiye yighinlirining qaraqash partkom hujumigha türtke bolghan qozghatquch seweblerdin biri ikenlikini ilgiri sürdi.

Ashkarilinishiche, 28-dékabir küni qaraqash partkomgha hujum qilghan aka-uka gumandarlar jümebazar kentide élip bérilghan siyasiy yighin'gha weqedin bir kün awwalgha qeder toluq qatnashqan.

Jahabagh kentidiki gumandar abdulétip mettursunmu, siyasiy yighinlargha bashtin-axir toluq qatnashqan.

Melum bolushiche, mezkur weqe hujumchilirining weqeni siyasiy yighindin chiqip élip barghanliqi nöwette xitay da'irilirinimu oylandurmaqta we nöwettiki yighinlarda bu ibretlik weqe süpitide kent mes'ullirigha bildürülmekte. Emma da'iriler meyli axbarat, meyli yighinlirida bolsun, bu siyasiy yighinlar bilen mezkur hujum arisida bir seweb-netije munasiwiti bar-yoqluqi heqqide pikir bayan qilishtin özlirini qachurmaqta. Dunya Uyghur qurultiyining teshwiqatqa mes'ul mu'awin re'isi perhat muhemmed ependining qarishiche, qaraqash partkom hujumini keltürüp chiqarghan, xitay hakimiyitige qarshiliqtin ibaret omumiy bir sewebtin bashqa yene, birqanchilighan qozghatquch seweblermu bar, bulardin biri yézilarda axiri üzülmeywatqan siyasiy yighinlar.

Perhat ependining qarishiche, da'iriler öz idiyesini singdürüshtin bekrek, ahalilerni kontrol qilish üchün bu xil yighinlarni uyushturmaqta.

Yene perhat ependining qarishiche, Uyghurlarning nöwettiki siyasiy yighinlarni yaqturushi we terbiyeni yuqturushi mumkin emes, bu yighinlar ahalilerde deslepte bizarliq, arqidin nepret we uning arqidin bezi ijr'atlar bilen qétilip intiqam tuyghusi shekillendürgen. Hujumchilar nöwettiki qattiq bixeterlik tedbirliri muhitida öz pilanlirini muweppeqiyetlik orunlash, pilanini yoshurush üchün siyasiy yighinlargha toluq qatnashqan bolushi mumkin.

Yuqiridiki ulinishtin qaraqash partkomigha hujum qilghan gumandarlarning hujumni siyasiy yighindin chiqip élip barghanliqi heqqidiki uchur we mulahizilerni anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.