Лагер қурбанлири йеқинлириниң паалийәтлири түрк хәлқиниң қизғин қоллишиға еришмәктә

Ихтиярий мухбиримиз азиғ
2021-08-06
Share
Лагер қурбанлири йеқинлириниң паалийәтлири түрк хәлқиниң қизғин қоллишиға еришмәктә "панорама 1326 музейи" да өткүзүлгән рәсим көргәзмисиниң ечилиш мурасими вә бир қисим сүрәтләр. 2021-Йили авғуст, түркийә.
RFA/Azigh

Хитай һөкүмити 2016-йилидин буян йиғивелиш лагери вә халиғанчә тутқун қилиш сияситини уйғур елиниң һәрқайси җайлирида кәң қанат яйдурған болуп, хитай даирилириниң қирғинчилиқ сиясити сәвәблик нурғунлиған аилиләр парчиланғаниди. Лагер қурбанлири йеқинлири бу қетим түркийәниң һәр қайси шәһәрләргә берип, өзлириниң вә аилилириниң бешиға кәлгән паҗиәләрни түрк хәлқигә биваситә аңлитишни нишан қилған. Милләт нөвәттә һәрикитини башлап түркийәдә зор ғулғула қозғиған лагер қурбанлири йеқинлири 2-авғуст күни түркийәниң һәрқайси шәһәрлиридә елип беришни пиланлиған "анатолийә сәпири" паалийитини башлиғаниди.

Лагер қурбанлири йеқинлири бурсада төт күндин буян һәрхил тәшвиқат, лексийә вә көргәзмә паалийәтлирини тәшкилләп бурса хәлқигә уйғур давасини аңлитишта муһим қәдәмләрни басмақта.

Игилишимизчә, лагер қурбанлири йеқинлириниң бурсадики мәзкур паалийәтлирини тәшкилләштә бурсадики "йүсүф йүзлүләр тәшкилати" вә мәзкур тәшкилатниң башлиқи вәйсәл ашкин әпәндим көп күч чиқарған. Униңдин башқа бурса османгази районлуқ һөкүмити, "анда", "кардәш" вә "вафа" қатарлиқ пуқрави тәшкилатлар мәзкур паалийәтниң тәшкиллиниши үчүн һәр җәһәттин ярдәм қолини сунған.

"анадолу сәпири" дә һазирғичә икки хәлқ мәйдани вә бир музейда рәсим көргәзмиси елип берилған болуп, паалийәтчиләр рәсим көргәзмиси өткүзүлгән "панорама 1326 музейи" ниң мудири вә хадимлириниң мәзкур паалийәт үчүн көп күч чиқарғанлиқини ейтти.

Униңдин башқа паалийәтчиләр хәлқ мәйданлирида вә бурсаниң чоң кочилирида уйғур елида йүз бериватқан хитайниң қирғинчилиқ сиясәтлири чүшәндүрүлгән тәшвиқат варақлирини тарқатқан вә хитайниң ирқи қирғинчилиқ сияситигә қарши туруш үчүн имза топлаш паалийити орунлаштурған.

Униңдин башқа бурса өрдәкли мәдәнийәт мәркизидә хитайниң қирғинчилиқ сиясәтлирини чүшәндүрүшни мәқсәт қилған лексийә паалийити өткүзүлгән болуп, паалийәткә бурсадики улуғдағ университетиниң оқутқучи-оқуғучилири вә бурсадики җамаәт әрбаблири келип қатнашқан.

"анатолийә сәпири" паалийитиниң тәшкиллигүчилиридин түркийәдики уйғур кишилик һоқуқ паалийәтчиси мирзәхмәт илясоғли әпәнди зияритимизни қобул қилип, бир қанчә күндин буян бурсада елип бериливатқан паалийәтләр һәққидә тәпсилий мәлумат бәрди. У йәнә мәзкур паалийәтниң бурса хәлқи тәрипидин қизғин күтивелинғанлиқини, өткүзүлгән лексийә паалийәтлириниң интайин үнүмлүк болғанлиқини вә көплигән иҗабий баһаға еришкәнликини ейтти.

Мәзкур паалийәт җәрянида йәнә лагер қурбанлири йеқинлири гурупиписидики аял паалийәтчиләр "IHH инсаний ярдәм фонди" тәрипидин орунлаштурулған аяллар йиғиниға қатнишип, мәзкур фонди җәмийәтниң аял хизмәтчилиригә хитайниң уйғурларға қаратқан қирғинчилиқ сиясәтлирини аилилириниң бешиға кәлгән паҗиәләр билән биллә аңлатқан.

Лагер қурбанлири йеқинлиридин мәдинә назими ханим бурсада елип берилған бәзи паалийәтләр вә бурса хәлқиниң уйғур давасиға болған қизғин позитсийәси һәққидә тәпсилий мәлумат бәрди.

Лагер қурбанлири йеқинлири гурупписиниң тәшкиллигүчилиридин җәвлан ширмәмәт әпәндим зияритимизни қобул қилип, бурса хәлқиниң мәзкур паалийәткә болған қизғинлиқидин интайин тәсирләнгәнликини ейтти вә кейинки пиланлири һәққидә тохталди.

Лагер қурбанлири йеқинлири тәрипидин өткән йили 18-декабир башланған "милләт нөвәттә" паалийити һазирғичә давамлишип келиватқан болуп, мәзкур паалийәт уйғур мәсилисини түркийәгә вә дуняға тонутушта муһим рол ойнап кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт