Finlandiyediki Uyghurlarning hayati we pa'aliyetliri (1)

Ixtiyariy muxbirimiz oghuzxan
2017-11-27
Élxet
Pikir
Share
Print
Finlandiye sherqiy türkistan jem'iyiti dunya kültür féstiwaligha qatnashti. 2012-Yili may. Finlandiye.
Finlandiye sherqiy türkistan jem'iyiti dunya kültür féstiwaligha qatnashti. 2012-Yili may. Finlandiye.
RFA/Erkin Tarim

Finlandiye shimaliy yawropagha jaylashqan güzel bir dölet. Bu elde ilgiri soda-tijaret yaki bashqa sewebler bilen kelgen az sandiki Uyghurlar bolghan bolsimu, emma köp sandiki Uyghurlar 1990-yillarning axirliri we 2000-yillarning bashlirida kélip olturaqlashqan.

Hazir finlandiyede yashaydighan Uyghurlar texminen 200 etrapida bolup, yawropadiki bashqa ellerge, bolupmu shimaliy yawropadiki shiwétsiye yaki norwégiyege sélishturghanda sani xélila az. Shundaq bolushigha qarimay, finlandiyediki Uyghur jama'iti özliri qurghan teshkilatlar etrapigha uyushup, Uyghurlarning milliy kimlikini saqlash we jama'etlik ishliri ilgiri sürüsh üchün bir kishilik hessisini qoshmaqtiken.

Finlandiye paytexti xélsinkidiki sherqiy türkistan jem'iyitining re'isi obulqasim haji bu heqte ziyaritimizni qobul qilip, finlandiyede yashawatqan Uyghur jama'itining hayati we jem'iyetlerge uyushush ehwalini anglatti.

Uning bildürüshiche, Uyghurlar 1990-yillarning axirliridin bashlap, finlandiyege kélip olturaqlishishqa bashlighan iken. Hazirqi sani 200 etrapida iken. Finlandiyediki Uyghur jama'iti 2004-yili xélsinkida finlandiye sherqiy türkistan jem'iyitini qurghan bolup, shundin kéyin, bu jem'iyetning etrapigha uyushup, finlandiye parlaménti we bashqa orunlarda Uyghur mesilisini anglitip kelgen iken. Kéyinki yillarda finlandiyede yene "Uyghur medeniyet merkizi" namliq yene bir jem'iyet qurulghan bolup, bu jem'iyet qarmiqida Uyghur balilirigha ana til dersi we din terbiyesi élip bérilghan iken. Undin bashqa yene Uyghur medeniyitini finlandiye xelqige tonushturush ishlirimu élip bérilmaqtiken.

Finlandiye Uyghur medeniyet merkizide aktip pa'aliyet élip bériwatqan muhemmet eli hajimmu ziyaritimizni qobul qilip, mundaq dédi: "Finlandiyediki Uyghurlar paytext xélsinkini asas qilghan halda tarqaq olturaqlashqan. Sanimiz hazirche 200 etrapida bolsa kérek. Finlandiyede Uyghur jama'iti qurghan ikki teshkilat - finlandiye sherqiy türkistan jem'iyiti bilen finlandiye Uyghur medeniyet merkizi 2004-yilidin buyan siyasiy, ijtima'iy, medeniyet pa'aliyetlirini élip barmaqta. Biz kéyinki waqitlarda mexsus orun élip, balilirimizni ana til we bashqa jehetlerdin terbiyeleydighan ishlarnimu élip barduq. Epsuski, sanimiz az, her jaylargha tarqaq olturaqlashqan bolghachqa kéyinki yillargha kelgende bu pa'aliyetlerni izchil dawamlashturushqa imkanimiz dégendek yar bermeywatidu…"

Axirida finlandiyede yashawatqili 13 yil bolghan isma'il hajimmu ziyaritimizni qobul qilip, munularni bildürdi: "Men wetendin chiqqili 13 yil boldi. Shundin béri finlandiyede yashawatimen. Hazir dölet qarmiqidiki bir taksi shirkitide ishlewatimen. Xizmitim yaxshi. Balilirimning chongliri gimnaziyumni püttürüp, uniwérsitétqa oqushqa kirdi. Kichikliri téxi bashlan'ghuchta oquwatidu. Biz turuwatqan sheherde on nechche Uyghur a'ilisi yashaymiz. Adette héyt-ayem we dem élishlarda yighilip uchrishimiz. Omumen, milliy kimlikimiz, mewjutluqimiz we balilirimizning kélechiki üchün qolimizdin kélishiche tirishiwatimiz."

Toluq bet