Wetinige qaytqan roh: merhum küresh kösen zamandashlirining xatiriside (1)

Muxbirimiz qutlan
2016-10-27
Élxet
Pikir
Share
Print
Merhum küresh kösen ependi.
Merhum küresh kösen ependi.
Photo: RFA

Küresh kösen 2006-yili wetinidin uzaq bir tupraqta 47 yéshida alemdin ketti. Uning weten ishqida tépchekligen yüriki soqushtin toxtidi, emma uning küresh rohi we sen'et bilen julalan'ghan yangraq awazi hélihem Uyghur xelqining xatiriside yashap kelmekte.

Merhum küresh kösenning zamandashliridin gérmaniyede yashawatqan ablimit tursun ependi radiyomiz ziyaritini qobul qilip, chongqur séghinish we hörmet ilikide merhumning küresh qaynimi ichide ötken hayatini eslep ötti.

U mundaq dédi: "Méning merhum küresh kösen bilen az kem 30 yilgha yéqin shexsiy dostluq hem pikirdashliq hayatim bar. U az yashidi, emma tolimu menilik bir hayatta yashidi. Ömür boyi izdendi. U wetendiki chéghida özining yangraq awazi arqiliq Uyghur xelqining arzu-armanliri we yürek sadalirini anglatti. Wetendin ayrilghandin kéyin bir minut waqtinimu boshqa ötküzmey wetenning teqdiri üchün qayghurdi hemde özining emeliy tirishchanliqi bilen bu yolda izdendi. Men uning hayatini az, emma saz yashighan shundaqla küreshke béghishlan'ghan bir hayat dep qaraymen!..."

Küresh kösenning hazir shiwétsiyede yashawatqan bir tughqan singlisi munewwer sultanmu radiyomiz ziyaritini qobul qilip, merhumning wapatining 10 yilliq xatiriside chongqur séghinish bilen uni yad etti.

U akisining 1980-yillarda néme üchün özige "Kösen" dégen texellusni qollan'ghanliqi heqqide toxtilip mundaq dédi: "Akam 'kösen' dégen texellusni 1988-yilidin bashlap resmiy ishletti. U gerche kuchada tughulmighan bolsimu, emma baliliq we ösmürlük dewrini Uyghur xelqining qedimki medeniyet ochaqliridin bolghan kuchada ötküzgen idi. U qedimki kösen sen'itining merkizi bolghan kuchani söyetti. Sen'etke bolghan tunji ishtiyaqi kuchada oyghan'ghan idi shundaqla bu ezim tupraqta qedimki kösenning sen'et mirasliri we uning sütini émip chong bolghan idi. Shunga akam 'kösen' dégen bu qedimki yurt namini özige texellus qilip talliwalghan idi."

Abdushükür muhemmet ependi merhum küresh kösenning shiwétsiyediki a'ile tughqanliridin biri. U merhum küresh kösen bilen uruq-tughqan bolupla qalmastin, belki yene eng yéqin sepdash süpitide shiwétsiyediki Uyghur jama'itining siyasiy pa'aliyetliride bille bolghan. Muhajirettiki hayatning achchiq-chüchüklirini bille bashtin köchürgen. U bügün radiyomiz ziyaritini qobul qilip özining merhum küresh kösen heqqidiki eslimilirini anglarmenler bilen ortaqlashti.

Munewwer sultan gerche akisi küresh kösenning waqitsiz ölümi qaldurup ketken boshluqni taki bügün'ge qeder hés qiliwatqan we buning üchün azabliniwatqan bolsimu, emma merhumning qisqa hayatida qaldurup ketken menggü ölmes küresh rohidin pexirlinidighanliqini tekitlidi.

(Dawami bar)

Toluq bet