Алматада "интизар" журнилиниң нөвәттики сани йоруқ көрди

Ихтиярий мухбиримиз ойған
2016-09-09
Share
intizar-zhurnili-2016.png "интизар" журнилиниң нөвәттики сани
RFA/Oyghan

Йеқинда алмата шәһиридә уйғур - ханим қизлириниң җумһурийәтлик қош айлиқ "интизар" журнилиниң нөвәттики сани йоруқ көрди. "мир" нәшрият өйиниң тәсис қилиши билән 2002 - йилниң өктәбир ейидин башлап нәшр қилиниватқан мәзкур журнал язғучи дүрнәм мәшүрова рәһбәрликидики бир қатар наһийилик аяллар кеңиши рәислиридин, актиплардин, устазлардин вә башқилардин тәркип тапқан мәслиһәт кеңиши тәрипидин тәшкилләнгән.

Асасий җәһәттин өз хираҗитигә тайинип нәшр қилиниватқан "интизар" журнили алмата шәһири вә алмата вилайитигә қарашлиқ наһийәләрдә истиқамәт қиливатқан юрт - җамаәтчилик тәрипидинму қоллап - қувәтләнмәктә һәм қазақистан мустәқиллиқиниң башқа милләтләр билән бир қатарда уйғурларғиму бәргән әркинликлириниң бир бәлгиси сүпитидә қаралмақта. Уйғур зиялийлириниң тәкитлишичә, қазақистанда уйғурлар үчүн ана тилида билим елип, уйғур тилини, әдәбиятини, сәнитини, мәдәнийитини, мәтбуатини, өрп - адәтлирини тәшвиқ қилиш һәм шу йөнилиштә яш әвладларни тәрбийиләш үчүн барлиқ шараитлар яритилған.

"аламәт" филим ишләш мәркизиниң мудири қәлбинур розийеваниң пикричә, җумһурийәтлик "уйғур авази" гезити билән бир қатарда "интизар" журнилиму уйғур ханим - қизлириниң сөйүмлүк нәшригә, миңлиған оқурмәнләрниң сирдишиға, муңдишиға айланған. Қ. Розийева журналниң һәр бир санида елан қилиниватқан материялларниң мәзмун җәһәттин хелила бейиғанлиқини көрситип, мундақ деди: "журналдики мәзмуни үстүн, тәрбийәвий әһмийити зор, болупму ханим - қизлиримиз үчүн йезилған һәр хил һекайә, нәсир, һаятий әсәрләр, шаирәлиримизниң қәлимигә мәнсүп шеирий мисралар, һекмәтлик сөзләр, пайдилиқ несиһәтләр журналниң мәзмунини бейитса, һәр хил саһәләрдә хизмәт қилип, адил меһнити билән шөһрәт қазанған ханим - қизлиримиз һәққидиму журнал сәһипилиридин оқуймиз."

Қ. Розийева шундақла журналниң бу санида уйғур хәлқиниң атақлиқ булбуллири тоғрилиқму мәлуматларниң берилгәнликини тәкитләп, қазақистанниң хизмәт көрсәткән артислири нурбүви мәмәтова һәм гүлвира разийеваниң уйғур сәнитини раваҗландуруштики төһписини юқири баһалиди. У болупму уйғур елиниң даңлиқ нахшичиси сәнәвәр турсунниң уйғур хәлқиниң нахша - күй ханиши вә талантлиқ иҗрачи икәнликини, өзиниң аҗайип йеқимлиқ вә нәпис авази билән милйонлиған хәлқниң қәлбидин орун елип келиватқанлиқини алаһидә тәкитлиди. Қ. Розийева уйғур хәлқиниң әнә шундақ мәшһур шәхслирини тонуштурушниң муқимлиқини ейтип, йәнә мундақ деди: "бу кәби мақалиләрни оқуғинимизда, ана дияримиздин шундақ нахшичилар кәлсә, уларни сәһниләрдә көрсәк, уларниң йәткән утуқлири һәққидә мәтбуат сәһипилиридин оқусақ. Болупму интизар журнили сәһипилиридә шундақ мақалиләрниң берилишини тақәтсизлик билән күтимиз."

Игилишимизчә, журналниң бу санида шундақла муһәммәт йүсүпниң "ислам әхлақи", қайрат җолдибайниң "ахирқи пәйғәмбәр муһәммәт әләйһиссалам", ялқун розиниң "бизгә қандақ дадилар керәк?" намлиқ мақалилири, халидә абдукеримниң "үзүк тиниқлар" нәсри шундақла долқун рози, абдуғопур қутлуқоф, муһәммәтимин обулқасимоф охшаш атақлиқ шаирларниң әсәрлири вә башқилар берилгән.

Радийомиз зияритини қобул қилған алматада турушлуқ нәшриятчи азнат талипоф "интизар" журналида әдәб - әхлақ, бала тәрбийиси, болупму милләтниң милләт сүпитидә сақлинип қелишида муһим рол ойнайдиған миллий маарип һәққидә мақалиләрниң турақлиқ берилип келиватқанлиқини тәкитләп, мундақ деди: "қудрәт тапқан мәмликәтләрдә қандақ ана болса, шундақ бала болиду, қандақ бала болса, шундақ милләт болиду, дегән шуарға қаттиқ әмәл қилидикән. Бир қолида дуняни тәврәтсә, бир қолида бөшүкни тәвритидиған анилар зиммисигә йүкләнгән вәзипиниң муһимлиқини, милләтниң истиқбали анилар сапасиға зич мунасивәтлик икәнликини алаһидә тәкитләйдиған мақалиләр оқурмәнләр тәрипидин қизғин қарши елинмақта."

А. Талипофниң пикричә, журналда уйғур елиниң әдәбияти, мәдәнийити, сәнитигә тегишлик мақалиләрниң орун елиши униң мәзмунини техиму бейитип, тәсир даирисини йәниму кеңәйткән. У шундақла журналниң һәр бир уйғур аилисидә интизарлиқ билән күтидиған нәшргә айлиниватқанлиқини, он бәш йил давамида журнал хадимлириниң җанпидалиқ әмгики арқисида бесиливатқан материялларниң яш әвладни миллий роһта тәрбийиләштә муһим рол ойнаватқанлиқини оттуриға қойди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт