Лагерға тутуп кетилгән әр-хотундин турсунҗанниң 10 күндин кейин җәсити чиққан, гүлбәһрәм техичә из-дерәксиз

Мухбиримиз шөһрәт һошур
2020-09-28
Елхәт
Пикир
Share
Принт
«Қайта тәрбийәләш» лагериниң алдида поста турған сақчи. 2018-Йили 7-сентәбир, хотән.
«Қайта тәрбийәләш» лагериниң алдида поста турған сақчи. 2018-Йили 7-сентәбир, хотән.
REUTERS

Әр-хотун тәң тутулуп кетиш, бир-бири билән көрүшәлмәсликла әмәс, ақивитидин 3 йилдин кейинму хәвәрсиз қелиш уйғур районида лагерлар қурулғандин буян мисали көп көрүлгән трагедийәлик бир һадисидур. Ғулҗа наһийәсиниң дөңмазар базири 2-кәнт әзаси турсунҗан савут билән аяли гүлбәһрәм 2017-йилниң бешида бир кечидә тәңла тутуп кетилгән. Сапмисақ әкетилгән турсунҗан савутниң 10 күндин кейин җәсити чиққан ; әмма, аяли гүлбәһрәмдин та һазирғичә аилә вә тавабиати вә мәһәллә-кой һечқандақ учур алалмиған.

Ғулҗа наһийәлик бир муһаҗирниң радийомизға инкас қилишичә, 2017-йилиниң бешидики бир кечидә 30 дин артуқ сақчи машинисиниң сигналлирини болушиға қоюп берип дөңмазарниң 2-кәнт 2-мәһәллисидә пәйда болған вә бу мәһәллидики деһқан турсунҗан савутниң қорусини қоршавға алған. Инкаста тәсвирлинишичә, турсунҗан савутниң қоруқ темидин атлап чүшкән 10 нәччә қара кийимлик сақчи, бу өйдин икки кишиниң бешиға қара халта кийдүрүп елип чиққан вә сақчи машинисиға иттирип солиғиничә йәнә шу әнсиз сигналлири билән мәһәллидин айрилған. Аридин 10 күн өткәндә, алдинқи қетимкидәк көп санда сақчи машинилири бу мәһәллидә йәнә бир пәйда болған. Бу нөвәт сақчи машинисидин бешиға қара халта кийдүрүлгән икки тирик җан әмәс, ақ халатқа йөгәлгән бир җәсәт һойлиға елип керилгән вә җәсәт һойлидики бирқанчә кишигә тутқузулғандин кейин, узун турғузулмастин, йәнә шу сақчи машинилириниң назаритидә дөңмазар тәвәликидики заратгаһлиққа елип кетилгән.

Биз инкастики бу учурниң тоғрилиқини айдиңлаштуруш үчүн, ғулҗа наһийәсидики алақидар идарә-органларға телефон қилдуқ. Телефонимизни қобул қилған дөңмазар 2-кәнттики сақчи хадими дәсләптә бу кәнттә бундақ бир вәқәниң йүз бәргәнликини йошурушқа тиришти. Биз қолимиздики инкасқа асасән вәқә һәққидә бир қисим соалларни сориғандин кейин, у бу кәнттә турсунҗан савут исимлик бириниң лагерда өлгәнликини дәлиллиди. Униң дейишичә, турсунҗан савут лагерға елип кетилип 10 күндин кейин җәсити чиққан. Униң җәсити һойлисида бирқанчә саәт турғузулған вә бир қисим қериндашлириға йүз-көзи йепиқ һаләттә көрситилгәндин кейин, сақчиларниң назарити астида заратгаһлиққа қоюветилгән.

Инкаста дейилишичә, деһқанчилиқтин башқа иш-оқити болмиған, һәтта дөңмазарниң сиртиғиму бәк чиқип кәтмәйдиған, башланғуч маарип сәвийәсигә игә бу әр-аялниң бунчә әнсиз тутуп кетилиши дәсләптә, бу тимтас мәһәллиниң аһалилирини бәкла һәйран қалдурған. Улар, аридин бирқанчә ай өткәндә, сақчи машинилири тохтимай мәһәллини кезишкә башлиған вә өй бастуруп аһалиләрни тутқун қилишқа башлиғандин кейин, бу сақчи машинилириниң наһийәдә тәсис қилинған аталмиш тәрбийәләш мәркәзлиригә адәм топлаватқанлиқини байқиған.

Улар, әмма шуниңдиму кәмсөз турсунҗан савут билән башланғуч мәдәнийәт сәвийәсидики гүлбәһрәмниң зади қайси қилмиши сәвәблик лагерға әкетилгәнлики вә өлүмигә сәвәб болғудәк дәриҗидә сорақ қилинғанлиқиниң сирини йешәлмигән.

Мәзкур кәнт сақчиси бу әр-хотунниң бир мәзгил «оқуп салған» лиқи үчүн тутулғанлиқини ашкарилиди. Әмма бу оқушниң дин оқуш яки намаз оқуш икәнлики һәққидә мәлумат бәрмиди.

Инкаста дейилишичә, турсунҗанниң аяли гүлбәһрәмниң наһийәгә әкетилгинидин башқа һәрқандақ бир учур кәнт кадирлириғиму, униң аилә тавиабатиғиму та һазирғичә билдүрүлмигән. Һәтта турсунҗан савутниң җәсити һойлида уруқ-туғқанлириға тапшурулған вақиттиму, у мәйданда аяли гүлбәһрәм көрүлмигән.

Мәзкур сақчи хадими гүлбәһрәмниң турсунҗанниң җәсити аилисигә тапшурулған вә заратгаһлиққа қоюлған мәзгилдиму гүлбәһрәмниң қоюп берилмигәнликини дәлиллиди.

Ғулҗа наһийәлик муһаҗирниң инкасида әнә шундақ һәйвәтлик тутулған вә бири өлтүрүлүп, йәнә бири ғайиб қиливетилгән бу икки тутқунниң аилә-тавабиати һәққидә мәлумат берилмигән. Мәлум болушичә, турсунҗан вә гүлбәһрәмниң 3 пәрзәнти вә бирқанчә қериндашлири бар болуп, уларниң нөвәттики қисмити һазирчә мәлум әмәс.

Пикирләр (0)
Share
Толуқ бәт