Amérika Uyghur jama'iti jem bolup noruzni tebriklidi

Muxbirimiz ümidwar
2018-03-25
Élxet
Pikir
Share
Print
Amérika Uyghur birleshmisi ötküzgen noruz pa'aliyitidin bir körünüsh. 2018-Yili 24-mart. Feyirfaks, amérika.
Amérika Uyghur birleshmisi ötküzgen noruz pa'aliyitidin bir körünüsh. 2018-Yili 24-mart. Feyirfaks, amérika.
RFA

Amérika Uyghurliri birleshmisi shenbe, yeni 24-mart küni amérika paytexti washin'gton shehiri yénidiki feyirfaks sheherchiside noruz pa'aliyiti ötküzdi. Texminen 300 din artuq kishi qatnashqan mezkur noruz pa'aliyiti aldi bilen sherqiy türkistan milliy marshi bilen bashlan'ghan bolup, kichik balilardin tartip, hemme kishi birdek halda ay yultuzluq kök bayraq aldida marsh axirlashquche öz sadaqitini bildürüshti. Uyghurlarning milliy en'enisi boyiche jama'et noruz éshigha éghiz tegdi. Wirginiye, mariland we bashqa shtatlardin a'ilisi we perzentliri bilen birge kelgen shuningdek Uyghur milliy kiyimlirini kiyishken Uyghur ata-anilar perzentlerning teyyarlighan ana tildiki shé'ir déklamatsiyeliri we bashqa türlük sen'et nomurliridin hozurlandi.

Pa'aliyetning échilish nutqini sözligen amérika Uyghurliri birleshmisining re'isi ilshat hesen ependi köpchilikke noruzluq salam yollap, ularning noruz bayrimini tebriklidi. U sözide؛ bu yilqi noruzning Uyghurlarning öz wetinide xitay kompartiyisi hakimiyitining qattiq siyasiy teqibleshlirige uchrap, insaniy erkinlikliridin we hoquqliridin ayrilghan, Uyghurlar diyarining üsti ochuq türmige aylinip, xelq nazaret astigha élin'ghan bir weziyetke toghra kelgenliki, emma shundaq bolushigha qarimay amérikidek hor dunyada yashawatqan Uyghurlarning bir arigha jem bolup, bir-birining noruzini tebriklishiwatqanliqini esletti. U sözide yene, Uyghurlarningmu özige-özi xoja bolghan künlirining haman bir küni kélidighanliqigha bolghan ümidini bildürdi. 

Köp yillardin béri her yili noruz pa'aliyetlirige qatniship kéliwatqan bir qisim Uyghurlarning éytishiche, amérika Uyghurliri birleshmisi teshkilligen bu yilqi noruzluq pa'aliyetke qatnashqan adem sani adettikidin köp bolghan shuningdek bu noruzluq pa'aliyette yash ösmürler we perzentlerning her xil sen'et, ussul, shé'ir déklamatsiyesi, muzika orundash qatarliq talantlirini we qizghinliqini namayan qilishqa köprek purset yaritip bérilgen.

Pa'aliyette yene 3-ayning 15-künidiki dunya yüzlük "Bir awaz bir qedem" ayallar namayishini teshkilligüchi roshen abbas we sureyye qeshqeri qatarliq xanim-qizlarning pidakarliq rohigha hörmet bildürülüp, ular we Uyghur ana tili mektipining oqutquchiliri hem bir qisim ösmürler teqdirlendi. 

Amérika Uyghurliri birleshmisi 1998-yili qurulghandin buyan her yili jumhuriyet küni, yéngi yil, noruz, ramzan we qurban héytqa oxshash ammiwi bayram pa'aliyetlirini teshkilleshkimu ehmiyet bérip kelmekte.

Toluq bet