Германийәдә “өтмүшни сеғиниш” намлиқ сәнәт кечилики өткүзүлди

Ихтиярий мухбиримиз әкрәм
2016-11-11
Share
germaniye-otmushni-seghinish-2016.jpg “өтмүшни сеғиниш” намлиқ сәнәт кечиликидин бир көрүнүш
RFA/Ekrem


11-Ноябир күни германийәниң мюнхен шәһиридә уйғур фоликлори тәтқиқатчиси нурниса ханимниң “өтмүшни сеғиниш” намлиқ сәнәт кечилики өткүзүлди.

Уйғурларни узун йиллардин буян уйғур мәдәнийити вә сәнити арқилиқ германийә хәлқигә тонутушни өзиниң муһим вәзипилири қатарида тутуп кәлгән уйғур фоликлори тәтқиқатчиси, германийә уйғур аяллири комитетиниң рәиси нурниса ханим 11-айниң 11-күни мюнхен шәһәрлик мәдәнийәт идарисиниң қоллиши билән өзиниң “өтмүшни сеғиниш” темисидики сәнәт кечиликини мувәппәқийәтлик өткүзди.

Мюнхен шәһәрлик мәдәнийәт идариси залида өткүзүлгән бу кечиликкә көп санда уйғур вә чәтәллик меһманлар тамашибин сүпитидә қатнашти. Мюнхен шәһиридики уйғур пәрзәнтлириниң усул йитәкчиси халисә ханим тәрбийилигән яш өсмүр усулчилар һәмдә нурниса ханим уйғур еғиз әдәбияти бойичә тәрбийилигән өсмүр балилар бу қетимқи кечиликтә сап уйғурчә тил вә кейимләр билән номур көрситип, тамашибинларниң алқишиға еришти.

Мюнхен мәдәнийәт идарисиниң паалийәт залида, бу күни мюнхенда яшаватқан һәр милләт кишилириниң сәнәт номурлириму орунланди. Уйғурларға аҗритип берилгән вақитни уйғур сәбилириниң түрлүк омақ сөз-һәрикәтлири вә яш-өсмүрләрниң уйғурчә нәпис усуллири һәмдә нахшилири билән тәсирлик бир шәкилдә өткүзгән нурниса ханим, бу паалийәтниң үнүми үчүн бир қисим уйғур сазәндиләрни қошна әлләрдин тәклип қилип кәлтүргән иди. Алайитән голландийәдин кәлгән уйғур сазәндиси камил аббас әпәнди вә башқа сәнәткарлар “өтмүшни сеғиниш” темисидики бу сәнәт кечиликиниң мувәппәқийити үчүн һәссиләр қошти. Нурниса ханим бу паалийәтләр мунасивити билән зияритимизни қобул қилғанда, өзиниң йүрәк сөзлирини һаяҗанлиқ ибариләр билән ипадә қилди.

Мюнхен шәһиридики уйғур җамаити, д у қ хадимлири һәмдә яврупа шәрқий түркистан бирлики тәшкилатиниң рәһбәрлири 13-ноябир күни өткүзилидиған икки җумһурийәтни хатириләш вә рабийә ханим тәвәллутиниң 70 йиллиқини қутлуқлаш, “уйғур миллий дәвасини күчләндүрүшниң истратегийилик йоллири” темисида сөзлинидиған лексийә ишлирини орунлаштуруш қатарлиқ мурасимларға тәйярлиқ қилиш, шундақла чәтәлләрдин бу мурасимларға қатнишиш үчүн келиватқан меһманларни күтивелиш ишлири билән алдираш болуп, 11-айниң 11-күни өткүзүлгән бу паалийәткә толуқ қатнишалмиған болсиму, нурниса ханим вә халисә ханимларниң бу хилдики мәдәний паалийәтләр арқилиқ уйғурларни тонутуш хизмитигә юқири баһалар бәрди. яврупа шәрқий түркистан бирлики тәшкилатиниң рәиси әсқәрҗан әпәнди мана булардин биридур.

11-Ноябир өткүзүлгән “өтмүшни сеғиниш” темисидики сәнәт кечиликигә қатнишиш пурситигә еришкән бир қисим уйғурларму бу паалийәттин һасил қилған тәсиратлирини баян қилишти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт