Долқун әйса: мәрһум абдулһәкимхан мәхсум билән ахирқи қетим мәккидә учрашқан идуқ

Д у қ баш катипи долқун әйса әпәнди билән җәнубий австралийә ислам диний җәмийитиниң сабиқ рәиси диний алим абдусалам алим әпәнди(солдин биринчи) мәккидә өмрә һәҗдә. 2015-Йили феврал, сәуди.

22-Декабир әтигәндә түркийәниң истанбул шәһиридә паалийәт елип бериливатқан “шәрқий түркистан маарип вә һәмкарлиқ тәшкилати” билән “шәрқий түркистан өлималар бирлики” ниң қурғучиси вә мәсули, тонулған диний алим, паалийәтчи абдулһәкимхан мәхсум һаҗим 53 йешида туюқсиз вапат болғандин буян, дуняниң һәр қайси җайлиридики уйғур тәшкилатлири охшимиған шәкилләрдә мәрһумниң иш паалийәтлирини яд етиш үчүн түрлүк паалийәтләрни елип бармақта.

Бүгүн шу мунасивәт билән баш штаби германийәдики дуня уйғур қурултийиниң баш катипи долқун әйса зияритимизни қобул қилип, мәрһум һәққидә өз әслимиси вә көз қарашлирини оттуриға қойди.

Дуня уйғур қурултийиниң баш катипи долқун әйса түркийәдики шәрқий түркистан маарип вә һәмкарлиқ җәмийитиниң қурғучиси мәрһум диний алим абдулһәкимхан мәхсум һаҗим вапатиниң уйғур хәлқи үчүн чоң йоқитиш болғанлиқини билдүрди вә униң муһаҗирәттики уйғур маарипини гүлләндүрүштә көрсәткән пидакарлиқи үстидә тохталди.

Долқун әйса мәрһум диний алим абдулһәкимхан мәхсум һаҗиниң хитай зулумдин қечип өз вәтинидин айрилип шәрқий җәнуби асия әллири арқилиқ миң бир мушәққәтләр билән түркийәгә кәлгән уйғур яшлириға мәниви җәһәттин көп тәлим бәргәнликини алаһидә тәкитлиди.

Долқун әйса зияритимиз җәрянида, өзиниң 2015-йили 2-айда сәуди әрәбистанниң мәккә шәһиридә әң ахирқи қетим мәрһум абдулһәкимхан мәхсум һаҗим билән һәм сөһбәттә болғанлиқини, кейинки йилларда болса тайландтики уйғур мусапирлар мәсилиси вә йеқинқи вақитлардики түркийәдики җамаәт әрбаби абдуқадир япчанниң қолға елинишидин ибарәт бир қатар мәсилиләрдә мәрһум билән елип берилған телефон сөһбәтлирини әсләп өтти.

Долқун әйса йәнә, мәрһумниң өзидә тәсир қалдурған бир қисим инсаний әхлақий пәзиләтлири тоғрисидиму қисқичә тохталди.

Долқун әйса ахирида йәнә, йеқинқи йиллардин буян һәр қайси ислам әллиридә диний илим тәһсил қилған муһаҗирәттики уйғур өлималириниң һәр җәһәттә ортақ пикир һасил қилиши үчүн мәрһум абдулһәкимхан мәхсум һаҗиниң көрсәткән тиришчанлиқлириға юқири баһа бериш билән биргә, буниңдин кейинму һиҗрәттики уйғур диний затлиридин мәрһум кәби мөтивәрләрниң йетишип чиқишиға үмид билән қарайдиғанлиқини билдүрди.

Юқириқи аваз улинишидин тәпсилатини аңлаң.