Xotendiki tijaretchi we déhqanlarmu bixeterlik manéwirigha mejburlanmaqta

Muxbirimiz méhriban
2017.04.21
herbi-manewir-xoten-ayropilan.jpg Yoluchilar ayropilani bilen toshulghan xitay qoralliq küchliri “Térrorluq” qa qarshi manéwir we qesemyadqa teyyarliq qilip, ayropilandin chüshmekte. 2017-Yili 27-féwral, xoten.
AFP


14-Féwral xoten guma pichaqliq hujumidin kéyin pütkül xoten wilayiti miqyasida saqchi-xelq hemkarliqidiki “Bixeterlikni qoghdash manéwiri” yolgha qoyulghanliqi melum. Xoten tewesidiki saqchi we tijaretchilerning bildürüshiche, saqchilarning yétekchilikidiki manéwir her küni 5-6 sa'et dawamlishidighan bolup, bu xil manéwirlargha dukandar-tijaretchilerdin bashqa, hetta déhqanlarmu mejburlan'ghan.

Roytérs agéntliqining Uyghur diyarida qattiq bixeterlik tedbirliri élin'ghanliqi heqqidiki bir parche xewerde qeshqerde tijaretchilerning qollirida kaltek tutqan halda dukanliri aldida tizilip turghanliqi süretlen'gen resimler bérilgen. Kéyin bu resimler ijtima'iy taratqularda ghulghula qozghighan idi.

Jenubiy Uyghur diyaridiki xotenning chira nahiyisige téléfon qilip, ehwal igiliginimizde bu xil bixeterlik tedbirlirining xotendimu ewj alghanliqi melum boldi. Bu heqte toxtalghan yerlik tijaretchiler özlirining her küni az dégende bir qétimdin yéziliq saqchixana uyushturidighan “Bixeterlik manéwiri” gha qatnishiwatqanliqini we buninggha héchqandaq heq bérilmeydighanliqini bildürdi.

Chiraliq tijaretchiler tilgha alghan atalmish bixeterlik manéwiri heqqide téximu tepsiliy ehwallarni bilish meqsitide nahiye tewesidiki saqchixanilargha qilghan téléfonlirimizdin, nöwette pütkül xoten wilayiti miqyasida “Saqchi-xelq hemkarliqidiki bixeterlik manéwiri” yolgha qoyulup, tijaretchiler hetta yézidiki déhqanlarningmu rayonlargha bölinip, her küni az dégende bir qétimdin bu xil manéwirlargha mejburi qatnishiwatqanliqi melum boldi.

Chira nahiyisi uluqsay saqchixanisining kéchilik nöwetchi saqchisining bildürüshiche, ular uluqsay merkizi saqchixanisini asas qilghan halda manéwir ötküzgendin bashqa, yéza tewesidiki 7 kent, bir qarawulxanidiki saqchi we yardemchi saqchilar özi tewelikide her küni 3 qétim manéwir ötküzidiken.

Mezkur saqchi bilen élip bérilghan söhbitimiz jeryanida yene, pütkül xoten teweside dawam qiliwatqan bu xil manéwirlarning éhtiyaji üchün, tijaretchi-dukandarlargha özini qoghdash kaltiki, tömür qalpaq, qalqan, tikenlik toqmaq qatarliqlar tarqitilghanliqi, manéwir signali chélin'ghan haman tijaretchi we déhqanlarning eng téz sür'et bilen belgilen'gen orun'gha yighilidighanliqi ashkarilandi.

Nöwetchi saqchi yene, bu xil manéwirlarning élip bérilishige seweb bolghan amillar we tijaretchilerning inkasliri heqqidiki so'allirimizgha jawab bérip, ularningmu bu ré'alliqni qobul qilidighan halgha keltürgenlikini ilgiri sürdi.

Uning bildürüshiche, bultur yil axiridin bashlap yolgha qoyulghan muqimliqni qoghdash manéwirliri, bu yil 14-féwraldiki guma pichaqliq hujumidin kéyin saqchi-xelq eskerliri-puqrlarning hemmisi qatnishidighan birleshme manéwirgha özgergen. Manéwirlarda saqchilarning meshghulat waqti 5-6 sa'et bolsa, tijaretchi-déhqanlarning her küni bir sa'ettin 2 sa'etkiche bolghan waqti manéwirgha serp qilinidiken.

Tepsilatini töwendiki awaz ulinishidin anglang.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.