"Xitayning mahatma gendisi" dep nam alghan gu'angjuluq kishilik hoquq pa'aliyetchiliri qamaldi

2016-01-29
Élxet
Pikir
Share
Print
Kishilik hoquq pa'aliyetchisi tang jingling ependi
Kishilik hoquq pa'aliyetchisi tang jingling ependi
Tang jingling ependining a'ilisi teminligen


Gu'angdung ölkisi gu'angju sheherlik ottura sot mehkimisi tang jingling, wang chingying we yüen shinting qatarliq 3 neper kishilik hoquq pa'aliyetchisi üstidin sot échip, ularni ayrim - ayrim halda 5 yilliq, ikki yérim yil we üch yérim yilliq qamaq jazalirigha höküm qildi. "Gu'angjudiki üch zat" dep tonulghan bu guruppa sabiq adwokat tang jinglingning rehberlikide 2006 - yilidin étibaren pa'aliyet qilip kelgen idi. Ular xitayda puqralar hoquqini kapaletke ige qilish we démokratiyini ilgiri sürüsh üchün "Puqralarning tinch yol bilen ita'etsizlik qilish yaki mundaqche éytqanda hökümet bilen hemkarlashmasliq herikitini teshebbus qilghan. Tang jingling bu teshebbusi seweblik "Xitayning mahatma gendisi" dep atalghan idi. Bu üch neper pa'aliyetchi 2014 - yili iyunda xitay saqchi da'iriliri teripidin qolgha élin'ghan.

29 - Yanwar échilghan sotta ularning "Dölet hakimiyitini aghdurushqa urunush" dégen jinayiti "Delillinip", ular qamaq jazasigha höküm qilin'ghandin kéyin, mezkur jaza ularning a'ile tawabi'atliri we kishilik hoquq pa'aliyetchilirining küchlük naraziliqigha uchridi.

Tang jinglingning adwokati gé yungshi sottin kéyin istansimizgha qilghan sözide mezkur sot qararini "Éghir xataliq" dep körsetti. U mundaq dédi: "Menche, kommunist partiye we gu'angju ottura sot mehkimisining bu qarari bir éghir xataliq. Emma kishilik hoquqqa hörmet qilinmaydighan bundaq bir dölet tüzümide tang jinglingge bérilgen bu jaza bir hisabta uning xitayda démokratiyini ilgiri sürüsh üchün qoshqan hessisining étirap qilinishi bolup hisablinidu" dédi.

Adwokat gé yungshining éytishiche yene, tang jingling sotta özining yuqiri derijilik sotqa erz sunmaydighanliqini bildürgen. U sotta "Chünki men kompartiye astidiki edliye sistémisining adalitige ishenmeymen. Uning ornigha men xitay xelqi we xudagha muraji'et qilimen" dégen.

Tang jinglingning ayali wang yenfang özining érining qararigha hörmet qilidighanliqini bildürgen. U, éri we uning ikki sepdishining gunahsiz turup, bir yildin artuq waqit tutup turulghanliqini bildürgen we "Bu sotning özi bir qanunsiz sot. Sot dégen adil we yolluq bolushi kérek. Emma bular undaq emes, shunga erz sun'ghan bilenmu bikar, tolimu bimene" dégen.

Melum bolushiche, sot küni etigende bu üch neper kishilik hoquq pa'aliyetchisining nurghun qollighuchiliri we muxbirlar sot binasi aldigha yétip kelgen. Biraq ular sot meydanigha kirgüzülmigen. Peqet bu ücheylenning 10 etrapidiki uruq - tughqininingla sotxanigha kirishige ruxset qilin'ghan. Pütkül sot jeryani aran 20 minut dawam qilghan.

Mezkur sotining bu hökümi chet'ellerdiki kishilik hoquq organliriningmu küchlük tenqidige uchridi. Bügün "Xitay kishilik hoquq qoghdighuchiliri teshkilati" bayanat élan qilip qararni eyiblidi we "Mezkur sot qarari arqiliq shi jinping hökümiti kishilik hoquqini ishletmekchi bolghan we uni teshebbus qilghan herqandaq kishini jazalaydighanliqi heqqide éniq we keskin signal berdi" dédi.

Merkizi nyu - yorktiki kishilik hoquqni közitish teshkilati bolsa, bügün élan qilghan mexsus bayanatida gu'angju sot da'irilirini hökümni bikar qilishqa chaqirdi. Ular bu sot qararining xitay dölet re'isi shi jinpingning kishilik hoquq pa'aliyetchilirige qiliwatqan zerbisining bir netijisi ikenlikini eskertti.

Mezkur teshkilatning asiya ishliri diréktori soféy réchardson bayanatta yer alghan sözide: "Xitay hökümitining kishilik hoquqqa hörmet qilish yolida azraq bolsimu ijabiy qedem tashlash niyiti bar bolsa, u halda u tinchliqperwer tenqid bilen aghdurmichiliqqa oxshash mu'amile qilishtin waz kéchishi kérek. Bu sot qarari xitay hökümitining téxi mangidighan yolining bekla uzunluqini körsitip bermekte" dégen.

Xitayda yéqindin buyan arqa - arqidin meydan'gha kéliwatqan kishilik hoquq depsendichilikliri xelq'araning küchlük diqqitini qozghimaqta. Herqaysi kishilik hoquq organlirining doklatlirida birdek, shi jinping textke olturghandin buyan xitaydiki puqralar hoquqi, pikir - uchur erkinlikining misli körülmigen derijide nacharliship kétiwatqanliqini qeyt qilishmaqta.

Amérika dölet mejlisi xitay ishliri komitétimu yéqinda élan qilghan bir bayanatida shi jinpingning barghanséri diktatorlishiwatqan hakimiyitining xitayda qanunning ijra qilinishi we puqralar hoquqining kapaletke ige qilinishigha zor tehdit peyda qiliwatqanliqini, uning peqet xitay ichidila emes xelq'aradimu selbiy tesir körsitidighanliqini bildürdi. Ular bayanatida shiwétsiyelik kishilik hoquq pa'aliyetchisi dahlin, firansuz zhurnalist ursulaning weqelirini tilgha élip turup "Hazir xitay puqralirila emes, xongkongluqlar we hetta chet'el puqralirimu özining bixeterlikidin endishe qilidighan bopqaldi" dégen.

Amérika dölet mejlisi ezasi kiris simit bayanatta qilghan sözide "Muqimliq we bayashatliqning bir dölette erkinlik, ochuq - ashkariliq, qanun we kishilik hoquq qoghdalmay turup barliqqa kelmeydighanliqi tarixta éniq ispatlinip bolghan. Biraq xitay rehberliri özining 'xitay chüshi' ni emelge ashurush üchün yuqiridiki idiyilerge ching ésilishning ornigha uningdin qorquwatidu" dégen.

Toluq bet