Gérmaniyediki Uyghur jama'iti miyunxénda noruz pa'aliyiti ötküzdi

Ixtiyari muxbirimiz ekrem
2018-03-26
Élxet
Pikir
Share
Print
Gérmaniyediki Uyghur jama'iti 2018-yilliq noruzni birlikte tebriklidi
Gérmaniyediki Uyghur jama'iti 2018-yilliq noruzni birlikte tebriklidi
RFA/Ekrem

25-Mart küni gérmaniyediki Uyghur jama'iti myunxén shehiride daghdughiliq  noruz pa'aliyiti ötküzdi.

Dunya Uyghur qurultiyining yardimi we qollishi, "Yawrupa sherqiy türkistan birliki" ning orunlashturushi bilen 25-mart küni chüshtin kéyin gérmaniyening myunxén shehiride ötküzülgen noruz pa'aliyitige myunxén we yéqin etraptiki sheherlerdin kelgen köpligen Uyghurlar qatnashti. Myunxéndiki bir qisim kishilik hoquq teshkilatlirining mes'ulliri we türk teshkilatlirining wekillirimu bu pa'aliyetke teklip bilen qatnashti.

Noruz pa'aliyiti aldi bilen "Sherqiy türkistanning istiqlal marshi" ni orunlash bilen bashlandi. Yüzligen Uyghur jama'iti orunliridin turushup, qollirini köksige qoyup, "Istiqlal marshi" gha bolghan hörmitini bildürdi.

Pa'aliyette Uyghurche milliy ussul kiyimlirini kiygen miyunxéndiki yash-ösmürlerning orunlishida noruzluq türlük sen'et nomurliri körsitildi. Xitay hökümitining Uyghur élida nöwette yürgüziwatqan qattiq basturush siyasitini eyipleydighan nutuq we pikirler bayan qilindi. Gollandiyedin teklip qilin'ghan sazendilerning mungluq naxshiliri, Uyghur ösmürlirining güzel ussulliri we letipiliri dillarni söyündürse, Uyghur siyasiy aktiplirining tesirlik sözliri milliy rohni urghutti.

Mezkur pa'aliyetni orunlashturghan "Yawrupa sherqiy türkistan birliki" ning re'isi turghunjan alawudun bu xususta neq meydanda ziyaritimizni qobul qilghanda bu qétimqi noruz pa'aliyitining noqul bir bayramla emes, belki milliy rohni terbiyileydighan ders bolghanliqini tekitlidi.

Bu qétimliq noruz pa'aliyitige "Gollandiye Uyghur ansambili" ning sazendiliri, myunxéndiki xalise xanimning sen'et guruppisidiki ussulchilar we miyunxéndiki ana til mektipining oqughuchiliri mexsus teyyarlighan sen'et nomurlirini körsetti. Ular orundighan nomurlarda weten muhebbiti, milliy tuyghu, kök bayraqqa bolghan söygü hemde xitay hakimiyitige bolghan nepretler ekis ettürüldi. Pa'aliyetke ishtirak qilghan Uyghur jama'iti sorundiki yoqiri milliy keypiyattin hozur hés qilishqanliqlirini tilgha élishti. Noruz ötküzülgen zalmu kök bayraqlar we Uyghur milliy bézekliri bilen bézelgen idi.

Miyunxénda ötküzülgen bu noruz pa'aliyitige riyasetchilik qilghan perhat yorungqash ependimu özining bu qétimliq noruzning mezmunigha bolghan memnuniyetlirini izhar qildi. Alayiten gérmaniyening wurtzburg shehridin kelgen Uyghur siyasiy zatliridin erkin aliptékin ependimu bu pa'aliyette söz élip, Uyghur jama'itige bolghan noruzluq tileklirini izhar qilip ötti.

4 Sa'et dawam qilghan noruz pa'aliyitining xatimiside sözge teklip qilin'ghan dunya Uyghur qurultiyining re'isi dolqun eysa ependi bu pa'aliyetke ishtirak qilghan Uyghur jama'itining noruz bayrimini tebriklidi. U yene gérmaniyediki Uyghur jama'itini 4-ayning 27-küni bélgiye paytexti biryussélda ötküzilidighan 5 ming kishilik namayishqa pa'al awaz qoshushqa chaqirdi.

Toluq bet