Зулпиқар өзбашниң тутулғанлиқи дәлилләнди, ғәйрәтҗан османниң тутулғанлиқи илгири сүрүлмәктә

Мухбиримиз шөһрәт һошур
2018.09.17
Zulpiqar-Barat-Ozbash-we-Gheyretjan-Osman.jpg Зулпиқар барат өзбаш (солда) вә ғәйрәтҗан осман (оңда).
Social Media

Мухбиримизниң шинҗаң университетиниң универсал түзәш қоманданлиқ мәркизидин әһвал игилиши давамида мәзкур университетниң тонулған тәтқиқатчилиридин зулпиқар барат өзбашниң тутқун қилинғанлиқи дәлилләнди. Шинҗаң университети филологийә институтиниң профессори ғәйрәтҗан османниң 2008‏-йили түркийәдә ечилған бир хәлқаралиқ илмий муһакимә йиғинға қатнашқанлиқи үчүн тутулғанлиқи илгири сүрүлмәктә.

Һөрмәтлик радио аңлиғучилар, радийомизға кәлгән инкаста шинҗаң университетидин тутқун қилинғанлар арисида йеқинқи йилларда “тәңритағ алими” дегән намдики мутәхәссисләрни җәлп қилиш түри бойичә шинҗаң университетиниң филологийә институтиға тәклип қилинған тәтқиқатчи зулпиқар барат өзбашниңму барлиқи илгири сүрүлди.

‏Шинҗаң университетиниң универсал түзәш қоманданлиқ мәркизигә қарита елип барған телефон зияритимиз давамида зулпиқар барат һәққидиму мәлумат соридуқ. Алақидар хадим у һәқтә маарип назаритидин мәлумат соришимизни тәвсийә қилди. Биз униңдин зулпиқар баратниң тутқун қилинғанлиқи һәққидә кимләрдин учур алалайдиғанлиқимизни сориғинимизда буниң һәммә киши билидиған бир учур икәнликини баян қилди.

Америкидики уйғур паалийәтчи қутлуқ алмас шинҗаң университетидин тутулғанлар арисида өзиниң сабиқ хизмәтдашлиридин профессор азад султан вә ғәйрәтҗан османларниңму барлиқини барлиқини тилға алған иди. Биз шинҗаң университети универсал түзәш қоманданлиқ мәркизиниң хадимидин бу иккийлән һәққидиму мәлумат соридуқ. Мәзкур хадим буларниң тутулғанлиқидин хәвири йоқлуқини билдүрүш билән бирликтә зулпиқар баратниң тутулуш сәвәбидин хәвәрсиз икәнликини ейтти. Шинҗаң университетида “тәрбийәләш мәркизи” ниң йоқлуқини баян қилған бу хадим университеттин “тәрбийәләш” кә әкетилгәнләр һәққидә юқири дәриҗилик рәһбәрләрдин мәлумат соришимизни тәвсийә қилди.

Бүгүн радийомизға кәлгән йәнә бир инкаста уйғур классик әдәбият тәтқиқатчиси ғәйрәтҗан османниң чәтәлгә чиққанлиқи үчүн тутулғанлиқи илгири сүрүлгән иди. Радийомизниң хәвәр архиплиридин униң 2008‏-йили түркийәниң бурса шәһиридә ечилған хәлқаралиқ түркий тилар илмий муһакимә йиғиниға қатнашқанлиқи айдиңлашти. Америкидики паалийәтчи қутлуқ алмас әпәнди профессор ғәйрәтҗан османниң чәтәлгә чиқип илмий муһакимә йиғиниға қатнашқанлиқиниң униң тутулушиға сәвәб болғанлиқини чәткә қақмиған болсиму, әмма у шуғуллиниватқан уйғур классик әдәбияти оқутуши вә тәтқиқатиниңму нөвәттики вәзийәттә ғәйрәтҗан османниң тутулушиға йетәрлик сәвәб болалайдиғанлиқини илгири сүрди.

Һөрмәтлик радио аңлиғучилар, ениқлашлиримиз давамида тутқун қилинғанлиқи дәлилләнгән тәтқиқатчи зулпиқар барат өзбаш 2007‏-йили америкиниң һавай университетида җәмийәтшунаслиқ кәспи бойичә оқуған вә докторлуқ унваниға еришкән иди. У америкидики оқушини тамамлиғандин кейин үрүмчидә уйғур зиялири арисида тәшкиллигән “илим чейи” паалийити вә иҗтимаий таратқулардики бир йүрүш лексийә вә муназирилири билән нам қазанған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.