Yéngisheher ermudunda idris quddus we hézim quddus aka-ukilarning lagérda ölgenliki delillendi

Muxbirimiz shöhret hoshur
2019-09-12
Élxet
Pikir
Share
Print
Xitay Uyghur rayonida qurghan yighiwélish lagérlirining bir. 2019-Yili 2-iyun, atush.
Xitay Uyghur rayonida qurghan yighiwélish lagérlirining bir. 2019-Yili 2-iyun, atush.
AFP

Jem'iyet xewerliride bayan qilishiche, Uyghur rayonidiki yighiwélish lagérlirida élip bériliwatqan qéyin-qistaqtin bashqa nachar yataq, nachar tamaq we nachar dawalash shara'itlirimu her küni dégüdek köp sanda kishining ölümige seweb bolmaqta. Emma da'iriler ta hazirgha qeder, xuddi lagérda yétiwatqanlarning omumi sani heqqide héchqachan melumat bérip baqmighandek lagérda ölgenlerning sani heqqidimu melumat bermidi. Shunga biz yéqinqi ayallardiki lagérlar toghruluq éniqlashlirimizda, lagérdiki ölüm-yétim weqelirini asasliq diqqet merkizi qilduq.

Melum bolushiche, da'iriler lagérda ölgenlerning ölüm uchurini ölgüchining biwasite uruq-tughqanliridin bashqilardin pütünley sir tutmaqta. Hetta asasi qatlamdiki saqchi xadimlirimu, özi mes'ul kent yaki mehelle sirtidiki kishilerning lagérdiki ölüm hadisiliridin xewersiz qaldurulmaqta. Éniqlashlirimizdin yene melum bolushiche yézilargha chüshken her derijilik xizmet guruppiliri lagérda ölgenlerning ehwalini yoshurush we uning jem'iyetke tarqilishining aldini élish üchün wezipelendürülmekte. Qeshqerning yéngisheher nahiyesige xizmetke chüshken bir xadim, özi mes'ul bolmighan ermudun yéza 3-kent 5-mehellide lagérda ölgen birmu kishi yoqluqini bayan qilghan idi. Emma mezkur mehelle bashliqi bu mehellidin lagérgha ekétilgenlerdin aka-uka idris quddus bilen hézim quddusning bultur yilning axiri we bu yilning otturiliri bolup, her ikkisining lagérda jan üzgenlikini ashkarilidi.

Bu mehelle bashliqi bala yene idris quddus bilen hézim quddusning ölüm sewebi we jeryani heqqide özlirige saqchilardin teripidin héchqandaq melumat bérilmigenliki, musibettiki a'ilidin hal sorap barghan waqtida, bu a'ile ezaliriningmu ölüm sewebi heqqide gep qilishqa jür'et qilalmighanliqini bayan qildi. Uning déyishiche, yéngisheherde u bilidighan ikki yighiwélish lagéri bar bolup؛ idris quddus yéngisheherdiki chéngnen lagérda bir mehel turghandin kéyin, jinayiti bayqilip késiwétilgen we ürümchidiki bir türmige yötkelgen. U ötken yil dékabirda ürümchidiki türmide jan üzgen. Hézim quddus yéngisheherdiki chéngnen lagérida atalmish terbiyelniwatqan mezgilide, yeni bu yil 6-ayda hayatidin ayrilghan.

52 We 45 yashlardiki bu aka-ukilarning ölüm sewebidin mehelle kadirliri ta hazirghiche xewer tapalmighan. Yene jem'iyet xewerliride déyilishiche, da'iriler lagérda ölgenlerning bir qismining jesitini, ghelwe qilmasliq we mexpiy tutush sherti bilen a'ilisige qayturghan؛ emma köpinchisining jesiti a'ilisige bérilmigen. Yéngisheher ermudunluq idris quddusning jesitimu ürümchidin a'ilisige ekilinmigen. Emma jesetning néme üchün a'ilisige bérilmigenliki we ürümchide qandaq bir terep qilin'ghanliqi hazirche melum emes.

Toluq bet