Лагер шаһитлириниң германийәдә елип бериватқан гуваһлиқ бериш паалийити зор тәсир қозғиған

Ихтиярий мухбиримиз әркин тарим
2021-11-16
Share
Лагер шаһитлириниң германийәдә елип бериватқан гуваһлиқ бериш паалийити зор тәсир қозғиған
RFA/Erkin Tarim

Һазир франсийәдә яшаватқан лагер шаһити гүлбаһар һейтваҗи билән голландийәдики лагер шаһити қәлбинур сидиқниң 11-айниң 6-күни германийәниң мюнхен шәһиридә башланған гуваһлиқ бериш паалийити давамлашмақта.

Германийәдики "явропа шәрқий түркистан бирлики" ниң мәсули әсқәр җан әпәндиниң билдүрүшичә, хәлқара кәчүрүм тәшкилати билән аз санлиқ милләтләрни қоғдаш тәшкилати бирлитә уюштурған бу паалийәт германийә таратқулири, сиясийонлири вә авам хәлқниң диққитини уйғурлар мәсилисигә қаритишни мәқсәт қилған икән. Йәни бу паалийәт германийә хәлқиниң диққәт-етибарини хитайниң уйғурларға қарита елип бериватқан ирқий қирғинчилиқиға тартиш, шундақла буни тохтитиш үчүн һәрикәткә өтүшкә чақириш икән.

Әсқәр җанниң ейтишичә, мәзкур паалийәт германийәниң 10 шәһиридә өткүзүлидиған болуп, 11-айниң 6-күнидин 20-күнигичә болған арилиқта алди билән германийәниң 5 чоң шәһиридә өткүзүлмәктә икән.

Guwahliq-Myunxen-202111-02.jpeg

Әсқәр җан бу паалийәниң 11-айниң 6-күни мюнхенда ахбарат елан қилиш билән башланғанлиқини, икки һәптә ичидә германийәниң августбург, франкфурт қатарлиқ 5 чоң шәһиридә өткүзүлгәнликини билдүрди. Лагер шаһитлиридин гүлбаһар һейтваҗи билән қәлбинур сидиқ ханим бу һәптә ичидә йәнә германийәниң гөттенген, лайпзиг, хановер, берлин вә карлсрухе қатарлиқ 5 шәһиридә гуваһлиқ беридикән.

Әсқәр җан әпәнди гуваһлиқ бериш паалийити өткүзүлгән һәр бир шәһәрдә 3 түрлүк паалийәт елип бериливатқанлиқини, бу палийәтләрниң бәзилиригә шу шәһәрләрниң башлиқлириму қатнишип, лагер шаһитлиридин мәлумат игиләватқанлиқини баян қилди.

Әсқәр җан әпәнди германийә хәлқи уйғур лагер шаһитлириниң бешидин қандақ паҗиәләрниң өткәнликини, уларниң қандақ қийин-қистақларға дуч кәлгәнликини өз ағзидин аңлисун дәп бу паалийәтни тәшкиллигәнликини, шу сәвәбтин бу паалийәтниң үнүминиң интайин зор болуватқанлиқини баян қилди.

Лагер шаһиди гүлбаһар һейтваҗи ханимму бу мунасивәт билән зияритимизни қобул қилип, өзиниң 6-ноябир күнидин башлап қәлбинур ханим билән бирликтә германийәниң һәр қайсий шәһәрлирини айлинип гуваһлиқ бериватқанлиқини, бу гуваһлиқларни аңлиған кишиләрниң инкасларниң наһайити тәсирлик болуватқанлиқини билдүрди.

Игилинишичә, һазирға қәдәр лагердин қутулуп чиққан җәмий 13 киши гуваһлиқ бәргән болуп, лагердин қутулған болсиму, әмма өзини ашкарилашни халимиған кишиләрниң саниму аз әмәс икән. Қәлбинур ханим лагерларниң техи тақалмиғанлиқини, хитай даирилири лагерлардики уйғурларға қийин-қистақ, басқунчилиқ, туғмас қилиш вә хорлашни өз өз ичигә алған инсанийлиққа қарши түрлүк вәһшийликләрни йүргүзиватқанлиқини, шуңа лагерларниң ич йүзини паш қилишниң һәр бир уйғурниң бурчи икәнликини тәкитлиди.

Әсқәр җан әпәндиниң ейтишичә, германийәдә елип бериливатқан гуваһлиқ бериш паалийитини германийә ахбаратлири бәс-бәстә хәвәр ишләп тарқатқан икән. Мәзкур паалийәтниң хәвәрлири германийә дөләт телевизийәсиму көп қетим берилгәнлики мәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт