Yekende kötürülgen isyanda az dégende 120 kishi ölgenliki ilgiri sürülmekte

Ikki kündin béri yekende arqa-arqidin qanliq toqunushlar yüz bergenliki we weqede köpligen kishilerning ölgenliki heqqide gheyriy resmiy uchurlar tarqalmaqta. Shinxu'a agéntliqi yekendiki weqede 13 kishi ölgenlikini bayan qilghan bolsimu, weqening kölimi we tepsilati heqqide melumat bermidi.

Muxbirimizning bügün yeken ilishqudiki kent mes'ulliri we ahalilerdin igilishiche, bir nechche guruppa kishiler 28-iyul küni seherde ishqul yéziliq saqchixana we yéziliq hökümetke hujum qilghan. Saqchilar neq meydan'gha yétip kélip weqeni bésiqturghandin kéyin yene, bu yézining 14-, 15- we 24-kentliridin bir türküm kishiler qozghilip palta-keke we pichaqlar bilen teweliktiki kent ishxaniliri, hökümet aptomobilliri we yol üstidiki xitay köchmenlirige hujum qilghan.

Melum bir nöwetchi xadimining radi'omizgha bayan qilishiche, weqede az dégende 120 kishi ölgen. Emma, ölgüchilerning qanche nepirining isyanchilar tereptin, qanche nepirining xitay tereptin ikenliki hazirche melum emes.

Yuqiridiki awaz ulinishidin, muxbirimizning weqe yüz bergen ilishqu kentidin igiligen melumatlirining tepsilatini anglighaysiler.