Истанбулда мәрһум устаз, диний алим мәхсум һаҗимни хатириләш йиғини өткүзүлди

Ихтиярий мухбиримиз арслан
2017-01-03
Елхәт
Пикир
Share
Принт
Истанбулдики шәрқий түркистан маарип вә һәмкарлиқ җәмийити мәркизидә диний алим абдулһәкимхан мәхсум һаҗимниң роһиға атап дуа-тилавәт қилмақта. 2016-Йили 31-декабир, истанбул.
Истанбулдики шәрқий түркистан маарип вә һәмкарлиқ җәмийити мәркизидә диний алим абдулһәкимхан мәхсум һаҗимниң роһиға атап дуа-тилавәт қилмақта. 2016-Йили 31-декабир, истанбул.
RFA/Arslan

12-Айниң 31-күни шәнбә истанбулдики шәрқий түркистан маарип вә һәмкарлиқ җәмийитиниң уюштуруши билән җәмийәт мәркизидә 12-айниң 22-күни туюқсиз аләмдин өткән диний алим абдулһәкимхан мәхсум һаҗимни хатириләш йиғини өткүзүлди. Йиғинға истанбулда яшаватқан уйғурлардин көп санда киши қатнашти.

Йиғинда алди билән қуран кәрим тамамлинип, мәрһумниң роһиға дуа оқулди. Кейин мәрһумниң җиназа намизи мурасими җәрянида синалғуға елинған һөҗҗәтлик филим көрситилди.

Кейин шәрқий түркистан маарип вә һәмкарлиқ җәмийитиниң рәиси һидайәтулла оғузхан вә диний алим ибраһим дамоллам айрим-айрим сөз қилип, мәрһумниң һаят иш излири вә хизмәт-паалийәтлири шундақла пикир-чүшәнчилири тоғрисида тохталди.

Һидайәтулла оғузхан мәрһумниң һаят иш излири тоғрисида тохтилип мундақ деди: «мәрһум мәхсум һаҗим һаят вақтида қандақ қол тутушуп бирликтә маңған болсақ, буниңдин кейинму ашундақ давам қилидиғанлиқимизниң вәдиси вә әмәлийити сүпитидә бу мунбәрдә җәм болуп олтурдуқ.»

Һидайәтулла оғузхан сөзидә йәнә, мәрһум устаз мәхсум һаҗимниң вапати сәпдашлирини ғәпләттин ойғитишқа түрткә болғанлиқини билдүрүп мундақ деди: «биз һазир чоң бир алимимиздин, йолбашчимиздин, қоманданимиздин, рәһбиримиздин айрилдуқ. Бу биз үчүн чоң йоқитиш, әмма мәрһум устазимиз өзиниң өлүми арқилиқ бизни ғәпләт уйқудин ойғитишқа тиришти дәп билип бу вәзипини техиму җанлиқ бир шәкилдә йүритимиз.»

Һидайәтулла оғузхан, мәрһум мәхсум һаҗимниң ғайә-мәқсәтлири тоғрисида тохтилип мундақ деди: «мәхсум һаҗимниң һаятидики чүшәнчилирини әмәлий һаятимизда тәтбиқлаш арқилиқ биз билән бир сәпдашлиқ һаяти җәрянида бизгә қалдуруп кәткән чоңқур излиридин вә сирдашқан сирлиримиз вә кәлгүсигә нисбәтән музакирә қилған мәслиһәтлиримиз, пиланлиримизниң әмәлийлишиши үчүн конкрет вә әмәлий қәдәм елишқа еһтияҗимиз бар. Мән хизмәтләрдә, сәпәрдә, олтуруп қопушта һәр заман мәхсум һаҗим билән биргә өткән бири болуш сүпитим билән, мәхсум һаҗимниң пикир-чүшәнчилирини, ғайә-мәқсәтлирини йеқиндин яхши билимән. Қалдуруп кәткән нурғун сирлири вә нурғун биз қилишқа тегишлик болған вәзипилиримиз бар, буниң әлвәттә сәпдашлар билән, тәдриҗий һалда қериндашлиримиз билән һәмбәһир болуп бирликтә тәтбиқлаймиз.»

Һидайәтулла оғузхан мәхсум һаҗимниң пикир-чүшәнчилири тоғрисида тохтилип мундақ деди: «мәхсум һаҗим өзиниң илмий хизмити вә хусусийәтлириниң сиртида, шәрқий түркистан мусулманлириниң дәртлирини йүрикигә чоңқур сиғдурған вә бу еғир бир мәсулийәтни талапәтсиз нишанға йәткүзүш үчүн пүтүн қийинчилиқларни үстигә йүклигән бир рәһбәр иди.»

Һидайәтулла оғузхан мәрһум устаз мәхсум һаҗимниң шәрқий түркистан давасиниң қийинчилиқини яхши чүшинип йәткән бир киши икәнликини билдүрүп мундақ деди: «мәхсум һаҗим бу даваниң қийинчилиқини яхши биләтти, шуниң үчүн бу давани тарихта өткән катта өлималиримиз, сабит дамоллам, муһәммәтимин буғра қатарлиқ нурғун чоң сиясий рәһбәрләр, диний алимлиримизниң вә қоманданлиримизниң шундақ қаттиқ тиришипму әмәлийләштүрәлмигән мәсилисигә та шу күндин бүгүнгичә наһайити инчикиләп қарайтти.»

Һидайәтулла оғузхан, мәрһум мәхсум һаҗимниң маарип саһәсигә интайин әһмийәт бәргәнликини билдүрүп мундақ деди: «мәхсум һаҗим кечә-күндүз яшларниң тәрбийилинип чиқишиға, һәм ислами, һәм пәнни, һәм сиясий саһәләрдә оқуғучи йетиштүрүшкә тиришиватқанлиқини көрәттуқ, түркийә вә дуняниң һәр қайси җайлиридики өлималарниң бир нуқтиға келишигә теришип кәлгән иди.

Һидайәтулла оғузхан сөзидә йәнә, мәрһумниң һәр саһәдә хизмәт қилишқа тиришип кәлгәнлики тоғрисида тохтилип мундақ деди: «шәрқий түркистан мусулманлириниң азадлиқи, шәрқий түркистан мусулманлириниң диний вә миллий кимликини қоғдиши, шәрқий түркистан мусулманлириниң дин билән муҗәссәмлишип бирлишип кетиши, шәрқий түркистан азадлиқи үчүн һәр саһәдә кечә-күндүз тиришип кәлгән иди. Мәхсум һаҗим сәпни бирләштүрүш тоғрисида һәм тәблиғ билән, һәм әмәлийити билән бизгә көрситип кәлди. Бу кишиниң бизгә һаятида әмәлий көрсәткән үлгилири биз үчүн интайин қиммәтлик.»

Ибраһим дамоллам, мәрһум диний алим мәхсум һаҗимниң аләмдин өткәнликигә көзни юмуп ачқучә 9 күн өткәнликини билдүрди вә мундақ деди: «алимсиз бир дуня қуяшсиз, юлтузсиз қараңғу дуняға охшаш, алимниң өлүми аләмниң өлүми. Һәр бир алим инсанлар үчүн бир аләмдур. Шуниң үчүн аләм йоқалса мәвҗудийәт-һаят йоқилиду, алим йоқалса аләм йоқилиду. Мәрһум устазимиз бизгә мәзлум уйғур хәлқиниң дуня-ахирәтлик бәхт йолини йорутуп беридиған маарипни мирас қалдуруп кәтти.

Икки саәт давам қилған йиғин мәрһумниң роһиға дуа қилиш билән ахирлашти.

Юқиридики авазлиқ улиништин бу һәқтики программимизниң тәпсилатини аңлиғайсиләр.

Толуқ бәт