Шиветсийә парламентида хитайниң адәм органлири содиси тоғрисида доклат бериш йиғини өткүзүлди

Шиветсийә парламентида 27 - сентәбир сәйшәнбә күни, хитай түрмилиридики мәһбусларниң ички әзалирини елип сетиш мәсилиси тоғрисида доклат бериш йиғини өткүзүлди.

Мәзкур йиғинни шиветсийә йешиллар партийисиниң парламент әзаси никлас малмберг орунлаштурған болуп, йиғинда хитай түрмилиридики мәһбусларниң ички әзалирини сетишқа даир мәсилиләр тоғрисида доклат бериш үчүн алаһидә тәклип қилинған сабиқ канада парламент әзаси дәвид килгоур вә даңлиқ инсан һәқлири адвокати дәвид матис вә униңдин башқа шиветсийәдики бирқисим парламент әзалири, шиветсийәдики фалуңгуңчилар, демократик хитайлар, тибәт, моңғул қатарлиқларниң вәкиллири, шветсийәдә паалийәт қиливатқан уйғур маарип уюшмисиниң рәиси абдуллаһ көкяр башчилиқида икки һәйәт уйғурларға вакалитән алаһидә тәклип билән қатнашти.

Шветсийәдики һәрқайси даңлиқ гезит - журнал вә телевизийә қаналлириниң мухбирлириму йиғинға қатнашқучи меһманларни зиярәт қилди.

Игилишимизчә: дәвид клоугур вә дәвид матис 10 йилдин бери хитайдики инсан әзалири қачақчилиқиға қарши туруш намида хизмәт қилип келиватқан икән.

Буниңдин бурун шветсийидә, хитайда йүз бериватқан мәһбусларниң ички органлирини илип сетиштәк орган қачақчилиқиға даир мәсилиләр ечилмай кәлгән тема болуп, бу сәвәбтин сабиқ канада парламент әзаси давид клоугур вә даңлиқ инсан һәқлири адвукати дәвид матисларниң бу қетим шиветсийигә келишидә хитай түрмилиридики мәһбусларниң ички органлирини оғурлиниватқан қилмишларниң явропа вә пүтүн дуняда чәклиши үчүн һәрикәткә өтиши икән.

Мәлум болушичә: булар 2009 - йили хәлқара инсан һәқлири мукапатиға еришкән болуп, 2010 - йили дунядики нурғун дөләтләр тәрипидин нобел тинчлиқ мукапатиға намзат қилип көрситилгән.

Мәзкур йиғинға қатнашқан уйғур маарип уюшмисиниң рәиси абдулла көкяр йиғинда өзигә берилгән қисқиғина вақит ичидә уйғур диярида йүз бериватқан адәм ички әзалирини елип сетиш қилмишлири һәққидә өзлири игилигән мәлуматлар вә хәлқ ичидики инкаслар асасида тохталғанлиқини билдүрди.

Шиветсийәдики уйғур зиялийси аббас әпәндим хитайдики, җүмлидин уйғур дияридики адәм ички әзалирини елип - сетиш мәсилисигә узундин буян диққәт қиливатқан болуп, у шиветсийә ахбаратлирида бу қетимлиқ йиғинниң кәңри орун алғанлиқи, хитай даирилириниң һәр йили дуняға 10миңдин 60миңға қәдәр кишиниң органлирини сатидиғанлиқи һәққидики учурларниң мутәхәссисләрниң тәйярлиған доклатидин ашкариланғанлиқини баян қилди.

Йиғин ахирида, йиғинға қатнашқан уйғур вәкиллири йиғинға иштирак қилған һәрқайси вәкилләр билән айрим - айрим учрашқан вә уйғур дияридики түрмиләрдики сиясий мәһбусларниң органлирини елип сетиливатқан мәсилиләр тоғрисида өзлири игилигән учурларни ортақлашқан.

Бу программини силәр үчүн шивитсийәдин еһсан тәйярлиди.