Японийәдики “уйғурлар авази” телевизийәсидә уйғурлар тарихида қурулған икки җумһурийәт тонуштурулди

Ихтиярий мухбиримиз һаҗи қутлуқ қадири
2017.01.03
uyghurlar-awazi-3.jpg Японийәлик сиясий обзорчи миура котаро әпәнди билән японийә уйғур җәмийитиниң рәиси илһам мәхмут әпәнди японийәдики “уйғурлар авази” телевизийәсидә.
Social Media

30-Декабирдин башлап японийәдики“уйғурлар авази” интернет телевизийәсиниң 2016-йиллиқ әң ахирқи программиси йотуб арқилиқ рәсмий тарқитилған.

Японийә уйғур җәмийитидин игилишимизчә,“уйғурлар авази” интернет телевизийәсиниң 2016-йиллиқ әң ахирқи программисида уйғурларниң йеқинқи заман тарихида қурулған шәрқий түркистан ислам җумһурийити билән шәрқий түркистан җумһурийити тоғрисида тәпсилий чүшәндүрүшләр берилгән.

“уйғурлар авази” интернет телевизийәсиниң бу қетимқи программиси алди билән 1933-йили 11-айниң 12-күни уйғур елиниң қәшқәр шәһиридә қурулған шәрқий түркистан ислам җумһурийити билән 1944-йили 12-ноябир илида қурулған шәрқий түркистан җумһурийитиниң қурулуш җәряни вә бу җумһурийәтләрниң гумран болушидики бәзи бир сиясий сәвәбләр тоғрисида уйғур ели вә чәтәлләрдә нәшр қилинған бир қисим тарихий мәнбәләрдә дейилгән мәлуматларға асасән кәң мулаһизиләр елип берилған.

Бу һәқтә зияритимизни қобул қилған японийә уйғур җәмийитиниң рәиси илһам маһмут мәзкур программида бу һәқтә берилгән мәлуматлар тоғрисида қисқичә тохталди.

“уйғурлар авази” интернет телевизийәсиниң бу қетимқи программисиға иштирак қилған японийәлик сиясий обзорчи миура котаро мәзкур программида өзи тохталған икки җумһурийәт тоғрисидики мәзмунлар һәққидә: “мән программида асасән икки җумһурийәтниң йимирилишидики сиясий сәвәбләр тоғрисида тохталдим. Сәвәби, һазир чәтәлләрдә елип бериливатқан уйғур мустәқиллиқ һәрикәтлиридә уйғурлар бу җумһурийәтләрниң йимирилишидин ибарәт бу тарихий паҗиәләрдин савақ елип, хәлқара вәзийәт вә сиясәтләрдин пайдилинип кәлгүсидә өз җумһурийәтлирини әслигә кәлтүрүшидә буниң бәлгилик дәриҗидә пайдиси болармикин, дәп ойлидим” деди.

Илһам маһмут мәзкур телевизийә программисида йәнә, японийә дөлитиниң тунҗи қетим қурулған шәрқий түркистан ислам җумһурийитигә болған сиясий қизиқиши тоғрисида японийә тарихий мәнбәлиридә дейилгән бәзи бир мәлуматларниңму оттуриға қоюлғанлиқини баян қилди.

Мәзкур программиниң көрүрмәнлиридин юрина программа һәққидә өз тәсиратини баян қилип:“мәзкур интернет телевизийәсиниң программилиридин мән уйғурларниң тарихий вә мәдәнийити шундақла уйғур тилидин көплигән савақларға игә болдум. Бу қетимқи программидин уйғурларниң җумһурийәтлириниң немә сәвәбтин вәйран болғанлиқи вә бу җумһурийәтләрниң гумран болушида хитай билән сабиқ советлар иттипақиниң муһим рол ойниғанлиқидин хәвәрдар болдум” деди.

Японийә уйғур җәмийитидин игилишимизчә, мәзкур җәмийәт 2017-йиллиқ “уйғурлар авази” интернет телевизийәсиниң программилирини техиму рәңдар вә көп мәзмунлуқ қилиш үчүн һазирдин башлап түрлүк тәйярлиқ хизмәтлирини ишләшкә башлиған.

Юқириқи аваз улинишидин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.