Голландийәдики йәрмәнкидә уйғур мәдәнийити намаян қилинмақта

Голландийиниң дәнбош вилайитидики брабантһалин йәрмәнкә мәркизидә ечилған төт күнлүк “мәдәнийәт - күлтүр йәрмәнкиси” паалийитигә уйғурларму қатнашмақта.

Голландийидики явропа шәрқий түркистан маарип җәмийити брабантһалин йәрмәнкә мәркизидә орунлаштурулған “мәдәнийәт - күлтүр йәрмәнкиси” дә түрк системисидики милләтләр қатарида уйғур мәдәнийитини намаян қилмақта.

“мәдәнийәт - күлтүр йәрмәнкиси” паалийитигә қатнишиватқан явропа шәрқий түркистан маарип җәмийитиниң вәкили әйса қариһаҗим йәрмәнкиниң уйғурларни тонутушта муһим әһмийәткә игә икәнликини билдүрди вә дуняниң һәрқайси җайлирида яшаватқан уйғурларни өзлири турушлуқ дөләтләрдә күчиниң йетишичә уйғурлар мәдәнийитини тонуштурушқа чақирди.

29 - Апрел явропа шәрқий түркистан маарип җәмийити мәркизидә учрашқан түрк системисидики җәмийәтләрниң вәкиллири бу хил паалийәтләрдә бирлик вә баравәрлик шоари билән һәмкарлишидиғанлиқини билдүргән иди. “мәдәнийәт - күлтүр йәрмәнкиси” паалийити әнә шу бирликниң тунҗи мәһсулати сүпитидә реаллиққа айланди.

9 - Май дин 12 - майғичә 4 күн давам қилидиған бу паалийәт түрк, татар, ноғай, өзбек, уйғур, түркмән қатарлиқ милләтләрниң түрк дуняси мәдәнийәтлири тонуштуруш мәқсәт қилинған паалийәт болуп, голландийә хәлқиниң язлиқ арам елиш күнлирини мәнилик өткүзүшкә түрткилик рол ойнап кәлмәктә. Шу сәвәбтин һөкүмәт тәрәпму бу хил паалийәтләрни кәң қанат яйдурушқа мәдәт берип кәлмәктә.

Уйғурлар голландийидики муһаҗирлиқ тарихиниң қисқа вә шараитлириниң йетәрлик болмаслиқиға қаримай, бу хил орунларда миллий хаслиқини намаян қилишқа алаһидә әһмийәт берип кәлмәктә.