Shiwétsiye parlaméntida xitayning adem organliri sodisi toghrisida doklat bérish yighini ötküzüldi

Ixtiyariy muxbirimiz ihsan
2016-09-30
Share
adem-organ-sodisi.jpg Shiwétsiye parlaméntida ötküzülgen xitayning adem organliri sodisi toghrisida doklat bérish yighinidin körünüsh. 2016-Yili 27-séntebir.
RFA/Éhsan


Shiwétsiye parlaméntida 27 - séntebir seyshenbe küni, xitay türmiliridiki mehbuslarning ichki ezalirini élip sétish mesilisi toghrisida doklat bérish yighini ötküzüldi.

Mezkur yighinni shiwétsiye yéshillar partiyisining parlamént ezasi niklas malmbérg orunlashturghan bolup, yighinda xitay türmiliridiki mehbuslarning ichki ezalirini sétishqa da'ir mesililer toghrisida doklat bérish üchün alahide teklip qilin'ghan sabiq kanada parlamént ezasi dewid kilgo'ur we dangliq insan heqliri adwokati dewid matis we uningdin bashqa shiwétsiyediki birqisim parlamént ezaliri, shiwétsiyediki falunggungchilar, démokratik xitaylar, tibet, mongghul qatarliqlarning wekilliri, shwétsiyede pa'aliyet qiliwatqan Uyghur ma'arip uyushmisining re'isi abdullah kökyar bashchiliqida ikki hey'et Uyghurlargha wakaliten alahide teklip bilen qatnashti.

Shwétsiyediki herqaysi dangliq gézit - zhurnal we téléwiziye qanallirining muxbirlirimu yighin'gha qatnashquchi méhmanlarni ziyaret qildi.

Igilishimizche: dewid klo'ugur we dewid matis 10 yildin béri xitaydiki insan ezaliri qachaqchiliqigha qarshi turush namida xizmet qilip kéliwatqan iken.

Buningdin burun shwétsiyide, xitayda yüz bériwatqan mehbuslarning ichki organlirini ilip sétishtek organ qachaqchiliqigha da'ir mesililer échilmay kelgen téma bolup, bu sewebtin sabiq kanada parlamént ezasi dawid klo'ugur we dangliq insan heqliri adwukati dewid matislarning bu qétim shiwétsiyige kélishide xitay türmiliridiki mehbuslarning ichki organlirini oghurliniwatqan qilmishlarning yawropa we pütün dunyada cheklishi üchün heriketke ötishi iken.

Melum bolushiche: bular 2009 - yili xelq'ara insan heqliri mukapatigha érishken bolup, 2010 - yili dunyadiki nurghun döletler teripidin nobél tinchliq mukapatigha namzat qilip körsitilgen.

Mezkur yighin'gha qatnashqan Uyghur ma'arip uyushmisining re'isi abdulla kökyar yighinda özige bérilgen qisqighina waqit ichide Uyghur diyarida yüz bériwatqan adem ichki ezalirini élip sétish qilmishliri heqqide özliri igiligen melumatlar we xelq ichidiki inkaslar asasida toxtalghanliqini bildürdi.

Shiwétsiyediki Uyghur ziyaliysi abbas ependim xitaydiki, jümlidin Uyghur diyaridiki adem ichki ezalirini élip - sétish mesilisige uzundin buyan diqqet qiliwatqan bolup, u shiwétsiye axbaratlirida bu qétimliq yighinning kengri orun alghanliqi, xitay da'irilirining her yili dunyagha 10mingdin 60minggha qeder kishining organlirini satidighanliqi heqqidiki uchurlarning mutexessislerning teyyarlighan doklatidin ashkarilan'ghanliqini bayan qildi.

Yighin axirida, yighin'gha qatnashqan Uyghur wekilliri yighin'gha ishtirak qilghan herqaysi wekiller bilen ayrim - ayrim uchrashqan we Uyghur diyaridiki türmilerdiki siyasiy mehbuslarning organlirini élip sétiliwatqan mesililer toghrisida özliri igiligen uchurlarni ortaqlashqan.

Bu programmini siler üchün shiwitsiyedin éhsan teyyarlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet