Enqerede ötküzülgen ikki pa'aliyette Uyghurlargha orun bérildi

Ixtiyariy muxbirimiz erkin tarim
2015-12-22
Share
turkiy-milletler-kultur-oyi.jpg Enqerening sayahet rayonliridin biri bolghan enqere qel'eside échilghan "Türkiy milletler kültür öyi" de pa'aliyet élip bérilmaqta. 2015-Yili 20-dékabir.
RFA/Erkin Tarim

19-, 20 ‏- dékabir künliri arqa-arqidin ötküzülgen ikki pa'aliyette Uyghurlarmu tonutuldi. Enqerening sayahet rayonliridin biri bolghan enqere qel'eside "Türkiy milletler kültür öyi" échildi. 19-Küni enqere kölbéshi rayonida ötküzülgen türk dunyasi sha'ir we sen'etchiler uchrishishigha iraq, séprus, ezerbeyjan we türkiye qatarliq döletlerdin kelgen sha'ir we sen'etchiler qatnashqan bolup, Uyghur sha'ire nur'ela köktürk xanim bilen hamut köktürk ependilermu qatnashti we söz qildi. Bu ikkila pa'aliyetke ezerbeyjan parlamént ezasi pashayewa xanim, proféssor doktor xanim xalilowa, qirimliq tatar sha'ire meryem bashqurt we safiye olgun, iraqliq yazghuchi shemsettin küzechi qatarliq kishiler qatnashti we söz qildi.

Merkizi enqerede turushluq birleshken yürekler jem'iyiti bilen kerkük kültür merkizi ortaq uyushturghan türk dunyasi sha'ir we sen'etchiler uchrishishi jeryanida 20-dékabir küni enqere qel'eside türkiy milletler kültür öyining échilish murasimimu ötküzüldi. Bu murasimgha Uyghurlargha wakaliten sha'ire nur'ela köktürk xanim, hamut köktürk ependi, azadjan bughra ependi we abduréshit qarluq ependiler qatnashti. Mezkur öyge dunyaning herqaysi jayliridiki türkiy milletlerning medeniyet buyumliridin örnekler qoyulghan bolup, Uyghurlarning kök bayriqi, Uyghur kiyim-kéchekliri we Uyghurlar türkiyede neshr qildurghan kitab we zhurnallarmu qoyulghan. Échilish murasimida söz qilghan birleshken yürekler jem'iyitining re'isi yasemin meydanning éytishiche, mezkur kültür öyi türksoy yeni xelq'ara kültür teshkilati we türk dunyasi medeniyet, sen'et munbirining iqtisadiy yardimi bilen échilghan bolup, kültür öyide türkiy milletlerning medeniyet, sen'iti eks ettürülgen buyumlar körgezme qilin'ghandin sirt, türkiy milletler tonutulghan doklat bérish yighinliri uyushturulidiken.

Biz bu pa'aliyetler heqqide köz qarishini igilesh üchün hamut köktürk ependi we azadjan bughra ependiler bilen söhbet élip barduq. Azadjan bughra ependi enqerening eng muhim sayahet rayoni bolghan enqere qel'eside türkiy milletler kültür öyining échilishining Uyghur dewasi üchün zor paydiliq ikenlikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet