Қарақаш чинибағда һәрбир кәнттә бирдин җәсәт бир тәрәп қилиш орни қурулған

Мухбиримиз шөһрәт һошур
2018-06-25
Елхәт
Пикир
Share
Принт
Хотән шәһири ариш йеза авап кәнт «дәпнә ишлири мулазимәт мәркизи». 2018-Йили. Хотән.
Хотән шәһири ариш йеза авап кәнт «дәпнә ишлири мулазимәт мәркизи». 2018-Йили. Хотән.
RFA/Shohret Hoshur

Мухбиримизниң бу йилниң бешида қарақаштин әһвал игилиши давамида, мәзкур наһийәдә дәпнә мурасими орни нами астида җәсәт бир тәрәп қилиш орунлириниң қурулушқа башлиғанлиқи вә буниң урчи қатарлиқ йезиларда 4-5 кәнттә бирдин тәсис қилинғанлиқи ашкариланған иди. Мухбиримизниң бу һәптидики ениқлиши давамида, җәсәт бир тәрәп қилиш орниниң қарақаш базар ичидики чинивағ сақчиханиси тәвәликидә һәр бир кәнттә бирдин қурулғанлиқи ашкариланди.

Уйғур райониниң бир қисим җайлирида зор көләмлик җәсәт көйдүрүш орунлири қурулуватқандин башқа йәнә қәшқәр, хотәнләрдә дәпнә мурасими орни вә мейит узитиш орни дегәндәк намларда җәсәт бир тәрәп қилиш орунлириниң таки кәнтләргә қәдәр кеңәйтиливатқанлиқи ашкариланмақта. Сақчи хадимлириниң паш қилишичә, қарақаш наһийәсиниң чинибағ сақчиханисиға қарашлиқ 13 кәнт вә 2 аһалиләр комитетиниң һәммисидә бирдин җәсәт бир тәрәп қилиш орни тәсис қилинған.

Бир кәнт аманлиқ мудириниң билдүрүшичә, қарақаштики бу җәсәт бир тәрәп қилиш орунлириниң қурулуши бултур 7-айда, йәни йиғивелиш лагерлири тәсис қилинип 4 айдин кейин қурулушқа башлиған.

Бу йилниң бешидики ениқлашлиримиз давамида, қарақашниң урчи йезисида җәсәт бир тәрәп қилиш орниниң қурулушқа башлиғанлиқини вә шу мәзгилгә қәдәр 4-5 кәнткә бирдин җәсәт бир тәрәп қилиш орни қурулғанлиқи ашкариланған иди.

Бүгүн йәнә дуня уйғур қурултийиниң алий рәһбири рабийә қадир ханим бир баянат елан қилип, уйғур районида нөвәттә җәсәт көйдүрүш орунлири қурулуватқанлиқи һәққидики учурлардин қаттиқ әндишә һес қиливатқанлиқини баян қилди.

У, хәлқара уйғур кишилик һоқуқ вә демократийә фонди торида елан қилинған «бир шумлуқтин пурақ келиватиду, хәлқарада җамаәтни диққәт қилишқа чақиримән» мавзулуқ бу баянатта лагерларда солинип ятқан бир милйондин артуқ уйғурниң нөвәттики әһвали вә тәқдири һәққидики җиддий әндишисини тилға алған.

Баянатида уйғур райондики лагерлар билән натсистларниң йиғивелиш лагерлири арисида бир селиштурма елип барған рабийә ханим, хитай һакимийитиниң 1989-йилидики тйәнәнмен вәқәсидә өз әвладлирини танка билән бастурулуп өлтүргәнликини әслитип, өткән әсиридә натсистларниң йиғивелиш лагерлирида йүз бәргән паҗиәләрниң уйғур районидики лагерларда йүз бериш еһтималлиқини чәткә қеқишқа болмайдиғанлиқини әскәрткән вә хәлқара җамаәтни уйғур райониниң вәзийити, җүмлидин йиғивелиш лагерлири үстидин дәрһал бир тәкшүрүш елип беришқа дәвәт қилған.

Пикирләр (0)
Share
Толуқ бәт