Uyghur ösmür sen'etkarliri “Bir dunya öyi” sehniside

“Bir dunya öyi” de myunxén shehiridiki Uyghur ösmürliri sen'et nomurliri körsetmekte. 2016-Yili 16-iyul, gérmaniye.

16-Iyul küni “Bir dunya öyi” de myunxén shehiridiki Uyghur ösmürliri sen'et nomurliri körsitip alqishqa érishti.

Myunxén sheherlik chet'ellikler mejlisi, medeniyet idarisi qatarliq organlar yillardin buyan Uyghurlarning medeniy, ijtima'iy pa'aliyetlirini türlük shekillerde qollap kelmekte. Ular bu qétimmu mexsus Uyghurlar üchün “Bir dunya öyi” de bir sehne hazirlap bergen.

Her millet xelqliri teshkilatlirining pa'aliyet merkizi bolghan myunxéndiki “Bir dunya öyi” de 16-iyul küni kech sa'et 7 bilen bashlan'ghan bu pa'aliyetning muqeddimiside, aldi bilen Uyghurlarning kimliki, tarixi, medeniyiti hemde bügüni heqqide ishlen'gen sin filimi tamashibinlarning nezirige sunuldi.

Myunxén shehiridiki ishtin sirtqi Uyghur sen'et heweskarliri qatnashqan bu pa'aliyetke Uyghur foliklori tetqiqatchisi nurnisa xanim we usul ustazi xalise xanimlar yétekchilik qilghan bolup, ularning yétekchilikide orunlan'ghan Uyghur usulliri we Uyghur chöcheklirini asas qilghan nomurlar kishilerning zoqini keltürdi.

Uzun yillardin buyan gérmaniyede Uyghur sen'iti, medeniyiti boyiche tetqiqat we ijadiyet pa'aliyetliri bilen shughullinip kelgen nurnisa xanim neq meydanda ziyaritimizni qobul qilghanda, aldi bilen ötken bir yil ichide élip barghan pa'aliyetliridin qisqiche melumat bérip ötti. U sözide, bu yilning axirighiche gérmaniyening her qaysi jaylirida köpligen pa'aliyetlerni élip baridighanliqini, ilgiriki yillargha qarighanda pa'aliyetlirining sanining yildin ‏-yilgha éship bériwatqanliqini we gérmaniyede téximu köp qollashqa, qiziqishqa érishiwatqanliqini tilgha aldi.

Bu qétimqi sen'et pa'aliyitimu gérmaniyede her millet xelqining Uyghurlargha bolghan qiziqishi yenimu kücheygen bir chaghda ötküzüldi. Bu pa'aliyette, Uyghur ösmürlirining körsetken türlük nomurliri tamashibinlarni yene bir qétim jelp qildi. Uyghurlarning meyli qiyapet, meyli medeniyet, meyli til we tarix jehettin xitay bilen qilche ortaqliqi bolmighan bir millet ikenlikini namayan qilishni, Uyghur medeniyitini dunyagha tonutushni asasiy meqset qiliwatqanliqini eskertken usul yétekchisi xalise xanim ziyaritimizni qobul qilghanda, sen'et arqiliq Uyghurni tonutushning istiqbalidin zor ümidwar ikenlikini bayan qildi.

Gérmaniyediki Uyghur ziyaliyliridin ilchin ependi bu heqte ziyaritimizni qobul qilghanda bolsa, özining bu pa'aliyettin köp memnun bolghanliqini tilgha élish bilen birge, téximu köp Uyghur jama'itining bu pa'aliyetlerni qizghin qollishi kéreklikini tekitlidi.

Pa'aliyetke qatnashqan Uyghur ösmürliri qoyuq milliyche sen'et kiyimlirini kéyishken bolup, ular orunlighan nepis usullar muhajirettiki Uyghurlargha heqiqetenmu Uyghur tupraqliridiki sen'et sehnilirini eslitetti. Pa'aliyet xatimiside, Uyghurlar ixtiyariy usulgha chüshüp, sehnide janliq bir bayram keypiyati yaratti.