Gérmaniyede ikki jumhuriyetni xatirilesh we rabiye xanim tewellutining 70 yilliqini qutluqlash pa'aliyiti

Uyghur milliy herikiti rabiye qadir xanim amérika hökümitining bésimi bilen xitay türmisidin qoyup bérilip amérika kelgen waqti. 2005-Yili 17-mart, chikago.

Gérmaniyede ikki jumhuriyetni xatirilesh we rabiye xanim tewellutining 70 yilliqini qutluqlash hemde “Uyghur milliy dewasini küchlendürüshning istratégiyilik yolliri” témisida léksiye sözlesh pa'aliyetliri ötküzülidu.

D u q teshwiqat-neshriyat komitétining 8-noyabir ijtima'iy taratqularda élan qilghan chaqiriqigha asaslan'ghanda, 12-noyabir küni sa'et 17:00 de d u q ning myunxén shehiridiki bash shtabida “Uyghur milliy dewasini küchlendürüshning istratégiyilik yolliri” témisida léksiye sözlesh pa'aliyiti élip bérilidiken. Bu qétimqi léksiyige türkiye hajitepe uniwérsitétining proféssori, istratégiye mutexessisi erkin ekrem ependi teklip qilin'ghan. Léksiyige dunyaning herqaysi jayliridiki ondin artuq dölettin kelgen 30 etrapidiki Uyghur ziyaliysi we gérmaniyediki Uyghur jama'iti qatnishidiken. Léksiyidin kéyin, miyunxéndiki chonglar meshripi jama'iti méhmanlar sheripige ziyapet béridiken.

11-Ayning 13-küni bolsa, d u q ning orunlashturushi bilen ikki jumhuriyetni xatirilesh pa'aliyiti ötküzülüsh bilen birge, Uyghur siyasiy erbabliridin erkin aliptékin ependining sahibxaniliqida Uyghur milliy herikitining rehbiri rabiye qadir xanim tewellutining 70 yilliqini qutluqlash murasimi bolup ötidiken. Pa'aliyetke 10 din artuq dölettin kelgen 30 etrapidiki méhman we gérmaniye Uyghur jama'iti bolup 200 etrapida kishi qatnishidiken.

Biz 12 we 13-noyabir künliri ötküzülidighan bu pa'aliyetler heqqide etrapliq melumat igilesh üchün, mezkur pa'aliyetlerge mes'ul bolghan Uyghur siyasiy erbablirini ziyaret qilduq.

D u q ning sabiq re'isi erkin aliptékin ependi Uyghurlar we chet'ellik méhmanlargha bu qétimqi pa'aliyetning teklipnamisini öz namida ewetken. U bu heqte ziyaritimizni qobul qilghanda pa'aliyetke köp sanda kishi qatnishidighanliqini tilgha aldi.

D u q bash katipi dolqun eysa ependi ziyaritimiz jeryanida, aldi bilen 12-noyabirgha uyushturulghan “Uyghur milliy dewasini küchlendürüshning istratégiyilik yolliri” témisidiki léksiye heqqide toxtaldi. D u q mu'awin re'isi ümid agahi ependi bolsa, “Uyghur milliy dewasini küchlendürüshning istratégiyilik yolliri” témisidiki léksiyining Uyghurlar üchün zor ehmiyetke ige ikenlikini tekitlidi. Dolqun eysa ependi sözide yene, 13-noyabir ötküzülidighan ikki jumhuriyetni xatirilesh we rabiye xanim tewellutining 70 yilliqini qutluqlash murasimi heqqidimu qisqiche izahat berdi ümid agahi bolsa, ikki jumhuriyetni xatirilesh bilen rabiye xanim tewellutining 70 yilliqini qutluqlash murasimini birlikte ötküzüshning ehmiyitinimu alahide eskertip ötti.