Parizhda ötküzülgen türk dunyasi medeniyet körgezmisige Uyghurlarmu ishtirak qildi

Ixtiyariy muxbirimiz erkin tarim
2017-02-02
Élxet
Pikir
Share
Print

2-Ayning 1-küni firansiyening parizh shehiridiki inalko instituti yani sherq tilliri institutida türk dunyasi kültür künliri ötküzüldi.

Bu pa'aliyetke türkiye, qazaqistan, qirghizistan, ezerbeyjan we Uyghur diyaridin kelgen oqughuchilar mexsus bölüm échip ishtirak qilghan. Bu pa'aliyettiki Uyghurlar achqan bölümde Uyghurlarning kiyim-kéchekliri, chalghu eswabliri, chet'elde chiqiwatqan gézit-zhurnallar, s d plastinkiliri körgezme qilin'ghan. Körgezme jeryanida Uyghur tilimi öginiwatqan gérémard jérémi'e ependi Uyghur medeniyitini tonushturghan.

Gérémard jérémi'e ependi türk dunyasi medeniyet körgezmisi toghrisida melumat berdi.

U, körgezmide Uyghurlarning maddiy medeniyet buyumliridin örnekler körsitilgenlikini bayan qildi.

Gérémard jérémi'e ependi körgezmini köprek türkiy tillarni öginidighan oqughuchilarning ékskursiye qilghanliqini bayan qildi.

Uyghur tili öginiwatqan gérémard jérémi'e ependi firansuzlarning köpining ottura asiyadiki türkiy milletlerdin bixewer ikenlikini, shunga köprek bu xil pa'aliyetlerni ötküzüsh kéreklikini tekitlidi.

U, özining bir qétim Uyghur diyarigha barghanliqini shuningdek tughqan türkiy tillarning köpini ögen'genlikini bayan qildi.

Qimmetlik radi'o anglighuchilar kéyinki yillarda dunyaning herqaysi jayliridiki uniwérsitétlarda ötküzülgen bu xil körgezmilerde Uyghurlarmu tonutulmaqta. Buning Uyghurlarni shundaqla Uyghurlarning maddiy medeniyitini tonushturushtiki ehmiyiti néme? buning Uyghur dewasigha qoshqan töhpisi qandaq? dégen so'allargha jawab tépish üchün dawamliq bu xil körgezmilerge ishtirak qiliwatqan hamit göktürk ependi we sherqiy türkistan medeniyet we hemkarliq teshkilati enqere shöbisining sabiq re'isi xeyrullah efendigil ependiler bilen söhbet élip barduq.

Hamit göktürk ependi 1985-yilidin 2000-yillarning bashlirighiche sherqiy türkistan wexpide wezipe ötigen mezgilde türkiyediki köpligen uniwérsitétlarda bu xil körgezmilerni achqanliqini, buning Uyghur dewasi üchün intayin paydiliq bir xizmet ikenlikini bayan qildi.

Sherqiy türkistan medeniyet we hemkarliq jem'iyiti enqere shöbisining sabiq re'isi xeyrullah efendigil ependi 2000-yilidin 2013-yilighiche enqere we enqere yéqinidiki wilayetlerdiki uniwérsitétlarda köp sanda körgezmilerge ishtirak qilip, Uyghurlarning maddiy medeniyitini we insan heq-hoquqliri depsendichilikini resimler bilen körsetkenlikini, buning Uyghurlarni tonutush üchün intayin ünümlük bolghanliqini otturigha qoydi.

Qimmetlik radi'o anglighuchilar kéyinki yillarda dunyaning herqaysi jaylirida Uyghur tetqiqatigha qiziqidighanlarning köpiyishige egiship, amérika qoshma shtatliri, yawropa döletliri, ottura asiya türkiy jumhuriyetliri we türkiye qatarliq döletlerdiki her qaysi uniwérsitétlarda Uyghur medeniyitini tonutidighan körgezmilermu köpiyishke bashlidi.

Toluq bet