Almatada “Intizar” zhurnilining nöwettiki sani yoruq kördi

Yéqinda almata shehiride Uyghur - xanim qizlirining jumhuriyetlik qosh ayliq “Intizar” zhurnilining nöwettiki sani yoruq kördi. “Mir” neshriyat öyining tesis qilishi bilen 2002 - yilning öktebir éyidin bashlap neshr qiliniwatqan mezkur zhurnal yazghuchi dürnem meshürowa rehberlikidiki bir qatar nahiyilik ayallar kéngishi re'isliridin, aktiplardin, ustazlardin we bashqilardin terkip tapqan meslihet kéngishi teripidin teshkillen'gen.

Asasiy jehettin öz xirajitige tayinip neshr qiliniwatqan “Intizar” zhurnili almata shehiri we almata wilayitige qarashliq nahiyelerde istiqamet qiliwatqan yurt - jama'etchilik teripidinmu qollap - quwetlenmekte hem qazaqistan musteqilliqining bashqa milletler bilen bir qatarda Uyghurlarghimu bergen erkinliklirining bir belgisi süpitide qaralmaqta. Uyghur ziyaliylirining tekitlishiche, qazaqistanda Uyghurlar üchün ana tilida bilim élip, Uyghur tilini, edebiyatini, sen'itini, medeniyitini, metbu'atini, örp - adetlirini teshwiq qilish hem shu yönilishte yash ewladlarni terbiyilesh üchün barliq shara'itlar yaritilghan.

“Alamet” filim ishlesh merkizining mudiri qelbinur roziyéwaning pikriche, jumhuriyetlik “Uyghur awazi” géziti bilen bir qatarda “Intizar” zhurnilimu Uyghur xanim - qizlirining söyümlük neshrige, minglighan oqurmenlerning sirdishigha, mungdishigha aylan'ghan. Q. Roziyéwa zhurnalning her bir sanida élan qiliniwatqan matériyallarning mezmun jehettin xélila béyighanliqini körsitip, mundaq dédi: “Zhurnaldiki mezmuni üstün, terbiyewiy ehmiyiti zor, bolupmu xanim - qizlirimiz üchün yézilghan her xil hékaye, nesir, hayatiy eserler, sha'irelirimizning qelimige mensüp shé'iriy misralar, hékmetlik sözler, paydiliq nésihetler zhurnalning mezmunini béyitsa, her xil sahelerde xizmet qilip, adil méhniti bilen shöhret qazan'ghan xanim - qizlirimiz heqqidimu zhurnal sehipiliridin oquymiz.”

Q. Roziyéwa shundaqla zhurnalning bu sanida Uyghur xelqining ataqliq bulbulliri toghriliqmu melumatlarning bérilgenlikini tekitlep, qazaqistanning xizmet körsetken artisliri nurbüwi memetowa hem gülwira raziyéwaning Uyghur sen'itini rawajlandurushtiki töhpisini yuqiri bahalidi. U bolupmu Uyghur élining dangliq naxshichisi senewer tursunning Uyghur xelqining naxsha - küy xanishi we talantliq ijrachi ikenlikini, özining ajayip yéqimliq we nepis awazi bilen milyonlighan xelqning qelbidin orun élip kéliwatqanliqini alahide tekitlidi. Q. Roziyéwa Uyghur xelqining ene shundaq meshhur shexslirini tonushturushning muqimliqini éytip, yene mundaq dédi: “Bu kebi maqalilerni oqughinimizda, ana diyarimizdin shundaq naxshichilar kelse, ularni sehnilerde körsek, ularning yetken utuqliri heqqide metbu'at sehipiliridin oqusaq. Bolupmu intizar zhurnili sehipiliride shundaq maqalilerning bérilishini taqetsizlik bilen kütimiz.”

Igilishimizche, zhurnalning bu sanida shundaqla muhemmet yüsüpning “Islam exlaqi”, qayrat joldibayning “Axirqi peyghember muhemmet eleyhissalam”, yalqun rozining “Bizge qandaq dadilar kérek?” namliq maqaliliri, xalide abdukérimning “Üzük tiniqlar” nesri shundaqla dolqun rozi, abdughopur qutluqof, muhemmet'imin obulqasimof oxshash ataqliq sha'irlarning eserliri we bashqilar bérilgen.

Radiyomiz ziyaritini qobul qilghan almatada turushluq neshriyatchi aznat talipof “Intizar" zhurnalida edeb - exlaq, bala terbiyisi, bolupmu milletning millet süpitide saqlinip qélishida muhim rol oynaydighan milliy ma'arip heqqide maqalilerning turaqliq bérilip kéliwatqanliqini tekitlep, mundaq dédi: “Qudret tapqan memliketlerde qandaq ana bolsa, shundaq bala bolidu, qandaq bala bolsa, shundaq millet bolidu, dégen shu'argha qattiq emel qilidiken. Bir qolida dunyani tewretse, bir qolida böshükni tewritidighan anilar zimmisige yüklen'gen wezipining muhimliqini, milletning istiqbali anilar sapasigha zich munasiwetlik ikenlikini alahide tekitleydighan maqaliler oqurmenler teripidin qizghin qarshi élinmaqta.”

A. Talipofning pikriche, zhurnalda Uyghur élining edebiyati, medeniyiti, sen'itige tégishlik maqalilerning orun élishi uning mezmunini téximu béyitip, tesir da'irisini yenimu kéngeytken. U shundaqla zhurnalning her bir Uyghur a'iliside intizarliq bilen kütidighan neshrge ayliniwatqanliqini, on besh yil dawamida zhurnal xadimlirining janpidaliq emgiki arqisida bésiliwatqan matériyallarning yash ewladni milliy rohta terbiyileshte muhim rol oynawatqanliqini otturigha qoydi.