Almatada jumhuriyetlik Uyghur medeniyet merkizining saylam yighini ötküzüldi

Ixtiyariy muxbirimiz oyghan
2017-08-14
Élxet
Pikir
Share
Print
Qazaqistan Uyghurlirining jumhuriyetlik étno-medeniyet merkizining hésabat-saylam yighinidin körünüsh. 2017-Yili 8-awghust, almata.
Qazaqistan Uyghurlirining jumhuriyetlik étno-medeniyet merkizining hésabat-saylam yighinidin körünüsh. 2017-Yili 8-awghust, almata.
RFA/Oyghan

Yéqinda almatadiki dostluq öyide qazaqistan Uyghurlirining jumhuriyetlik étno-medeniyet merkizining hésabat-saylam yighini bolup ötti.

Merkezning bashqarma ezaliri, shundaqla jem'iyetlik birleshmiler wekilliri, yurt-jama'etchilik aktipliri qatnashqan mezkur yighinda aldi bilen qazaqistan jumhuriyiti parlaménti aliy kéngishining ezasi, merkez re'isi shahimerdan nurumof doklat bilen sözge chiqti. U öz doklatida qazaqistan prézidénti nursultan nazarbayéfning rehberlikide yürgüzülüwatqan milliy siyaset hem uning memlikettiki barliq milletlerge, shu jümlidin Uyghurlargha bériwatqan mumkinchiliklirini alahide tekitlep, merkezning nizamnamisige muwapiq besh yil mabeynide qilin'ghan ishlar heqqide hésabat berdi.

Doklattin melum bolushiche, merkez bu waqit ichide bir qatar chong pa'aliyetlerni ötküzgen bolup, ularning ichidin 2012-yildiki Uyghur medeniyet künliri, 2015-yildiki Uyghurlarning milliy ta'ami "Lengmen bayrimi", kespiy boks boyiche xelq'ara musabiqe, Uyghur élining dangliq éstrada artislirining chong konsérti, 2015- we 2016-yillardiki "Razimenlik karwini" we "Musteqilliq méwisi" herikiti, köpligen xeyrxahliq pa'aliyetliri we bashqilar alahide atap ötüldi. Shundaqla bezi pa'aliyetlerning "Birlik" jem'iyetlik fondi, qazaq jughrapiye jem'iyiti we bashqimu teshkilatlar bilen birlikte ötkenliki tekitlendi.

Mezkur yighinda sözge chiqqan xanim-qizlar kéngishining re'isi senem béshirowa, r. Süléyménof namidiki sherqshunasliq instituti Uyghurshunasliq merkizining rehbiri, tarix penlirining doktori risalet kerimowa, jumhuriyetlik medeniyet merkizi yénidiki meshrep kéngishining re'isi tel'et nadirof, "Turan dunyasi" jem'iyetlik fondining re'isi karlin mexpirof, edliye xadimi shemshiqemer abdraxmanowa we bashqilar merkez pa'aliyiti heqqide öz pikirlirini otturigha qoydi hem sh. Nurumofning merkez re'isi wakalitini yene besh yilgha uzartish teklipini berdi. Yighin axirida yighin yeküni chiqirilip, qarar élindi. Uningda merkezning ötken qerel ichide yürgüzgen ishliri ijabiy bahalandi.

Radiyomiz ziyaritini qobul qilghan "Alamet" filim ishlesh merkizining mudiri qelbinur roziyéwa merkezning besh yilliq pa'aliyitini yuqiri bahalap, mundaq dédi: "Shahimerdan aka merkezning ishini janlandurup, medeniyet, ma'arip, sen'et, metbu'at, tenheriket saheliri boyiche köpligen mesililerni hel qilip, barche ammining könglidin chiqti. Mushu besh yil mabeynide ishligen ish-pa'aliyiti boyiche hésabatini yuqiri derijide ötküzüp, qayta teyinlendi. Yighin qatnashquchiliri bashliqimizni qollap-quwwetlep, ishigha nahayiti yuqiri bahalarni berdi, uninggha utuqlar tilidi we qayta saylan'ghanda héchqandaq qarshiliqlar bolmidi."

Q. Roziyéwa öz sözide sh. Nurumofni medeniyet merkizi bashqarmisi ezaliri we pütkül qazaqistanliq Uyghurlar namidin qizghin tebriklep, merkez ishigha utuqlar tilidi.

Igilishimizche, jumhuriyetlik Uyghur medeniyet merkizi bir nechche kéngeshlerdin terkib tapqan bolup, ularning pa'aliyiti merkez bashqarmisi teripidin qobul qilin'ghan ish pilanliri da'iriside élip bérilidu. Merkez yénida yigit bashliri kéngishi, alimlar kéngishi, xanim-qizlar kéngishi, Uyghur tilida bilim béridighan mektepler birleshmisi, edebiyat kéngishi, "Nuraniye anilar" kéngishi, yashlar kéngishi we bashqilar pa'aliyet élip barmaqta. Shundaqla mezkur medeniyet merkizining bashqimu sheherlerde ishlewatqan shöbiliri bolup, ular özlirining yighin'gha ewetken xetliride merkez ishining besh yilliq hésabatini qana'etlinerlik dep bahalaydighanliqini hem sh. Nurumofni yene bir qerelge dawamlashturush teklipini qollaydighanliqini bildürgen.

Qazaqistan Uyghurlirining jumhuriyetlik étno-medeniyet merkizining ijra'iye mudiri zuhrullam qurwanbaqiyéf jumhuriyetlik Uyghur medeniyet merkizining memliket boyiche 11 shöbisining mewjut ikenlikini, mesilen, uning astana bölümini rustem abdusalamofning bashqurup kéliwatqanliqini tekitlep, mundaq dédi: "Astanadimu merkezning nurghunlighan ishliri atqurulup kéliwatidu: medeniyet künliri, wetendin artislarni chaqirish, balilarni oqushqa ewetish we shuninggha oxshash nurghunlighan ishlarni ular pilan rétide élip bériwatidu. Her bir medeniyet merkizining muzéyliri bar. Shu muzéyda Uyghurlargha te'elluq milliy chalghu eswabliri, kiyim-kéchekler, edebiy kitablar qoyulghan. Mushular arqiliq sirttin kelgenler Uyghurlar heqqide melumatlar alidu."

Z. Qurwanbaqiyéf merkez ishlirining asasiy jehettin memliket prézidéntining qazaqistan xelqige yollighan mektupliri, programmiliri, muraji'etnamiliri da'iriside élip bériliwatqanliqini, medeniyet merkizining bügünki künde hökümet we xelq arisida köwrük xizmitini orunlawatqanliqini otturigha qoydi.

Toluq bet