Yawropaning 3 chong shehiridiki xitay elchixanisi aldida naraziliq namayishi ötküzüldi

Ixtiyariy muxbirimiz erkin tarim
2019-02-04
Élxet
Pikir
Share
Print

Yawropadiki eng chong türk ammiwi teshkilatliridin biri bolghan "Milliy görüsh", yeni "Milliy köz qarash" teshkilati Uyghurlarni qollap-quwwetlesh, Uyghurlarning nöwettiki éghir weziyitini dunyagha anglitish üchün yawropa döletliri, amérika qoshma shtatliri we awstraliye qatarliq döletlerde turushluq xitay elchixanilirining aldida namayish ötküzdi.

"Milliy görüsh" teshkilati milliylikni, örp-adetni qoghdap qélishni terghib qilidighan siyasiy heriket bolup, burundin tartip Uyghur dewasini qollap kelmekte. "Milliy görüsh" teshkilati teripidin uyushturulghan pa'aliyetlerge herqaysi döletlerdiki türkler we Uyghurlardin bolup köp sanda kishi ishtirak qilmaqta.

"Milliy görüsh", yeni "Milliy köz qarash" teshkilatining firansiye shöbisining mes'uli fatih ependi namayish meydanidin ziyaritimizni qobul qilip, namayishni uyushturushtiki meqsitining Uyghurlarning hazirqi éghir weziyitini dunya jama'etchilikige anglitish ikenlikini bayan qilip mundaq dédi: "Qimmetlik Uyghur qérindashlirim biz 'milliy görüsh' teshkilati bolush süpitimiz bilen yawropa döletliride namayish ötküzduq. Bulardin bashqa awstraliyening mélborn shehiri bilen amérikining nyu-york shehiridiki xitay konsulxanisining aldida namayish ötküzduq. Bizning bularni qilishimizdiki meqsitimiz Uyghurlar duchar boluwatqan bu heqsizliq we adaletsizlikni dunya jama'etchilikige anglitish arqiliq herqaysi döletlerning rehberlirini xitaygha bésim ishlitishke chaqirish. Chünki hazir, xitay Uyghurlargha ikkinchi dunya urushidin kéyin bolup baqmighan irqiy qirghinchiliq siyasiti élip barmaqta. Dunya rehberlirini buni derhal toxtitishqa chaqirtish üchün bu namayishni ötküzduq".

3-Féwral küni firansiyening paytexti parizh, bélgiyening paytexti biryussélda we shiwétsiyening sitokholm sheherliridiki xitay elchixanisi we konsulxaniliri aldida naraziliq namayishliri élip bérildi.

Firansiyening paytexti parizhdiki namayish chüshtin kéyin sa'et 15:00 de bashlan'ghan bolup, ikki sa'et dawamlashqan bu namayishqa qatnashqan firansiye Uyghur jem'iyitining re'isi alimjan ependi xitayning parizhda turushluq elchixanisining aldida ötküzülgen namayishqa Uyghur, türk we qazaqlardin bolup köp sanda kishining qatnashqanliqini bayan qildi.

Shiwétsiyening sitokholm shehiridiki namayish meydanidin ziyaritimizni qobul qilghan abdulla kökyar ependi, bu namayishni "Shiwétsiye Uyghur ma'arip uyushmisi" bilen "Milliy köz qarash teshkilatining" ortaq orunlashturghanliqini we türkler, shiwétsiyelikler we ereblerdin bolup köp sanda kishining ishtirak qilghanliqini bayan qildi.

Abdulla kökyar ependi bu yilqi namayishning burunqi namayishlargha oxshimaydighan terepliri toghrisida toxtaldi.

2-Féwral küni xitayning bélgiyening biryussél shehiride turushluq elchixanisi aldida namayish ötküzülgen. Bélgiye Uyghur jem'iyitining re'isi abdullam ependi "Yawropa türk musulmanlar birliki" we "Milliy görüsh", yeni "Milliy köz qarash" teshkilati bilen birlikte uyushturghan pa'aliyetke Uyghur we türklerdin bolup 200 kishi qatnashqanliqini, özlirining xitay elchilikige xet sun'ghanliqini bayan qildi.

Namayishchilar ay-yultuzluq kök bayraq we türlük teshwiqat lozunkilirini kötürüshüp, jarangliq sho'arlar bilen xitay hakimiyitige bolghan ghezeplirini ipade qilish bilen birge teshwiqat wasitiliri arqiliq shu döletlerning rehberlirini xitaygha bésim ishlitip, bésimni toxtitishqa chaqirghan. Lozunkilargha "Uyghur türklirining öltürülüshi toxtitilsun", "Sherqiy türkistanda zulum bar" we "Sherqiy türkistanliqlargha erkinlik" dégendek sho'arlar yézilghan.

Toluq bet