Istanbulda merhum ustaz, diniy alim mexsum hajimni xatirilesh yighini ötküzüldi

Ixtiyariy muxbirimiz arslan
2017-01-03
Élxet
Pikir
Share
Print
Istanbuldiki sherqiy türkistan ma'arip we hemkarliq jem'iyiti merkizide diniy alim abdulhekimxan mexsum hajimning rohigha atap du'a-tilawet qilmaqta. 2016-Yili 31-dékabir, istanbul.
Istanbuldiki sherqiy türkistan ma'arip we hemkarliq jem'iyiti merkizide diniy alim abdulhekimxan mexsum hajimning rohigha atap du'a-tilawet qilmaqta. 2016-Yili 31-dékabir, istanbul.
RFA/Arslan

12-Ayning 31-küni shenbe istanbuldiki sherqiy türkistan ma'arip we hemkarliq jem'iyitining uyushturushi bilen jem'iyet merkizide 12-ayning 22-küni tuyuqsiz alemdin ötken diniy alim abdulhekimxan mexsum hajimni xatirilesh yighini ötküzüldi. Yighin'gha istanbulda yashawatqan Uyghurlardin köp sanda kishi qatnashti.

Yighinda aldi bilen qur'an kerim tamamlinip, merhumning rohigha du'a oquldi. Kéyin merhumning jinaza namizi murasimi jeryanida sin'alghugha élin'ghan höjjetlik filim körsitildi.

Kéyin sherqiy türkistan ma'arip we hemkarliq jem'iyitining re'isi hidayetulla oghuzxan we diniy alim ibrahim damollam ayrim-ayrim söz qilip, merhumning hayat ish izliri we xizmet-pa'aliyetliri shundaqla pikir-chüshenchiliri toghrisida toxtaldi.

Hidayetulla oghuzxan merhumning hayat ish izliri toghrisida toxtilip mundaq dédi: "Merhum mexsum hajim hayat waqtida qandaq qol tutushup birlikte mangghan bolsaq, buningdin kéyinmu ashundaq dawam qilidighanliqimizning wedisi we emeliyiti süpitide bu munberde jem bolup olturduq."

Hidayetulla oghuzxan sözide yene, merhum ustaz mexsum hajimning wapati sepdashlirini gheplettin oyghitishqa türtke bolghanliqini bildürüp mundaq dédi: "Biz hazir chong bir alimimizdin, yolbashchimizdin, qomandanimizdin, rehbirimizdin ayrilduq. Bu biz üchün chong yoqitish, emma merhum ustazimiz özining ölümi arqiliq bizni gheplet uyqudin oyghitishqa tirishti dep bilip bu wezipini téximu janliq bir shekilde yüritimiz."

Hidayetulla oghuzxan, merhum mexsum hajimning ghaye-meqsetliri toghrisida toxtilip mundaq dédi: "Mexsum hajimning hayatidiki chüshenchilirini emeliy hayatimizda tetbiqlash arqiliq biz bilen bir sepdashliq hayati jeryanida bizge qaldurup ketken chongqur izliridin we sirdashqan sirlirimiz we kelgüsige nisbeten muzakire qilghan meslihetlirimiz, pilanlirimizning emeliylishishi üchün konkrét we emeliy qedem élishqa éhtiyajimiz bar. Men xizmetlerde, seperde, olturup qopushta her zaman mexsum hajim bilen birge ötken biri bolush süpitim bilen, mexsum hajimning pikir-chüshenchilirini, ghaye-meqsetlirini yéqindin yaxshi bilimen. Qaldurup ketken nurghun sirliri we nurghun biz qilishqa tégishlik bolghan wezipilirimiz bar, buning elwette sepdashlar bilen, tedrijiy halda qérindashlirimiz bilen hembehir bolup birlikte tetbiqlaymiz."

Hidayetulla oghuzxan mexsum hajimning pikir-chüshenchiliri toghrisida toxtilip mundaq dédi: "Mexsum hajim özining ilmiy xizmiti we xususiyetlirining sirtida, sherqiy türkistan musulmanlirining dertlirini yürikige chongqur sighdurghan we bu éghir bir mes'uliyetni talapetsiz nishan'gha yetküzüsh üchün pütün qiyinchiliqlarni üstige yükligen bir rehber idi."

Hidayetulla oghuzxan merhum ustaz mexsum hajimning sherqiy türkistan dawasining qiyinchiliqini yaxshi chüshinip yetken bir kishi ikenlikini bildürüp mundaq dédi: "Mexsum hajim bu dawaning qiyinchiliqini yaxshi biletti, shuning üchün bu dawani tarixta ötken katta ölimalirimiz, sabit damollam, muhemmet'imin bughra qatarliq nurghun chong siyasiy rehberler, diniy alimlirimizning we qomandanlirimizning shundaq qattiq tirishipmu emeliyleshtürelmigen mesilisige ta shu kündin bügün'giche nahayiti inchikilep qaraytti."

Hidayetulla oghuzxan, merhum mexsum hajimning ma'arip sahesige intayin ehmiyet bergenlikini bildürüp mundaq dédi: "Mexsum hajim kéche-kündüz yashlarning terbiyilinip chiqishigha, hem islami, hem penni, hem siyasiy sahelerde oqughuchi yétishtürüshke tirishiwatqanliqini körettuq, türkiye we dunyaning her qaysi jayliridiki ölimalarning bir nuqtigha kélishige tériship kelgen idi.

Hidayetulla oghuzxan sözide yene, merhumning her sahede xizmet qilishqa tiriship kelgenliki toghrisida toxtilip mundaq dédi: "Sherqiy türkistan musulmanlirining azadliqi, sherqiy türkistan musulmanlirining diniy we milliy kimlikini qoghdishi, sherqiy türkistan musulmanlirining din bilen mujessemliship birliship kétishi, sherqiy türkistan azadliqi üchün her sahede kéche-kündüz tiriship kelgen idi. Mexsum hajim sepni birleshtürüsh toghrisida hem tebligh bilen, hem emeliyiti bilen bizge körsitip keldi. Bu kishining bizge hayatida emeliy körsetken ülgiliri biz üchün intayin qimmetlik."

Ibrahim damollam, merhum diniy alim mexsum hajimning alemdin ötkenlikige közni yumup achquche 9 kün ötkenlikini bildürdi we mundaq dédi: "Alimsiz bir dunya quyashsiz, yultuzsiz qarangghu dunyagha oxshash, alimning ölümi alemning ölümi. Her bir alim insanlar üchün bir alemdur. Shuning üchün alem yoqalsa mewjudiyet-hayat yoqilidu, alim yoqalsa alem yoqilidu. Merhum ustazimiz bizge mezlum Uyghur xelqining dunya-axiretlik bext yolini yorutup béridighan ma'aripni miras qaldurup ketti.

Ikki sa'et dawam qilghan yighin merhumning rohigha du'a qilish bilen axirlashti.

Yuqiridiki awazliq ulinishtin bu heqtiki programmimizning tepsilatini anglighaysiler.

Toluq bet