Abdulla rozibaqiyéf tughulghanliqining 120 yilliqi yurti chélekte xatirilendi

Ixtiyariy muxbirimiz oyghan
2017-11-08
Élxet
Pikir
Share
Print
Almutada abdulla rozibaqiyéf tughulghanliqining 120 yilliqigha béghishlan'ghan tentenilik xatirilesh pa'aliyitidin körünüsh. 2017-Yili 7-noyabir, almuta.
Almutada abdulla rozibaqiyéf tughulghanliqining 120 yilliqigha béghishlan'ghan tentenilik xatirilesh pa'aliyitidin körünüsh. 2017-Yili 7-noyabir, almuta.
RFA/Oyghan

7-Noyabir küni almuta wilayiti emgekchiqazaq nahiyesining chélek yézisida abdulla rozibaqiyéf tughulghanliqining 120 yilliqigha béghishlan'ghan tentenilik xatirilesh pa'aliyiti ötküzüldi.

Chélektiki Uyghur medeniyet merkizi bilen abdulla rozibaqiyéf namidiki ottura mektep birlikte uyushturghan mezkur xatirilesh pa'aliyitige nahiye rehberliki, jem'iyetler wekilliri, ziyaliylar, chélektiki Uyghur jama'iti, oqutquchi-oqughuchilar qatnashti.

Deslep sözge chiqqan emgekchiqazaq nahiyesining orunbasar hakimi aybék bidayéf nahiye hakimi binali isqaqning tebrik sözini oqup ötti. Nahiye hakimining tebrik sözide prézidént nursultan nazarbayéf ilgiri sürgen "Tughulghan yer" programmisi boyiche, abdulla rozibaqiyéf namidiki mektep meydanining awatlashturulghanliqi tilgha élindi. Uningda yene mezkur pa'aliyetning Uyghur medeniyet merkizining tirishchanliqi we pütkül yurt-jama'etchilikning qollap-quwwetlishi bilen uyushturulghanliqini alahide tekitlidi. Axirida nahiyelik hökümet namidin bu qétimqi xatirilesh pa'aliyitini tebrikleydighanliqi bildürüldi.

"Sana'etchiler, tijaretchiler we yéza igiliki xadimliri birleshmisi" ning re'isi dilmurat qoziyéf ependimu söz qilip, qazaqlar bilen Uyghurlarning tili, dini, dili bir xelqler ikenlikini, qazaqistan hökümitining qollap-quwwetlishi bilen Uyghur xelqining 20-esiridiki munewwer perzenti abdulla rozibaqiyéfqa béghishlan'ghan mezkur pa'aliyetning ongushluq ötküzülüwatqanliqini ilgiri sürdi.
U sözide abdulla rozibaqiyéfning eyni dewrde siyasiy ishlardin bashqa, Uyghurning tarixini tiklesh, tilini saqlash, medeniyet, metbu'at we milliy edebiyatini rawajlandurush ishlirighimu alahide küch serp qilghanliqini tekitlidi.

Radiyomiz ziyaritini qobul qilghan ataqliq sha'ir jemshit rozaxunof bu yil abdulla rozibaqiyéfqa béghishlan'ghan köpligen pa'aliyetlerning ötküzülgenlikini eskertip, mundaq dédi: "Uyghur xelqining munewwer perzenti abdulla rozibaqiyéf siyaset, iqtisad we Uyghur xelqining ijtima'iy hayatigha da'ir köp ishlarni qilghan adem. Men uni 20 yéshidin bashlap jem'iyet we dölet ishlirigha arilashqan, köpligen lawazimliq xizmetlerde ishlep, qazaqistan diyari üchün, öz xelqi üchün, xelqlerning dostluqi üchün nahayiti köp emgek singdürgen erbab, dep hésablaymen. Biz uningdin pexirlinimiz".

Jemshit rozaxunofning qarishiche, mezkur pa'aliyet abdulla rozibaqiyéfqa oxshash dangliq Uyghur perzentlirining namini ebediyleshtürüsh, ularni kéyinki ewladlargha ülge qilip körsitish meqsitide uyushturulghan iken we köpchilikte chongqur tesirat qaldurghan iken.

Murasim dawamida medeniyet öyining sen'etkarliri, oqughuchilar, almutadiki chaykowskiy namidiki muzika mektipidin kelgen "Dostluq" Uyghur ansambilining qatnishishida chong konsértliq programma körsitildi. Uningda yene mezkur pa'aliyetni ötküzüshke aktip küch körsetkenler, "Inayet" jem'iyitining, emgekchiqazaq nahiyelik Uyghur medeniyet merkizining pexriy yarliqliri we sowghiliri bilen teqdirlendi.

Ziyaritimizni qobul qilghan abdulla rozibaqiyéf namidiki ottura mektepning Uyghur tili we edebiyati boyiche oqutquchisi nadirem tayipowa mundaq dédi: "Mektepning aldigha abdulla rozibaqiyéfning heykili tiklendi. Buningda chélek yézisidiki her bir kishi yurt üchün boluwatqan bu ishqa jan koydürdi. Undin bashqa mektep uchumkarlirimu özlirining maddiy yardimini körsetti".

Nadirem tayipowaning éytishiche, mektepte Uyghur we rus siniplirida minggha yéqin oqughuchi oquwatqan bolup, mektep memuriyiti her qandaq ishlarni hökümet organliri, medeniyet merkizi we yigit bashliri bilen zich munasiwette élip barmaqtiken.

Igilishimizche, qazaqistanda abdulla rozibaqiyéf name bérilgen mektepler yerkent (panfilof) nahiyisining penjim yézisidin, Uyghur nahiyisining bahar yézisidin we almuta shehirining dostluq mehellisidin orun alghan iken. Undin bashqa, almuta shehiridiki chong kochilarning birige abdulla rozibaqiyéfning nami bérilgen iken.

Toluq bet