Almatada ötken boks boyiche yashlar arisidiki musabiqide Uyghurlarmu utuqqa érishti

12-Apréldin 15-aprélghiche bolghan töt kün jeryanida almata shehiridiki jumhuriyetlik tenheriket mektipide yash bokschilarning xelq'araliq musabiqisi bolup ötti.

Uninggha qirghizistan, tajikistan, özbékistan, türkmenistan, xitay we qazaqistanning 1999- we 2000-yillarda tughulghan tenheriketchiliri qatnashti. 5-Qétimliq mezkur musabiqe qazaqistan jumhuriyitining xizmet körsetken trénéri amalbék tshanof mukapatliri boyiche uyushturuldi.

Uning échilish murasimida sözligen qazaqistanning dangliq bokschiliri jaqsiliq ushkémpirof, yérmaxan ibrayimof we bashqilar mezkur musabiqining yashlar arisida tenheriketning boks türini teshwiq qilishni, bu sahede bashqimu memliketler bilen hemkarlishishni hem yash boks mahirlirini terbiyilep chiqishni közligenlikini alahide tekitlep, uning barliq qatnashquchilirigha chong utuqlar tilidi.

Töt kün'ge sozulghan musabiqide her xil salmaqlarda qazaqistanning 11 wilayiti we shundaqla besh chet dölettin bolup, 100 din oshuq bokschi qatnashti.

Qazaqistanning boks boyiche ayallar komandisining bashliqi, boks mahiri zakir abduqadirofning éytishiche, qazaqistanda yashlar ara boksqa alahide diqqet bérilmekte. Yigirme yilgha yéqin waqit mabeynide ötküzülüp kéliwatqan qazaqistanning xizmet körsetken trénéri ménggéréy xayrutdinof xatirisige béghishlan'ghan boks boyiche xelq'ara musabiqilerge ottura asiye jumhuriyetliri, shundaqla ezerbeyjan, rusiye, kuba, xitay xelq jumhuriyiti tenheriketchiliri pat-pat qatniship turidu. Bolupmu, bu musabiqilerde Uyghur élining yash bokschiliri alahide közge chüshmekte. Z. Abduqadirof bu jehette memet tursun, abduréshit rehmitulla, zulpiqar mehemmeteli, abduréhim ibrahim, qurbanjan chong qatarliq bokschilarni alahide tilgha aldi.

Zakir abduqadirof on besh yildin buyan boks bilen shughullinip, qazaqistan chémpiyoni atalghan, xelq'ara musabiqilergimu qatnashqan bolup, u kéyinki yillarda bolsa, boks boyiche référliq we trénérliq bilen meshghul bolup kelmekte. U radi'omiz ziyaritini qobul qilip, bolupmu sowét ittipaqi ghulighandin kéyin, qazaqistanda boks boyiche xelq'ara musabiqilerning uyushuturulushqa bashlighanliqini, chet'ellerdin, shu jümlidin Uyghur élidinmu köpligen tenheriketchilerning mushu musabiqilerge qatniship, chong utuqlar qaziniwatqanliqini otturigha qoyup, mundaq dédi: “Sh u a r ning boksni yuqiri kötürgen ablikim akimiz boksqa qattiq qiziqatti. U wapat bolup ketti. U pütkül aptonom rayon boyiche yaxshi balilarni tallap, ürümchige yighip, musabiqilerge qatnashturdi. U özi terbiyiligen abdushükür bir nechche qétim xitay we asiya chémpiyoni bolghan. Abdushükürning özining shagirti chiqti. Bu, olimpik oyunlirigha ikki qétim qatnashqan memet tursundur”.

Zakir abduqadirof Uyghur élidin kélip qatnishiwatqan bokschilardin köp ümid kütidighanliqini, buningdin kéyinmu ular bilen hemkarliqni téximu kücheytidighanliqini ilgiri sürdi. Uning éytishiche, bu qétim almatada ötküzülgen musabiqide ibrahim mamut 64 kilogramliqlar boyiche 2-orunni, memet merdan 81 kilogramliqlar boyiche 2-orunni, xalmurat rehman 75 kilogramliqlar boyiche 3-orunni igiligen.

Boks qazaqistanda köp qiziqish qozghawatqan ten-heriket türlirining biri bolup, buningda sérik qonaqbayéf, wasiliy jirof, yérmaxan ibrahimof, sérik sapiyéf, génnadiy golofkin qatarliq dangliq boks mahirliri yétiship chiqqan. Igilishimizche, sowét dewride bu sahede qazaqistanni deslep dunyagha tonutqanlarning biri Uyghur yigiti abduréshit abduraxmanoftur. U hazir dem élishta. Bügünki künde bolsa, qazaqistanliq Uyghur tenheriketchiliridin boks boyiche közge körünüp kéliwatqan dilmurat mijitof bilen rena perhatowadur. Ular yéqinda qazaqistanning boks boyiche tallanma komandisigha élin'ghan idi.

Qazaqistandiki boks boyiche bash trénérlarning biri dolqun kamékof Uyghurlar ichidin yuqirida ismi atalghanlardin tashqiri yétilip chiqiwatqan yash bokschilar heqqide toxtilip, mundaq dédi: “Yash ösmürlerdin agézof shaxmurat 2002-yili tughulghan, tashmuhemmetof elghappar almata shehiri boyiche chémpiyon boldi. Chong trénérlardin xemit berayéf tenheriket akadémiyeside trénér bolup ishlewatidu. Emdi tenheriket institutini püttürüp chiqqanlardin idillayéf imerjan, shahabbas ghenékof we bashqilar tenheriket mektepliride he, shexsiy kulublarda ishlewatidu”.

Dolqun kamékof kélechekte yash Uyghur bokschilirining yenimu terbiyilinip chiqishi üchün köp izdinish zörürlükini, buning üchün köpinche teshwiq ishlirini yürgüzüshning muhimliqini tekitlidi.