Гуннар ярриң намидики мәркизий явроасия илмий йиғмисиниң рәқәмлик амбири илим саһәсигә ечиветилди (1)

Мухбиримиз қутлан
2015-12-16
Share
turkiye-gunnar-jarring-yarring-tor-beket-ilmiy-ambar.jpg Истанбулдики шиветсийә тәтқиқат иниститутида тәсис қилинған гуннар ярриң намидики мәркизий явро-асия рәқәмлик кутупханисиниң тор бәтидин бир көрүнүш
RFA/Qutlan


Мәшһур дипломат, дуняға даңлиқ уйғуршунас гуннар ярриңниң тиришчанлиқи вә униң бир өмүр топлиған материяллири асасида шиветсийә кутупханилирида уйғурларға даир муһим илмий йиғмилар шәкилләнгән.

Игилишимизчә, гуннар ярриңниң вапатидин кейин стокһолм университетиниң шәрқ тиллири факултетида қурулған гуннар ярриң йиғмиси 2012 - йили истанбулдики шиветсийә тәтқиқат иниститутиға көчүрүлгән.

Йеқинда мәзкур йиғминиң рәқәмлик (диҗиталлиқ) амбири ясилип, гуннар ярриң топлиған уйғур тил - йезиқидики қолязмилар вә классик мәнбәләрниң еликтиронлуқ нусхиси торға қоюлған.

Бу илмий йиғма нөвәттә дуняниң һәрқайси җайлирида уйғуршунаслиқ тәтқиқати билән шоғуллиниватқан билим адәмлириниң күчлүк диққитини қозғимақта.

Истанбулдики шиветсийә тәтқиқат институти шиветсийә падишаһлиқ пәнләр академийәси қармиқидики бир илмий тәтқиқат орни. Бу институт шиветсийә падишаһлиқиниң осман султанлиқи заманисида истанбулға қурған әлчиханисиниң кона қорусидин орун алған болуп, 250 йилдин бери шиветсийәниң игидарчилиқида болуп кәлгән.

Игилинишичә, 2012 - йили истанбулдики шиветсийә тәтқиқат иниститути мәшһур түрколог вә уйғуршунас гуннар ярриңниң стокһолм университетида сақлиниватқан китаб - материяллирини өткүзүвалған. Шуниң билән бир вақитта улар йәнә швед миссионерлири әйни чағда қәшқәрдики басмиханисида басқан зор түркүмдики уйғурчә китаб - материялларни топлап, мәркизий явроасия рәқәмлик кутупханисиниң тор амбирини қуруп чиққан.

Мәлум болушичә, уйғур тәтқиқати билән шуғуллинидиған һәрқандақ киши мәзкур институтниң тор бетигә кирип, <http://www.srii.se/Jarring> Дегән адрестин бу материялларни көрәләйдикән.

Биз бу һәқтә мәлумат елиш үчүн истанбулдики шиветсийә тәтқиқат иниститутида ярдәмчи тәтқиқатчи болуп ишләватқан патрик хәлзон әпәнди билән сөһбәт өткүздуқ. У радийомизниң уйғур тилидики зияритимизни қобул қилди.

Униң билдүрүшичә, һазир мәзкур йиғмида гуннар ярриң топлиған 5 миң парчидин артуқ китаб - материял вә қиммәтлик қолязмилар сақланмақтикән. Өткән йилидин буян мәзкур йиғмидики бир қисим материялларниң еликтронлуқ нусхиси ясилип, рәқәмлик кутупхана шәклидә торға қоюлушқа башлиған икән.

Патрик хәлзон мәзкур йиғмидики бир қисим қолязмиларниң йеқинқи заман уйғур тарихи, мәдәнийити вә тил - йезиқини тәтқиқ қилишта интайин муһим қиммәткә игә икәнликини, бәзи уйғурчә қолязмиларниң дунядики йиганә нусхисиниң бу йәрдә сақлиниватқанлиқини тәкитлиди.

У йәнә мәзкур йиғмидики китаб - материялларниң еликтиронлуқ нусхисиниң җиддий түрдә тәйярлиниватқанлиқини, йеқин кәлгүсидә торға қоюлидиғанлиқини алаһидә тилға алди.

Һазир шиветсийәдә яшаватқан уйғур зиялийлиридин абдушүкүр муһәммәт әпәндиму бу һәқтә зияритимизни қобул қилип, өзиниң әйни чағда гуннар ярриң топлиған бу китаб - материялларни стокһолм университетиниң кутупханисида көргәнликини тилға алди.

Униң билдүрүшичә, әйни чағда стокһолм университетида гуннар ярриң намида қурулған илмий йиғма кейинчә истанбулдики шиветсийә тәтқиқат иниститутиға көчүрүлгән икән.

Бу һәқтики мәлуматларниң ахири кейинки программимизда диққитиңларда болиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.