Голландийәдики “күлтүр йәрмәнкиси” дә уйғур мәдәнийити парлиди

2015 - Йили 14 - май пәйшәнбә күнидин башлап голландийәниң үтрехт шәһиридики ярибүрс йәрмәнкә сарийи түркий милләтләрниң һәмкарлиқида елип бериватқан “күлтүр йәрмәнкиси” паалийити билән җанлинип кәтти.

4 Күнлүк бу паалийәтни җанландуруватқан түркий милләтләрниң намайәндилири қатарида явропа шәрқий түркистан маарип җәмийитиниң авангартлири бу пурсәтни чиң тутуп һәм дәрдини аңлитиш һәм иқтисадий керим қилиш үчүн тиришмақта.

Зияритимизниң қобул қилған мәһмудҗан турсун әпәнди, мәзкур паалийәтниң 2 күнлүк тәпсилатини һес қилған туйғулири билән радио аңлиғучилиримизға аңлатти. Мәрйәм ханим голландийәдики ханим - қизларниң бу паалийәт үчүн көп күч чиқарғанлиқини билдүрди.

Һүсәйин тәҗәлли әпәнди болса, явропа шәрқий түркистан маарип җәмийитиниң йиллардин бири бу хил паалийәткә қатнишиштики мәқсәт ғайиси һәққидә қисқичә изаһат бәрди.

Бу паалийәт иштиракчи милләтләрниң күлтүр - мәдәнийити, өрп - адити, кийим - кечәк, йемәк - ичмәк вә сәнәтлирини намаян қилиш; түрлүк саһәләрниң чоң - кичик тиҗарәтчилири вә ширкәт мәһсулатлири базар тепивелиш; хәлқ аммиси еһтияҗлиқ нәрсилирини сетивелиш билән биргә көңүл ечип зиярәт қилиштәк алаһидилики билән йиллардин бери херидар җәлп қилип кәлмәктә.