Gherb dunyasidiki Uyghurlar (6A)

Muxbirimiz qutlan
2016-06-28
Élxet
Pikir
Share
Print
Shiwétsiye paytexti sitokholmdiki karoliniska institutining börek késellikliri bölümi doxturi aman'gül qasim, 2016-yil yanwar, stochkholm.
Shiwétsiye paytexti sitokholmdiki karoliniska institutining börek késellikliri bölümi doxturi aman'gül qasim, 2016-yil yanwar, stochkholm.
RFA/Qutlan

Birinchi qisim: muweppeqiyet üchün töligen bedeller

Muhajiret hayatini yashawatqan köpligen Uyghurlar shuninggha ishiniduki, chet'ellerde, bolupmu ikkinchi weten süpitide yerleshken yat ellerde put dessep turushning özi nurghun bedel telep qilidu.

Uyghur muhajirlar gherb dunyasidiki eng yash bir ijtima'iy topluq bolushigha qarimay, özliri yerleshken ikkinchi wetinide mewjut bolup turush, herkim özi shughulliniwatqan kespiy sahelerde bir kishilik orun tutush üchün heqiqetenmu zor bedellerni tölidi.

Derweqe, yat tupraqtiki herqandaq bir muweppeqiyet yaki érishish bedelsiz bolmaydu. Shiwétsiyening eng dangliq doxturxaniliridin biri bolghan karoliniska institutining börek késellikliri bölümide doxtur bolup ishlewatqan aman'gül qasim kespiy muweppeqiyetning bedelsiz bolmaydighanliqini öz emeliyiti arqiliq körsetken Uyghurlarning biri.

Aman'gül qasim bu yil yanwarning soghuq bir yekshenbe küni sitokholmdiki öyide ziyaritimizni qobul qilghanda özining kespiy izdinish yolida töligen bedelliri heqqide tunji qétim éghiz achti.

U uzaq mezgillik japaliq jeryanlardin kéyin shimaliy yawropadiki bu eng aliy méditsina institutida aq xalatni kiygen minutlirida özining bir doxtur bolupla qalmastin, belki yene her bir söz-herikitide hem Uyghurlargha hem musulmanlargha wekillik qilidighanliqinimu chongqur hés qilidu.

Abdurehimjan gollandiyede yashawatqan nechche yüzligen Uyghur yashlirining biri.

Teqdirning soghuq shamalliri uni öz wetinidin ayrip atlantik okyanning boyidiki bu kichik elge élip kelginide, u özining bashqa herqandaq bir musapirgha oxshash bu yat elde bir mehellik téngirqash, ganggirash we tipirlash jeryanini béshidin ötküzgenlikini esleydu. Halbuki, u eng qiyin künlerdimu özi yaxshi körgen kesip saheside oqush we bir kishilik orun tépish yolidin esla waz kechmigenlikini alahide tekitleydu.

Abdurehimjan gollandiyediki kespiy oqushini tamamlighandin kéyin, téximu emeliy we téximu riqabetke tolghan xizmet izdesh jeryanini bashlaydu. U bu jeryanda nechche yüzligen orunlargha iltimas yazghanliqini, nechche onlighan shirketlerdin yüzturane körüshüshke chaqirtilghanliqini, emma her qétimda shallinip mangghanliqini tilgha alidu.

U axirqi hésabta ghelibe qilidu. Yérim yolda hergizmu toxtap qalmaydu. Gollandiyening utréxt shehiridiki bir chong shirketke resmiy tetqiqatchi xadim bolup ishqa chüshkinide özining az bolmighan bedeller arqiliq bu orun'gha érishkenlikini eslime qilidu.

Abdurehimjan özining gollandiyede köngüldikidek bir xizmet ornigha érishishide tinimsiz izdinish, bel qoyuwetmeslik, her qétimliq meghlubiyettin ümidsizlik emes, belki téximu zor tejribe we küch élishtek rohining muhim rol oynighanliqini ilgiri süridu.

Méditsina penliri doktori hawaxan raxman shimaliy yawropadiki birqanche dölette tébbiy sahede japaliq izdinish we tetqiqat élip barghan Uyghur ayallirining biri.

U özining kespiy jehettiki izdinish yoli heqqide eslime qilghinida, nöwette shiwétsiye paytexti sitokholmdiki karoliniska institutining sélishturma dorigerlik bölümide élip bériwatqan méditsina tetqiqati toghriliq alahide toxtilidu.

Doktor hawaxan rahman özining shimaliy yawropadiki tetqiqat hayatida duch kelgen qiyinchiliqliri heqqide sözliginide noqul kespiy sahediki qiyin ötkellerdin sirt yene til ötkellirining, jümlidin méditsina saheside ishlitilidighan kespiy in'gliz tili, daniye tili, shiwét tili norwég tili qatarliq tosalghularghimu duch kelgenlikini bayan qilidu.

Shimaliy yawropadiki birqanche döletning méditsina institutlirida on nechche yildin buyan tetqiqatchi bolup ishlewatqan doktor hawaxan raxman oxshimighan döletlerning oxshimighan til muhitigha qandaq qilip maslashqanliqi we til qiyinchiliqlirini qandaq qilip yenggenliki heqqide anglarmenlerge hékaye teqdim qilidu.

(Dawami bar)

Toluq bet