"һималаядин һалқип өткән аял" намлиқ китаб шиветсийәдә йоруқ көрди

Ихтиярий мухбиримиз әкрәм
2018-03-05
Share
Margareta-wennfors-Margareta-hok-wenfors.jpg Уйғур елиниң 1931-йилидин 1938-йилиғичә болған вәзийити әкс әттүрүлгән китабниң аптори маргарета һөк венфорс ханим. 2018-Йили феврал, шиветсийә.
RFA/Ekrem

Маргарета һөк венфорс ханимниң уйғурлар вәтинигә даир йеңи китаби - "һималаядин һалқип өткән аял" шиветсийәдә нәшр қилинған.

Шиветсийәдики уйғур зиялийлириниң бәргән мәлуматлириға асасланғанда, 14-феврал күни шиветсийә пайтәхти ситокһолмдики лидингө арилида "һималаядин һалқип өткән аял" намлиқ китабниң тарқитилиш мурасими өткүзүлгән. Мурасимға китаб аптори маргарета һөк венфорс ханим вә башқа көплигән илим адәмлири қатнашқан.

Шиветсийәдики уйғур зиялийси бәхтигүл ханимниң билдүрүшичә, 192 бәтлик мәзкур китабқа уйғур елиниң 1931-йилидин 1938-йилиғичә болған вәзийитини әкс әттүридиған 100 парчидин артуқ тарихий сүрәт вә җуғрапийәлик хәритиләр киргүзүлгән.

Маргарета ханим бу әсәрни шу заманларда қәшқәр, йеңисар, йәркән қатарлиқ юртларда дин тарқитиш вә теббий давалаш билән шуғулланған ата- анисиниң күндилик хатирилири, рәсим албомлиридин пайдилинип йезип чиққан.

Биз маргарета ханимниң өзидин бу китаб һәққидә учур елишқа көп теришқан болсақму, униңға улишалмидуқ. 14-Феврал өткүзүлгән мурасимға қатнашқан шиветсийәдики уйғур зиялийси ниҗат әпәнди бу һәқтә учур берип, паалийәтниң дағдуғилиқ өткүзүлгәнликини билдүрди.

Мурасим давамида, шиветсийәдики бир қисим зиялийлар вә уйғуршунаслар уйғур елиниң нөвәттики вәзийити һәққидә тохтилип, хитай һөкүмитиниң уйғурларни "террорлуқ" вә "әсәбийлик" қалпиқи билән қаттиқ бастуруватқанлиқини тилға елишқан.

Уйғур зиялийси бәхтигүл ханимниң баян қилишичә, мәзкур китаб уйғур елиниң 1930- вә 1940-йиллиридики омумий вәзийитини чүшиниш нуқтисидин зор қиммәткә игә икән. Ниҗат әпәндиму бу китабтики тарихий сүрәтләр билән һөҗҗәтлик баянларниң әйни дәврдики уйғурлар юртиниң иҗтимаий тарихини чүшиништә муһим материяллиқ қиммитигә игә икәнликини алаһидә тәкитлиди.

Бу китабта 20-әсирниң башлиридики уйғур елиниң җуғрапийәлик вәзийити тәпсилий тонуштурулғанлиқини әскәрткән бәхтигүл ханим, шу замандики уйғурларниң иқтисадий вә иҗтимаий һаятиға аит көплигән деталларниң китабта йәр алғанлиқини қошумчә қилди.

Мәлум болушичә, бу китаб 19-әсирниң ахири 20-әсирниң башлирида уйғур елиниң җәнубий қисмида паалийәт елип барған шивет миссийонерлири вә уларниң әвладлири тәрипидин йезилған уйғур дияриға даир йәнә бир йеңи китаб һесаблинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт