Uyghur akadémiyesi bu yil 40 neper Uyghur oqughuchigha "Tewpiq oqush mukapati" tarqitidiken

Ixtiyariy muxbirimiz erkin tarim
2018-06-07
Élxet
Pikir
Share
Print
Uyghur akadémiyisi ilmiy muhakime yighinigha qatnashquchilar xatirisi. 2017-Yili 8-öktebir, amérika.
Uyghur akadémiyisi ilmiy muhakime yighinigha qatnashquchilar xatirisi. 2017-Yili 8-öktebir, amérika.
RFA/Qutlan

Yéqinqi yillardin béri türkiyege öz xirajiti bilen kélip oquydighan Uyghur oqughuchilarning köpiyip bérishi we Uyghur oqughuchilarning a'ilisi bilen bolghan alaqisining üzülüp qélishi seweblik zor iqtisadiy qiyinchiliqlargha duch kelmektche.

Bu ehwalni közde tutqan bezi meripetperwer tijaretchiler Uyghur akadémiyesi tesis qilghan "Tewpiq oqush mukapati" gha iqtisadiy yardem qilip, mezkur oqush mukapatining sommisi we namzatlar sanini köpeytti. Uyghur akadémiyesi 2017-2018-oqush yilida yene türkiyede oquwatqan 40 Uyghur oqughuchigha "Tewpiq oqush mukapati" béridighanliqini bildürdi.

Uyghur akadémiyesining re'isi abdulhemit qaraxan ependining éytishiche, mezkur oqush mukapatigha köp sandiki Uyghur oqughuchilar iltimas qilghan bolup, bularning ichidin mukapat shertlirige layiq kélidighan 40 neper namzat tallinidiken.

Biz bu heqte yenimu tepsiliy melumat igilesh üchün Uyghur akadémiyesining re'isi abdulhemit qaraxan ependi bilen söhbet élip barduq.

Ablimit qaraxan ependi oqughuchilarning oqush netijisi we iqtisadiy shert-shara'iti qatarliq bir qatar emeliy ehwallargha qarap turup, 40 neper Uyghur oqughuchigha "Tewpiq oqush mukapati" bérishni qarar qilghanliqini bayan qildi.

U "Tewpiq oqush mukapati" ning bir meripetperwer Uyghur tijaretchining pul i'ane qilishi bilen 2014-yili tesis qilin'ghanliqini, her yili 10 neperdin Uyghur oqughuchigha oqush mukapati bériwatqanliqini, bu yil yene bir meripetperwer Uyghur tijaretchining 40 Uyghur oqughuchigha oqush mukapati béridighanliqini éytip, iqtisadiy yardem qilghanliqini bayan qildi.

"Tewpiq oqush mukapati" türkiye uniwérsitétlirida doktorluq, magistirliq we bakalawrliq unwani üchün oquwatqan Uyghur oqughuchilargha bériliwatqan bolup, dokturantlargha 700 türk lirasi, magistir aspirantlargha 500 türk lirasi we toluq kurs oqughuchilirigha 400 türk lirasi bérilidiken.

Bu qétimliq "Tewpiq oqush mukapati" gha érishken istanbul uniwérsitétining oqughuchisi peride tursun ziyaritimizni qobul qilip, özining oqush netijilirining yaxshi ikenlikini, hazirqi qiyin shara'itta oqushini dawamlashturalishi üchün mezkur oqush mukapatining köp yölek bolidighanliqini tekitlidi.

Enqere uniwérsitétining oqughuchisi enwer exmetmu ziyaritimizni qobul qilip, özining a'ilisi bilen alaqisi üzülüp qélip qéyin künlerni béshidin ötküzüwatqanliqini, mushundaq shara'itta mezkur oqush mukapatining bérilishi uni we türkiyediki bashqa Uyghur oqughuchilarni tolimu söyündürgenlikini bayan qildi.

"Tewpiq oqush mukapati" Uyghur hazirqi zaman tarixidiki büyük aqartquchi we islahatchi memet'éli tewpiqning milliy ma'arip rohigha warisliq qilish, u yandurghan meripet mesh'ilini ulghaytish shundaqla türkiyede oquwatqan Uyghur oqughuchilargha yardem qilish meqsiti bilen 2014-yili Uyghur akadémiyesi teripidin tesis qilin'ghan idi. Eyni waqitta muhajirette yashawatqan birqanche meripetperwer Uyghur tijaretchining iqtisadiy yardimi bilen tesis qilin'ghan bu oqush mukapati 2014-yilidin bashlap oqushta ela, milliy ruhi küchlük bolghan hemde türkiyede öz xirajiti bilen oquwatqan Uyghur oqughuchilargha tarqitilip kéliwatqan idi.

Abdulhemit qaraxan ependi 2014-yilidin bügün'ge qeder türkiyede öz xirajiti bilen toluq kurs, magistirliq we doktorluq unwani üchün oquwatqan munewwer Uyghur oqughuchilardin jem'iy 59 nepirige "Tewpiq oqush mukapati" ning bérilgenlikini eskertip ötti.

Toluq bet