Shiwétsiyediki Uyghurlar namayish qilip, xitayning herbiy paraxotlirigha naraziliq bildürdi

Ixtiyariy muxbirimiz éhsan
2015.10.05
xitay-elchixanisi-aldi-3-oktebir.jpg Uyghur ma'arip uyushmisining orunlashturushi bilen sitokholmdiki xitay elchixanisi aldida ötküzülgen naraziliq namayishidin körünüsh. 2015-Yili 3-öktebir, shiwétsiye.
RFA/Éhsan

Shiwétsiyede pa'aliyet qiliwatqan Uyghurlar 3-öktebir küni xitay hökümitining sherqi türkistanni ishghal qilghanliqining 66 yilliqi, “Uyghur aptonom rayoni” qurulghanliqini jakarlighanliqining 60 yilliqi munasiwiti bilen, ma'arip uyushmisining orunlashturushi bilen sitokholmdiki xitay elchixanisi aldida naraziliq namayish ötküzdi.

Namayishchilar qollirigha sherqiy türkistanning ay yultuzluq kök bayriqi bilen “Xitaylar sherqiy türkistandin chiqip ketsun”, “Sherqiy türkistan'gha musteqilliq”, “Térrorchi xitay”, “Xitaylar dunyagha tehdit” dégendek xetler bésilghan lozunkilarni kötürüshüp, özlirining xitaygha bolghan ghezep-nepritini ipadilep herxil sho'arlarni towlashti.

Namayishta shiwétsiye Uyghur ma'arip uyushmisining bash katipi abdullah ehet, teshkilatqa wakaliten xitay da'irilirining sherqiy türkistanda élip bériwatqan dölet térrorluqi heriketlirini eyiblep yézilghan shwédche bayanatini oqup ötti hemde namayish qatnashquchilirigha dawani üzüldürmey dawamlashturush heqqide nutuq sözlidi. Kéyin teklimakan islam medeniyet merkizining mes'uli ömer mexsum pidakarliq körsitish heqqide toxtaldi.

Namayish dawamida yene, Uyghur komitétining bash katipi qurbanjan, Uyghuristan meshripining yigit béshi daniyar ependi, yashlar wekili ilghar ilhamlar öz tesiratini ipade qildi. Axirida ziyaritimizni qobul qilghan Uyghur ma'arip uyushmisining bash katipi abdulla ehet bu qétimliq namayishning meqsiti we pa'aliyet tepsilati heqqide toxtaldi.

Xitayning 3 dane herbiy paraxoti shiwétsiyening paytexti sitokholmdiki slussun portigha yétip kelgenlikidin xewer tapqan namayishchilar, sherqiy türkistanning ay yultuzluq kök bayriqini kötürginiche, xitay paraxotni ziyaret qilish üchün kelgen minglarche kishiler toplashqan paraxot yénigha bérip, xitaygha bolghan naraziliqini tinch shekilde ipadilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.