Алматада атақлиқ композитор мәрһум селимахун зәйналлофниң 80 йиллиқи хатириләнди

Ихтиярий мухбиримиз ойған
2016-10-10
Share

8-Өктәбир күни алмата шәһириниң достлуқ мәһәллисигә орунлашқан абдулла розибақийеф намидики 153-мәктәп-гимназийәдә бәстикар композитор вә сазәндә селимахун зәйналофниң 80 йиллиқиға беғишланған сәнәт кечилики өткүзүлди. Униңға зиялийлар, җәмийәтлик бирләшмиләр вәкиллири, устазлар вә оқуғучилар, юрт-җамаәтчилик вәкиллири қатнашти.

Радийомиз зияритини қобул қилған гимназийә мудири шавкәт өмәроф мәзкур кәчни уюштуруш мәқситини чүшәндүрүп, мундақ деди: “мәқситимиз устазимизниң қилған әмгәклирини, язған, ейтқан нахшилирини йәнә бир қетим әсләш, балиларға миллий роһта тәрбийә бериш. Байрамниң юқири дәриҗидә өтидиғиниға ишәнчимиз камил. Селимахун акиниң һәқиқәтәнму бу юртқа, мәктипимизгә қилған әмгәклири бебаһа. У, мәктипимизниң тәрәққиятиға наһайити көп үлүш қошқан акилиримизниң бири. Өзи охшаш сазандиләрни, сәнәтхумар балиларни тәйярлиған чоң устаз.”

Бу кечилик гимназийә хор топиниң орунлишида шаир мирзәхмәт меримофниң сөзигә, селимахун зәйналофниң музикисиға йезилған “вәтән” нахшиси билән ечилди. Мурасимда сөзгә чиққан педагогика пәнлириниң намзати емелян һошуроф, филологийә пәнлириниң намзати рабик исмайилоф, қазақистан парламентиниң сабиқ сенатори марс батталоф, “инайәт” җәмийәтлик бирләшмисиниң рәиси һакимҗан арупоф, җумһурийәтлик “уйғур авази” гезитиниң баш муһәррири ершат әсмәтоф, гимназийә мудири шавкәт өмәроф вә башқилар с. Зәйналофниң уйғур миллий сәнитиниң раваҗлинишиға қошқан төһписини алаһидә тәкитлиди.

Радийомиз зияритини қобул қилған қазақистанниң хизмәт көрсәткән артиси марат мәмәтбақийеф өзиниң с. Зәйналоф билән узун вақит бирлишип ишлигәнликини әсләп, мундақ деди: “селимахун ака наһайити тиришчан иди. У маңа мәхмут ака абдурахманоф билән язған “көзлирим” дегән нахшини бәрди. Бу нахшиға бир һәптә ишлидим. Кейин униңға уссул қоюлди. Хәлқму бу нахшини хушал қарши алди. Селимахун акиниң язған һәммә нахшилири хәлқ нахшилириға айланди. У һазир болған болса, техиму көп нахшиларни ейтар идим.”

Селимахун нәзәр оғли зәйналоф 1936-йили уйғур елиниң или вилайитигә қарашлиқ җағистай йезисида сазәндә аилисидә туғулған. Дәсләптә оттура мәктәпни, андин 1959-йили ғулҗа шәһиридә әхмәтҗан қасими намидики билим дәргаһини тамамлиған с. Зәйналоф шу йили қазақистанға көчүп чиқип, алмата вилайити уйғур наһийисиниң чоң ақсу йезисиға орунлишиду. У 1962-йилғичә даңлиқ әлнәғмә султанмурат рәзамоф рәһбәрлик қилған “арзу” ансамбилида йетәкчи сазәндә, андин алмата шәһиригә көчүп келип, 1997-йилғичә а. Розибақийеф намидики 153-мәктәптә музика пениниң муәллими болуп ишлиди. Шу җәрянда с. Зәйналоф достлуқ йезисида “достлуқ” ансамбилини қуруп, көплигән талантлиқ шагиртларни тәрбийиләп чиққан. У болупму абдухалиқ уйғур, һезмәт абдуллин, хелил һәмрайеф, мәхмут абдурахманоф, абдуреһим өткүр, долқун ясин қатарлиқ атақлиқ шаирларниң әсәрлиригә вә хәлқ иҗадийитигә музика язған 300дин ошуқ нахшиларниң апторидур. С. Зәйналоф нахшилири “йүрәк садалири”, “шүкри дәймән”, “дил арами” намлиқ топламлар билән йоруқ көргән. У, қазақистан композиторлар иттипақиниң әзаси, 1-дәриҗилик “илһам” мукапатиниң, шундақла қазақистан маарип министирлиқиниң көплигән пәхрий ярлиқлириниң саһиби с. Зәйналоф 2011-йили 75 йешида аләмдин өткән иди.

Зияритимизни қобул қилған композиторниң қизи, гимназийә китабханисиниң хадими гүлбостан зәйналова атисини әсләп, мундақ деди: “дадамниң һаяти биһөдә өтмиди. Униң кәйнидин нурғунлиған шагиртлири қалди. Шундақла бала-чақилири, нәврилири, чәврилири дадимизниң изини бесип келиватиду. Униң язған нахшилирини хәлқ сөйүп тиңшайду. Вәтәнгә барғанда ғулҗида дадамниң нахшилирини ейтқинини көрүп, өзүм бәк хурсән болдум. Дадам аилидә сөзни җиқ қилмайтти. Бир ейтқинини иккинчи қетим тәкрарлимайтти. Дадам биздин оқушни, бир ишни ахириғичә чиқиришни тәләп қилатти. Дадам һаятиниң тәңдин толисини иҗадийәткә беғишлиған. Дадамниң сазәндә, композитор болуп йетилишидә апимизниңму роли үстүн дәп ойлаймән.”

Кечилик паалийәт қуддус ғоҗамяроф намидики җумһурийәтлик дөләт уйғур музикилиқ комедийә тиятири “нава” ансамбилиниң атақлиқ нахшичилири марат мәмәтбақийеф, нуралим варисоф, пәрһат давутоф вә башқиларниң иҗрасида мәрһумниң “йоллар”, “турнилар”, “сеғиндим”, “күлсә җананлар”, “уйғурум” намлиқ нахшилири, шундақла гимназийә оқуғучилири тәйярлиған нахша вә уссуллар билән давам қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт