Almatada "Waris" yashlar edebiy-ijadiy birleshmisi bilen uchrishish bolup ötti

Ixtiyarimi muxbirimiz oyghan
2017-07-31
Élxet
Pikir
Share
Print
Mushu qétimliq uchrishishtin bir körünüsh,2017-yili 28-iyul, almata
Mushu qétimliq uchrishishtin bir körünüsh,2017-yili 28-iyul, almata
RFA/Oyghan

28-Iyulda almata shehirining sultanqorghan mehelliside orunlashqan "Mahinur" réstoranida "Waris" yashlar edebiy-ijadiy birleshmisi wekilliri bilen uchrishish bolup ötti. Mezkur birleshmining uyushturushi we almata sheherlik Uyghur medeniyet merkizi hem "Uyghur mekteplirini qollash fondi"ning qollap-quwwetlishi bilen ötken bu murasimgha sheherlik medeniyet merkizining almata sheherlik nahiyiler shöbiliri, almata wilayitining Uyghur, emgekchiqazaq nahiyilik Uyghur medeniyet merkezliri, ammiwi axbarat wasitiliri wekilliri, ziyaliylar, yashlar qatnashti.

Mezkur yighinni achqan "Uyghur mekteplirini qollash fondi"ning mudiri, filologiye penlirining doktori alimjan hemrayéf qazaqistan Uyghur edebiyatining bügünki ehwali, uning tereqqiyat yolliri, qazaqistan Uyghur jama'etchiliki aldida turghan wezipiler, yashlarni qollap-quwwetlesh we bashqimu mesililer heqqide öz pikirlirini otturigha qoydi. U öz sözide qedimiy Uyghur edebiyatining rawajlinish sehipiliri hem uning islam dewride yetken utuqliri, ottura esir we hazirqi zaman Uyghur edebiyati, musteqil qazaqistan Uyghur edebiyati wekilliri aldida turuwatqan wezipiler toghriliq qarashlirini bildürdi. A. Hemrayéf shundaqla Uyghur edebiyati jewherlirining bolupmu Uyghur élide toplan'ghanliqini hem ularni alahide izdep-tépish komisseyiliri teripidin tépiliwatqanliqini alahide tekitlidi.

Mezkur uchrishishning birinchi qismida yash sha'irlar özliri ijad qilghan shé'irlirini oqup, méhmanlarning alahide alqishlirigha sazawer boldi. Uning ikkinchi qismida sözge chiqqan ziyaliylar, jemiyetlik birleshmiler wekilliri we yurt-jama'etchilik aktipliri Uyghur yashliridin köp ümidlerni kütüwatqanliqini ilgiri sürdi.

Uchrishishning bu qismida ataqliq Uyghur sha'iri abdughopur qutluqof, "Atamura" neshriyatining Uyghur bölümi bashliqi malik mehemdinof, "Mektep" neshriyati Uyghur edebiyati bölümining bashliqi rexmetjan ghojamberdi, sheherlik Uyghur medeniyet merkizining bashliqi abdullam hoshurof, shundaqla "Uyghur awazi" we "Asiya bügün" gézitliri, "Intizar", "Axbarat", "Ghunche" zhurnalliri wekilliri özlirining mezkur edebiy-ijadiy birleshmini toluqi bilen qollap-quwwetleydighanliqini bildürdi. Ular shundaqla mezkur zhurnallarning bir nechche sanlirini yash ijadkarlargha béghishlaydighanliqini otturigha qoydi.

Radi'omiz ziyaritini qobul qilghan "Atamura" neshriyatining Uyghur bölümi bashliqi malik mehemdinof mezkur birleshmining qurulghanliqining köpligen Uyghurlarni xushal qilip, kélechekke ümidlendürgenlikini ilgiri sürüp, mundaq dédi: "Lékin yash ijadkarlirimiz aldida edebiyatimizni, uning ichide nezmiy zhanirni rawajlandurushtek chong mesile turuptu. Bügün mushu sorun'gha yighilghan yash ijadkarlarning hemmisila neq mushu zhanirda qelem tewritiwatqan sha'irlar iken. Biz yash sha'irlirimizgha chong utuqlarni tileymiz. Ularning kélechikidin ümidlerni kütimiz. Yaxshi eserlerni kütimiz. Chünki bügünki tangda metbu'at sehipiliride, milliy neshirlirimizde, intérnét torlirida qismen bolsimu mushu sha'irlirimiz bilen tonushqan iduq. Emdi yashlarning yaxshi eserlerni meydan'gha étip, xelqimizni xushal qilidu dep ishinimiz".

Bu pa'aliyetke qatnashqan ayrim jemiyetlik birleshmiler hemde shexsiyler özlirining yashlarni qollap-quwwetleshke teyyar ikenlikini, shundaqla ularning eserlirini yoruqqa chiqirishqa maddiy yardem béridighanliqini bildürdi.

"Waris" yashlar edebiy-ijadiy birleshmisining bashliqi, sha'ir wilyam molutofning pikriche, mezkur pa'aliyetke teklip qilin'ghanlarning köpchiliki kelmigen halettimu u muwappeqiyetlik ötüp, bir qatar mesililer hel bolghan. Ilgiri bu shekilde uchrishishlar qolgha élinmighan bolsimu, bu qétimqi pa'aliyet köpchilikni xushal qilghan. W. Molutof birleshmining deslepki ish-réjilirige toxtilip, mundaq dédi: "Birinchi réjimizde xelqimiz bilen uchrishish qilishni qarar qilduq. Bu kechte nurghun pikir-teklipler boldi. Bu yerde asasiy qollap-quwetligüchi medeniyet merkezliri boldi".

W. Molutof "Waris" birleshmisi ezalirining özara ittipaqliqining mehkem ikenlikini, bolupmu intérnét torliri arqiliq yashlar arisidiki alaqini téximu kücheytishke küch chiqiridighanliqini, yash ijadkarlar arisidiki ijadiy alaqini, tejribe almashturushni janlandurup, bügünki Uyghur edebiyatining rawajlinish yönilishliride alahide pa'aliyet élip baridighanliqini ilgiri sürdi.

W. Molutof bu uchrishishta birinchi nöwette birleshme ish pilanliri bilen tonushturushni messed qilghanliqini, bu uchrishishqa birleshme ezalirini peqet bir guruppisiningla qatnishish pursitige ige bolalighanliqini, kélechekte ularning sépining téximu köpiyidighanliqini otturigha qoydi.

Mezkur uchrishishta sha'irem baratowa, molutjan toxtaxunof, abduljan aznibaqiyéf, albina emetowa, dilfuza roziyéwa, a'idem exmetowa, teqdir oktyabrof, dilinur ömerowa, sabirem enwerowa, shöhret iliyéf, dilraba roziyéwa qatarliq yash ijadkarlar qatnashti.

Toluq bet