Әнқәрәдә өткүзүлгән икки паалийәттә уйғурларға орун берилди

Ихтиярий мухбиримиз әркин тарим
2015-12-22
Share
turkiy-milletler-kultur-oyi.jpg Әнқәрәниң саяһәт районлиридин бири болған әнқәрә қәләсидә ечилған "түркий милләтләр күлтүр өйи" дә паалийәт елип берилмақта. 2015-Йили 20-декабир.
RFA/Erkin Tarim

19-, 20 ‏- декабир күнлири арқа-арқидин өткүзүлгән икки паалийәттә уйғурларму тонутулди. Әнқәрәниң саяһәт районлиридин бири болған әнқәрә қәләсидә "түркий милләтләр күлтүр өйи" ечилди. 19-Күни әнқәрә көлбеши районида өткүзүлгән түрк дуняси шаир вә сәнәтчиләр учришишиға ирақ, сепрус, әзәрбәйҗан вә түркийә қатарлиқ дөләтләрдин кәлгән шаир вә сәнәтчиләр қатнашқан болуп, уйғур шаирә нурәла көктүрк ханим билән һамут көктүрк әпәндиләрму қатнашти вә сөз қилди. Бу иккила паалийәткә әзәрбәйҗан парламент әзаси пашайәва ханим, профессор доктор ханим халилова, қиримлиқ татар шаирә мәрйәм башқурт вә сафийә олгун, ирақлиқ язғучи шәмсәттин күзәчи қатарлиқ кишиләр қатнашти вә сөз қилди.

Мәркизи әнқәрәдә турушлуқ бирләшкән йүрәкләр җәмийити билән кәркүк күлтүр мәркизи ортақ уюштурған түрк дуняси шаир вә сәнәтчиләр учришиши җәрянида 20-декабир күни әнқәрә қәләсидә түркий милләтләр күлтүр өйиниң ечилиш мурасимиму өткүзүлди. Бу мурасимға уйғурларға вакалитән шаирә нурәла көктүрк ханим, һамут көктүрк әпәнди, азадҗан буғра әпәнди вә абдурешит қарлуқ әпәндиләр қатнашти. Мәзкур өйгә дуняниң һәрқайси җайлиридики түркий милләтләрниң мәдәнийәт буюмлиридин өрнәкләр қоюлған болуп, уйғурларниң көк байриқи, уйғур кийим-кечәклири вә уйғурлар түркийәдә нәшр қилдурған китаб вә журналларму қоюлған. Ечилиш мурасимида сөз қилған бирләшкән йүрәкләр җәмийитиниң рәиси ясәмин мәйданниң ейтишичә, мәзкур күлтүр өйи түрксой йәни хәлқара күлтүр тәшкилати вә түрк дуняси мәдәнийәт, сәнәт мунбириниң иқтисадий ярдими билән ечилған болуп, күлтүр өйидә түркий милләтләрниң мәдәнийәт, сәнити әкс әттүрүлгән буюмлар көргәзмә қилинғандин сирт, түркий милләтләр тонутулған доклат бериш йиғинлири уюштурулидикән.

Биз бу паалийәтләр һәққидә көз қаришини игиләш үчүн һамут көктүрк әпәнди вә азадҗан буғра әпәндиләр билән сөһбәт елип бардуқ. Азадҗан буғра әпәнди әнқәрәниң әң муһим саяһәт райони болған әнқәрә қәләсидә түркий милләтләр күлтүр өйиниң ечилишиниң уйғур дәваси үчүн зор пайдилиқ икәнликини баян қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт