Ғәрб әллири б д т да лагерлар мәсилисини оттуриға қойди вә хитайни қаттиқ әйиблиди

Ихтиярий мухбиримиз әкрәм
2018-06-28
Share
bdt-shwetsariye-uyghur-mesilisi.jpg Б д т кишилик һоқуқ кеңишиниң 38-нөвәтлик йиғинида шветсарийә вәкили сөзлимәктә. 2018-Йили 28-июн, җәнвә.
webtv.un.org

27-Июн ғәрб демократик әллири б д т да хитайдики "йиғивелиш лагерлири" мәсилисини рәсмий оттуриға қойди.

Бу һәптә б д т вә явропа парламентида уйғур дияридики "йиғивелиш лагерлири" мәсилиси тәкрар оттуриға қоюлуп, хәлқараниң диққитини йәнә бир қетим җәлп қилди.

23-Июн вә 25-июн күнлири б д т кишилик һоқуқ кеңишиниң 38-нөвәтлик йиғинида һәмдә 26-июн явропа парламентида өткүзүлгән "тәһдит астидики инсанлар: йүзмиңлиған уйғурлар хитайниң җаза лагерлирида азабланмақта" намлиқ йиғинда уйғур дияридики лагерлар мәсилиси оттуриға қоюлуп, дуня җамаитиниң қизиқишини қозғиған иди. 27-Июн күни уйғур дияридики лагерлар мәсилиси б д т 38-нөвәтлик кишилик һоқуқ кеңиши йиғининиң 4-бөлүмидә ғәрб демократик әллири тәрипидин биваситә оттуриға қоюлуп, хитай һакимийитигә нисбәтән еғир дипломатик бесим пәйда қилди.

Җәнвәдики б д т мәркизидин зияритимизни қобул қилған дуня уйғур қурултийиниң рәиси долқун әйса әпәнди 38-нөвәтлик кишилик һоқуқ кеңиши йиғинида булғарийә вәкилиниң явропа иттипақиға вакалитән шәрқий түркистандики йиғивелиш лагерлири мәсилисини рәсмий оттуриға қойғанлиқини вә буниң явропа иттипақиниң уйғурлар мәсилиси тоғрисидики рәсмий қариши икәнликини билдүргәнликини тилға алди.

Бир күн илгири явропа парламентида өткүзүлгән "тәһдит астида қалған инсанлар: йүзмиңлиған уйғурлар хитайниң җаза лагерлирида азабланмақта" намлиқ йиғинға иштирак қилған голландийәдики уйғур сиясий актиплиридин зәйнидин әпәнди явропа иттипақи алдида 4 -айниң 27-күни өткүзүлгән "5 миң кишилик намайиш" ниң ғәрб әллиригә бәлгилик дәриҗидә тәсир көрсәткәнликини, уйғурлар мәсилисини явропа иттипақиниң хизмәт үстилигә ташлиғанлиқини тилға алған иди.

Йиғинда германийә, әнглийә, фирансийә, шветсарийә қатарлиқ дөләтләр уйғур дияридики лагерлар мәсилисини оттуриға қоюп, хитай һакимийитини қаттиқ тәнқид қилған. Норвегийә, чех җумһурийәтлири хитайдики кишилик һоқуқ вәзийитини әйиблигән.

Әмма хитай һөкүмити җинайәтлирини етирап қилмиғанниң үстигә германийә, шветсарийә қатарлиқ ғәрб дөләтлиригә қарши инкас қатуруп өзлирини ақлиған һәмдә өзлириниң миллий сияситиниң наһайити ақиланә икәнликини базарға салған.

Нәтиҗә етибари билән уйғур дияридики лагерлар мәсилиси б д т йиғинида тунҗи қетим көп дөләт вәкиллири тәрипидин оттуриға қоюлған вә хитайға нисбәтән агаһландуруш сигнали челинған. Д у қ ниң рәиси долқун әйса әпәнди бу йиғинниң алди кәйнидә дипломатик паалийәтлирини кәң қанат яйдурған.

Б д т дики йиғин җәрянида уйғур мусапирлири мәсилисиму муһим тема болған. Қурултай рәиси долқун әйса әпәнди б д т муһаҗирлар комиссарлиқиниң юқири дәриҗилик әмәлдарлири билән уйғур мусапирлар мәсилисидә җиддий сөһбәтләшкән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт