Parizhdiki xelq'ara asare etiqe soda bazirida Uyghurlargha da'ir bir parche qedimiy süret sétilghan

Igilishimizche, 8-aprél firansiye paytexti parizh 9-rayondiki “Daghu xelq'ara asare etiqiler baziri” da Uyghurlargha da'ir bir parche qedimiy süret sétilghan.

Ziyaritimizni qobul qilghan parizh 9-rayondiki mezkur asare etiqiler soda baziridiki bayjan xanim Uyghurlargha da'ir süret heqqide toxtilip:“Bügün bazarda yipek shayi rextqe chüshürülgen, saz chélip olturghan bir Uyghur qizining süriti kim artuq qilip sétildi” dédi.

Yipek shayi rextge chüshürülgen, duttar chélip olturghan Uyghur qizining süritini kim artuq qilip sétish sodisigha qatnashqan, uzundin biri parizhdiki asare etiqe soda merkizide tijaret bilen shughulliniwatqan Uyghur sodigerlerdin exet eli hajim mezkur süret heqqide qisqiche uchur bérip ötti.

Exet eli hajimning éytishiche, parizh 9-rayondiki qedimiy asare etiqiler soda baziri xelq'aradiki eng büyük soda merkezliridin biri bolup, bu yerde her künlüki dégüdek dunyaning her qaysi jayliridin toplan'ghan asare etiliqer kim artuq qilip sétilidiken.

Yaponiyediki Uyghur ziyaliyliridin doktor turmuhemmet hashimning ilgiri sürüshiche, hazir tokyodiki qedimqiy asare etiqe soda merkezlirigimu qedimiy Uyghur gilemliri köplep qoyulghan bolup, Uyghur gilemliri tarixining uzunluqi, rengdarliqi we özgiche toqulush uslubi bilen yaponiyege keng tonulghan.

Parizhdiki asare etiqiler sodigiri exet eli hajimning bildürüshiche, mezkur soda bazirida yene tibetlik sodigerler özlirige a'it asare etiqilerni köplep sétiwalidiken.

Parizh 9-rayondiki mezkur xelq'ara asare etiqiler baziridin igilishimizche, yéqinda qedimqiy Uyghur yéziqida yézilghan “Tezkére'iy ewliya” namliq kitabning kopiy nusxisi bayqalghan bolup, hazir bir qisim asare etiqe sodigerliri mezkur kitabning esli nusxisini izdeshke kirishken.

Uyghur élida neshr qilin'ghan tarixiy kitablarda körsitilishiche, parizhdiki sherq tilliri mektipining türkiy tillar kafédrasini bashqurghan fransoz sherqshunas étén katrémér 1841-yilli parizhda “Sherqiy türk edebiyati xréstomatiyesi” ning birinchi qismini neshr qilghan bolup, uninggha nawayining “Muhakimetul lugheteyin” we “Tarixiy mülki ejem” namliq eserliri kirgüzülgen.

Yuqiriqi awaz ulinishidin tepsilatini anglang.