Австралийә шәрқий түркистан җәмийити уйғур мойсипитлириға хәйрхаһлиқ йәткүзүш чейи бәрди

Җәнубий австралийә ислам диний җәмийитиниң сабиқ рәиси диний алим абдусалам қариһаҗи вә австралийә шәрқий түркистан җәмийитиниң рәиси нурмуһәммәт түркистани йиғинда сөз қилмақта. 2016-Йили 14-январ, австралийә.

14-январ австралийәдә паалийәт елип бериватқан шәрқий түркистан җәмийити адилайтдики мәзкур тәшкилатниң мәркизидә уйғур мойсипитлириға хәйрхаһлиқ йәткүзүш чейи бәрди.

Австралийә шәрқий түркистан җәмийити адилайт шәһиридә яшаватқан яшанған уйғур мойсипитлириға маддий вә мәниви җәһәттин немиләрни қилип беришниң зөрүрлүки тоғрисида кеңишиш вә бу һәқтә әмәлий хизмәт қилип бериш үчүн 70 гә йеқин яшанған ата вә аниларни бир йәргә җәм қилип уларға чай бәргән.

Паалийәт әтигән саәт ондин чүштин кейин саәт иккигә қәдәр давам қилған.

Австралийә шәрқий түркистан җәмийитиниң адилайт шәһиридә өткүзүватқан уйғур мойсипитлириға хәйрхаһлиқ йәткүзүш чейи бериш паалийитидин телефон арқилиқ нәқ мәйдандин учур игилишимизчә, паалийәткә тәшкилат рәиси нурмуһәммәт түркистани риясәтчилик қилған болуп, паалийәт алди билән җәнубий австралийә ислам диний җәмийитиниң сабиқ рәиси диний алим абдусалам қариһаҗиниң қуран тилавити башланған.

Қуран тилавитидин кейин, абдусалам қариһаҗи һәдис шәрифтә ейтилған вә уйғур әнәнилиридә дейилгән яшанғанларни қандақ һөрмәтләш вә изәтләш тоғрисидики һекмәтлик пәнди-нәсиһәтләрдин қисқичә савақ берип өткән.

Зияритимизни қобул қилған австралийә шәрқий түркистан җәмийитиниң рәиси нурмуһәммәт түркистани бу қетимқи паалийәтниң асаслиқ мәқсити һәққидә тохталди.

Паалийәткә иштирак қилған австралийәдә һиҗрәттә яшаватқан вәтини ичи вә сиртида тонулған уйғур шаири әхмәт игәмбәрди паалийәт һәққидә тохталди.

Австралийә шәрқий түркистан җәмийити идарә һәйитиниң йеңи әзалиридин салаһидин паалийәттин алған тәсиратини баян қилди.

Паалийәт җәрянида зияритимизни қобул қилған адилайтдики уйғур мойсипитлиридин муһәммәд абдулла һаҗим австралийә шәрқий түркистан җәмийитиниң яш әзалириниң хизмәтлиридин өзиниң мәмнунлуқини билдүрди.

Адилайтдики ханим-қизлар вәкиллиридин зулфийә ханим паалийәтниң наһайити көңүллүк өткүзүлгәнликини илгири сүрүш билән биргә, австралийә шәрқий түркистан җәмийитиниң йетәкчиликидә йеқин кәлгүсидә адилайтдики яшларниң яшанған уйғур мойсипитлириға қилип беридиған бәзи бир әмәлий хизмәтлири тоғрисида қисқичә тохтилип өтти.

Мәлум болушичә, австралийә шәрқий түркистан җәмийити 1992-йили қурулған аммиви тәшкилат болуп, мәкзур тәшкилат қурулғандин буян, изчил һалда адилайтта яшаватқан уйғур пәрзәнтлиригә уйғур ана тилдин дәрс бериш, ислами билимләрдин савақ бериштәк паалийәтләрни елип берип, австралийәдики уйғур җамаитиниң уйғур өрп-адәтлирини вә ислами диний етиқадлирини сақлап қилиши үчүн бәлгилик дәриҗидә һәссә қошуватқан муһаҗирәттики нопузлуқ уйғур тәшкилатлиридин бири һесаблиниду.

Юқириқи аваз улинишидин тәпсилатини аңлаң.