Amérikidiki Uyghur jama'iti roza héytni birlikte tebriklidi

Roza héyt namizigha kelgen Uyghur jama'iti namazdin kéyinki kolléktip nashtida. 2017-Yili 25-mart, wirjiniye, amérika

Amérikaning paytexti washin'gton we uninggha qoshna jaylardiki Uyghur jama'iti 25-iyun küni bir yerge jem bolup, 2017-yilliq roza héytni birlikte kütüwaldi hemde öz-ara héytliq tileklirini bildürüsh bilen birge, wetini ichi we sirtidiki Uyghurlar üchün semimiy du'a-tilawet qilishti.

Yéqinqi yillardin buyan, amérikigha köchmen bolup kéliwatqan Uyghurlar sanining éship bérishigha egiship, Uyghur jama'iti birqeder merkezlik olturaqlashqan rayonlardin birnechchisi hasil bolushqa bashlidi. Amérikaning sherqiy qirghiqidiki wirjiniye we mariylend shtatliri ene shu xildiki asasliq merkezlerning biridur. Bu xildiki merkezlerning hasil bolushi öz nöwitide Uyghurlardek ijtima'iyliqqa adetlen'gen, shundaqla muhajirettiki pewqul'adde muhitta yashawatqan bir qowmning esirlerdin buyan dawam qilip kéliwatqan milliy bayramlirigha herqachan yéngi mezmunlarni qoshup kelmekte. Amérikaning wirjiniye shtatidiki fals church shehiride ötküzülgen bu yilqi roza héytni tebriklesh pa'aliyitide bu hal yene bir qétim öz ipadisini tapti.

Amérika Uyghur birleshmisi mes'ul bolup teshkilligen bu qétimqi rozi héyt tebrik pa'aliyiti 25-iyun küni seherde aldi bilen héytliq namazdin ilgiriki tekbir éytish bilen bashlandi. Top-top bolushup kéliwatqan Uyghur jama'iti xas Uyghurlar toplan'ghan zalgha jem bolup, tézla pa'aliyet zali namazgha kelgen erler we ayallar bilen toldi. Ariliqta amérika Uyghur birleshmisining re'isi élshat hesen ziyaritimizni qobul qilip, bu yilqi héytliq namazgha kelgen Uyghur jama'itining ötken yilqidinmu köp ikenlikini, buning bir sewebi amérikigha kéliwatqan Uyghurlarning köpiyiwatqanliqi bolsa, yene biri Uyghurlarning özlirige xas jama'etchilik ishlirining barghanséri köp Uyghur jama'itini öz etrapigha toplawatqanliqining netijisi ikenlikini bildürdi. Uningche, bu xildiki yighilish pa'aliyetliri muhajirettiki Uyghurlarning hazirqi shara'itida tolimu ehmiyetlik hésablinidiken.

Héytliq namazgha imamliq qilghan Uyghur diniy alimliridin nurdun hajim söz élip, namazgha kelgen Uyghur jama'itige ramizanning xasiyiti we berikiti heqqide qisqiche chüshenche berdi. Andin islam dinining ehkamlirida alahide tekitlinidighan birlik we ittipaqliq mezmunlirining muhajirettiki Uyghurlarning hazirqi müshkül shara'itida qandaq zor qimmetke ige ikenlikini, buning üchün ortaq menpe'et astida barliq Uyghurlarning zich ittipaqlishishining Uyghur dawasining axirqi ghelibisi üchün hel qilghuch ehmiyetke ige ikenlikini tekitlidi. U buning bir misali süpitide, muhajirettiki Uyghurlarning imkan bar, bashqa Uyghurlar bilen jama'et bolup héyt namizi oqushining zor ewzelliklerge ige bolidighanliqini tilgha aldi. Namazning axirida jama'et nurdun hajimgha egiship, wetendiki Uyghur qérindashlargha hemde shéhitlargha atap xalis du'a qildi.

Héyt namizigha kelgen Uyghur jama'itidin uchqun ependi özining Uyghur jama'iti bilen birge roza héytni tebriklewatqanliqidin tolimu söyünidighanliqini bildürgech, mushu pursettin paydilinip wetinidiki zulum astida ingrawatqan qérindashlirigha du'a qilishning muhimliqini tekitlidi.

Dunya Uyghur qurultiyining re'isi rabiye qadir xanim salametlik ehwali tüpeylidin héyt namizigha kélelmigen bolsimu, wetendiki Uyghurlargha roza héytliq salam yollashni untumidi.

Dunya Uyghur qurultiyining sabiq re'isi, muhajirettiki Uyghur jama'itining moysipitliridin erkin aliptékin ependimu gérmaniyedin téléfon ziyaritimizni qobul qilip, wetendiki Uyghurlargha özining héytliq salimini yetküzüp qoyushni hawale qildi. Shuningdek wetendiki Uyghurlarning héchqachan ümidsiz bolmasliqi lazimliqini jékilidi.

Rozi héytliq tebriki üchün yighilghan Uyghur jama'iti héytliq namaz we du'a-tileklerdin kéyin, bille nashta qilishti hemde qizghin tilekler ichide bir-birining héytini tebriklidi. Ziyaritimiz axirlashqanda bolsa, jama'etning aldi alliqachan öz-ara héytlishishni bashliwetken idi.