Германийә парламент әзалири “уйғур ирқий қирғинчилиқи” ни етирап қилдурушқа күч чиқармақчи

Ихтиярий мухбиримиз әркин тарим
2022.06.06
Share on WhatsApp
Share on WhatsApp
Германийә парламент әзалири “уйғур ирқий қирғинчилиқи” ни етирап қилдурушқа күч чиқармақчи Лагер шаһитлири германийә федератсийә парламентидики кишилик һоқуқ вә инсанпәрвәрлик комитетиниң рәиси рәната алт ханим башчилиқидики либераллар партийәсиниң мәсуллири билән көрүшти. 2022-Йили 2-июн, германийә.
RFA/Erkin Tarim

“уйғур ирқий қирғинчилиқи” мәсилиси америка һөкүмитидин башқа йәнә канада парламенти қатарлиқ 8 дөләтниң парламентлири тәрипидин етирап қилинғандин кейин, мәзкур қирғинчилиқини башқа дөләтләрниң һөкүмәт вә парламентлириғиму етирап қилдуруш хизмәтлириму җиддий елип берилмақта. Бундақ мәқсәттики учришишлар германийә парламентидиму өткүзүлди.

6-Айниң 2-күни явропа шәрқий түркистан бирликиниң рәиси әсқәр җан, голландийәдә турушлуқ лагер шаһитлиридин қәлбинур сидиқ вә өмәрбәк алий вә фирансийәдә турушлуқ лагер шаһити гүлбаһар һәйтиваҗи қатарлиқлар бирликтә әтигән саәт 9 да биринчи болуп германийә федератсийә парламентидики кишилик һоқуқ вә инсанпәрвәрлик комитетиниң рәиси рәната алт ханим башчилиқидики либераллар партийәсиниң мәсуллири билән көрүшүп, улардин “уйғур ирқий қирғинчилиқи” етирап қилиши тәләп қилған.

Лагер шаһитлири германийә христиан демократийә партийәсиниң кишилик һоқуқ комитетиниң мәсули мичаәл бранд(Michael Brand) әпәнди қатарлиқлар билән көрүшти. 2022-Йили 2-июн, германийә.
Лагер шаһитлири германийә христиан демократийә партийәсиниң кишилик һоқуқ комитетиниң мәсули мичаәл бранд(Michael Brand) әпәнди қатарлиқлар билән көрүшти. 2022-Йили 2-июн, германийә.
RFA/Erkin Tarim

Явропа шәрқий түркистан бирликиниң рәиси әсқәр җанниң билдүрүшичә, улар бу һәқтә күч чиқиридиғанлиқини баян қилған. Арқидин әсқәр җан қатарлиқлар йәнә христиан демократийә партийәсиниң кишилик һоқуқ комитетиниң мәсули мичаәл бранд әпәнди билән учришип униңға тәләплирини йәткүзгән. Мичаәл бранд германийә федератсийә парламентиниң “уйғур ирқий қирғинчилиқи” ни қобул қилмиса болмайдиғанлиқини, бу һәқтә христиан демократийә партийәсиниң күч чиқиридиғанлиқини баян қилған.

Әң ахирқи учришиш германийә федератсийә парламентидики кишилик һоқуқ вә инсанпәрвәрлик комитетиниң христиан сотсиял партийәси әзаси сабинә вәисс ханим билән елип берилған. Мәзкур учришиш наһайити қизғин шәкилдә давамлашқан болуп, лагер шаһитлири өзлириниң хитай җаза лагерлирида көргән-билгәнлирини аңлитип, уйғур қирғинчилиқи һәққидә гуваһлиқ бәргән. Уларму охшашла германийә федератсийә парламентида “уйғур ирқий қирғинчилиқи” ға болған диққәтниң наһайити юқири икәнликини, буни етирап қилдуруш үчүн күч чиқиридиғанлиқини ейтқан.

Арқидин явропа шәрқий түркистан бирлики рәиси әсқәр җан әпәнди сөз елип германийә дөлитиниң дуняда демократийә билән кишилик һоқуқни тәрғиб қиливатқан чоң дөләт болуш сүпити билән америка башлиқ бирқисим ғәрб дөләтлири етирап қилған “уйғур ирқий қирғинчилиқи” ни дәрһал етирап қилиши керәкликини тәкитлигән.

Радийомиз зияритини қобул қилған әсқәр җан әпәнди бу қетимқи учришиштин германийә һөкүмити вә парламентиниң йеқин кәлгүсидә “уйғур ирқий қирғинчилиқи” ни етирап қилиш еһтимали барлиқини һес қилғанлиқини баян қилди.

Америка һөкүмитидин башқа йәнә, канада, әнглийә, голландийә, белгийә, литва, австрийә вә фирансийә парламентлири илгири-кейин болуп, хитайниң уйғурлар үстидин йүргүзүватқан бастуруш һәрикитини “ирқий қирғинчилиқ” дәп етирап қилғаниди. Дуняниң һәрқайси җайлирида йүз бериватқан кишилик һоқуқ дәпсәндичиликини әйибләштә алдинқи қатарда туруп келиватқан германийәниң һазирғичә “ирқий қирғинчилиқ” ни етирап қилиш мәсилисидә бирәр қарар чиқармаслиқи, һәр саһәниң диққитини қозғимақта. Әсқәр җан әпәнди буниң сәвәблири һәққидә тохталди.

Әсқәр җан әпәнди берлиндики икки күнлүк зиярәт җәрянида германийә ахбарат васитилириниңму бурунқиға охшимайдиған шәкилдә қизиққанлиқини тәкитлиди.

Мәзкур һәйәт 6-айниң 1-күни германийә ташқи ишлар министирлиқи хадимлири вә германийә һөкүмити кишилик һоқуқ вә инсанпәрвәрлик алий комиссари билән учришиш елип берип “уйғур ирқий қирғинчилиқи” ни етирап қилиши тәләп қилғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.