Rabiye qadir: “Pütün dunya musulmanlirining qurban héytini qutlaymen!”

Qurban héyt munasiwiti bilen ziyaritimizni qobul qilghan Uyghur milliy herikiti rehbiri, dunya Uyghur qurultiyi re'isi rabiye qadir xanim awwal pütün dunya musulmanlirigha we Uyghurlargha semimiy héytliq salimini yollidi we dunya Uyghur qurultiyining qurban héytliq tebriknamisini yetküzdi:
-Essalamu'eleykum eziz qérindashlar, dunya Uyghur qurultiyi namidin, pütün dunya miqyasida Uyghurlarning erkinliki üchün küresh qiliwatqan pidakar Uyghur pa'aliyetchiler namidin we öz namimdin, pütün dunya musulmanlirining, jümlidin weten ichi we sirtida yashawatqan sherqiy türkistanliq pütün qérindashlirimizning qurban héytini mubarekleymiz we xelqimizge janabi allahtin erkinlik, hörlük, amanliq, bext-sa'adet tileymiz!

Ushbu mubarek künde, sherqiy türkistan xelqining hörlüki we azadliqini qolgha keltürüsh yolida qimmetlik hayatlirini teqdim qilghan eziz shéhitlirimizgha bolghan aliy hörmitimizni we cheksiz séghinishimizni qayta-qayta izhar qilimiz, eziz qurbanlirimizning a'ile-tawabi'atlirigha bext we xatirjemlik tileymiz!

Bu mubarek künde, taylandtin we bashqa ellerdin xitaygha mejburiy qayturulghan bigunah qérindashlirimizning baldurraq hörlük we erkinlikke érishishini janabi allahtin tileymiz, allah ularning azabini yenggilletsun, ularning a'ile-tawabi'atlirigha sebir bersun!

Ushbu mubarek künde, sherqiy türkistanda xorluq chékiwatqan we bigunah qiriliwatqan din we qan qérindashlirimni untumighan, ulargha medet bérish üchün dunyaning herqaysi jaylirida kochilargha tökülüp, mustebit kommunist xitaygha qarshi ghezeplik sho'arliri bilen namayish qilghan, semimiy du'aliri we xalis yardemliri bilen Uyghur qérindashlirigha sahib chiqqan ulugh türk xelqige we diyanetlik musulman qérindashlirimizgha cheksiz minnetdarliq bildürüshni bir wijdani we insaniy burchimiz dep bilimiz, yene bu mubarek künde, sherqiy türkistan xelqige ige chiqqan we ularni illiq baghrigha basqan türkiye döliti we eziz türk qérindashlirimizgha cheksiz minnetdarliqimizni bildürimiz!sherqiy türkistan xelqi ularning bu xalis yardimini we méhri-shepqitini ebediyen untumaydu!”

Rabiye xanim yene bu mubarek qurban héyt yéqinliship kéliwatqan xasiyetlik künlerde, kommunist xitay hakimiyitining,Uyghur élida “3 Bayramni birlikte tentene bilen kütüwélish” dégen sho'arni kötürüp chiqip sün'iy halda bayram tentenisi teshwiq qiliwatqanliqini tenqid qilip mundaq dédi: “Xitay hakimiyiti nomus qilmastin, xelqimizni, wetinimiz sherqiy türkistanni muttehemlerche zorluq küch bilen ishghal qiliwalghanliqining 66 yilliqini we Uyghur xelqige mejburiy zorlap téngilghan atalmish “Aptonom rayon” ning qurulghanliqining 60-yilliqini daghdugha bilen tebrikleshke mejburlap, buni mubarek qurban héytqa nomussizlarche chétip, pütün islam alimige we muqeddes islamgha éghir derijide haqaret keltürmekte!

Sherqiy türkistan xelqi xitay hakimiyitining “Shinjang ezeldin wetinimizning ayrilmas bir parchisi” dégen bu sepsetisini izchil türde qet'iy ret qilip keldi, Uyghur xelqi bundin 60 yil burun özlirige zorlap téngilghan atalmish “Shinjang Uyghur aptonom rayoni” ni héchbir zaman qobul qilghini yoq, chünki bu atalmish “Aptonom rayon” hazir bu zéminning heqiqiy igiliri hésablan'ghan Uyghur xelqi üchün sépi özidin bir üsti ochuq türmidin ibaret! shuning üchün Uyghur xelqi özlirining musteqilliqini eslige keltürüsh üchün 66 yildin buyan xitay hakimiyitige qarshi tinimsiz küresh qilip keldi.

Mana mushu héyt harpisida, aqsuning bay nahiyiside yene 40 nechche kishining xitay hakimiyitining Uyghurlarni qalaymiqan tutqun qilish, basturush herikitige qarshiliq bildürüp shéhit bolghanliqidin, mejruh bolghanliqidin xewer taptuq, sherqiy türkistan zéminida Uyghur xelqining insaniy heq-hoquqliri éghir depsendichilikke uchrawatqan, pütün Uyghur milliti kommunist xitay hakimiyiti teripidin, pütün xitay miqyasi boyiche xitay saqchi-eskerlirining we hetta xitay puqralirining xalighanche bozek qilishigha, xorlishigha, tutqun qilishigha, qiynishigha we öltürüshige duch kéliwatqan bügünki künde, mustebit xitay hakimiyitining re'isi shi jinping amérikida ziyarette bolmaqta, dunya jama'etchilikining közini boyashqa we bu arqiliq özlirining Uyghur xelqi üstidin yürgüzüwatqan jinayi qilmishlirini yoshurushqa urunmaqta. Emma biz, insaniy heq-hoquqlirimizni, qedir-qimmetlirimizni, milliy we diniy mewjutluqimizni qoghdash yolidiki kürishimizni toxtatmaymiz, kommunist xitay hakimiyitining mustemlikisidin xelqimizge kéliwatqan pütün zulum we balayi'apetlerdin dunyani xewerlendürüshtin bir minutmu toxtap qalmaymiz, xitay dunyaning közini emdi aldiyalmaydu, meqsitige yételmeydu. Kommunist xitay hakimiyiti gumranliqqa yüzlenmekte.”

Rabiye qadir xanim axirida sözini mundaq tilekliri bilen xulasilidi : “Hemmige qadir yaratqan igimiz sherqiy türkistan musulmanlirinimu xuddi erkin dunyada yashawatqan musulman qérindashlirimizdek bésim we zulumdin xali halda bextiyarliq tuyghusi ichide héyt ötküzüshke nésip qilghay! axirida, eziz qérindashlirimizning mubarek qurban héytini qayta tebrikleymen we sizlerge salametlik we bext xatirjemlik tileymen! hemminglarning héytinglargha mubarek bolsun!”