Türkiyede ekrem exmetofning “Mehmud qeshqeri” namliq dramisi mukapatqa érishti

Ixtiyariy muxbirimiz erkin tarim
2015.12.02
Share on WhatsApp
Share on WhatsApp
Haldun-Taner-mexmut-qeshqiri.jpg Qazaqistanliq Uyghur yazghuchi ekrem exmetof yazghan “Mehmud qeshqeri” namliq drama “Tughulghanliqining 100-yilida xaldun taner tiyatir eserliri musabiqisi” de ikkinchilikke érishti. 2015-Yili noyabir.
RFA/Erkin Tarim

Qazaqistanliq Uyghur yazghuchi ekrem exmetof yazghan “Mehmud qeshqeri” namliq drama “Tughulghanliqining 100-yilida xaldun taner tiyatir eserliri musabiqisi” de ikkinchilikke érishti.

Yawro-asiya yazghuchilar birlikining uyushturushi, türkiye bash ministirliq tarmiqidiki türkiyeni tonutush fondining qollap -quwwetlishi, xelq'ara türk medeniyiti teshkilati yeni türksoy we türkiye dölet tiyatirxaniliri bash idarisining hemkarlishishi arqisida orunlashturulghan “Tughulghanliqining 100-yilida xaldun taner tiyatir eserliri musabiqisi” ge türk dunyasining onlarche rayon we döletliridiki yazghuchilarning eserliri qatnashturuldi.

Biz bu heqte tepsiliy melumat igilesh üchün bu musabiqini uyushturghan yawro-asiya yazghuchilar birlikining mes'uli yaqup ömer'oghlu we gérmaniyede turushluq Uyghur edebiyatshunas abduweli ependiler bilen téléfon söhbiti élip barduq.

Yaqup ömer'oghlu bu musabiqini uyushturushtiki meqsiti heqqide toxtilip mundaq dédi: “Bu musabiqe bu yil tonulghan tiyatirchi xaldun taner tughulghanliqining 100-yilliqi munasiwiti bilen ötküzüldi. Xelq'ara türk kültüri teshkilati bu yilni türk dunyasi haldun taner yili élan qilghan idi. Bu munasiwet bilen biz yawro-asya yazghuchilar jem'iyiti haldun taner tiyatir eserliri musabiqisi uyushturduq. Bu musabiqige qatnishishning sherti herqandaq bir türkiy tilida tiyatir esiri yézish idi. Bu yil 4-ayda élan qilghan iduq. Emdi axirlashti.

Merkizi türkiyede turushluq yawro-asya yazghuchilar jem'iyiti re'isi yaqup ömeroghlu ependi bu musabiqining netijiliri toghrisida melumat bérip mundaq dédi: “Bu musabiqe toghrisidiki uqturushni türkiyening konya shehiride ötküzülgen ‛ming nepes bir sés (awaz)‚ namliq xelq'ara türkiy tillarda tiyatir orundaydighan döletler bayrimida élan qilghan iduq. Musabiqidin xewer tapqan 18 rayon we dölettin 109 yazghuchi musabiqige eser ewetti. ‛tughulghanliqining 100-yilida xaldun taner tiyatir eserliri musabiqisi‚ ning bahalash hey'iti bu eserlerni oqup bahalash netijiside rusiye fédératsiyesi bashqurdistan rayonidin meryem burakayéwaning ‛saye‚ namliq esiri birinchilikke, qazaqistanliq Uyghur yazghuchi ekrem exmetofning ‛mehmud qeshqeri‚ namliq esiri ikkinchilikke, ezerbeyjanliq afak mes'udning ‛mensur hellaji‚ namliq esiri üchinchilikke, moldawiyening gagawuz rayonidin kelgen todur zanetning ‛sistéma‚ namliq esiri tötinchilikke we türkmenistanliq nabatguli rejepofning ‛nesridin ependi, sen kim?‚ namliq esiri beshinchilikke érishti.”

Yaqup ömeroghlu haldun taner tiyatir yézish musabiqisini ötküzüshning ehmiyiti toghrisida toxtilip mundaq dédi: “Aldi bilen pütün türkiy millet bu tiyatir yézish musabiqiside birleshtuq. Musabiqige qatnashqan tiyatir eserlirini toplam sheklide neshr qilip, türkiyediki tiyatir sen'etchilirige tarqitip bérimiz. Bu eserler bashqa türkiy tillarghimu terjime qilinip tarqitilsa pütün tamashibinlarghimu ulashqan bolidu. Bu pa'aliyetler türkiy millet yazghuchilarning bir-birini chüshinishi, öz-ara öginishi üchün zor ehmiyetke ige dep oylaymen.”

Uyghur edebiyatshunas abduweli ependi Uyghur yazghuchi yazghan“Mehmud qeshqeri” namliq sehne esirining mukapatqa érishkenlikining Uyghurlarning tarixi we bügünki weziyitini tonutush üchün zor ehmiyetke ige ikenlikini bayan qildi.

Qazaqistanliq Uyghur yazghuchi ekrem exmetofning Uyghurche yézilghan ikki perde sekkiz körünüshlük mezkur dramisida mehmud qeshqerining qeshqerdin bashlinip baghdadqiche sozulghan “Diwanu lughatit türk” ni yézish sepirini mezmun qilin'ghan bolup, yazghuchi eserde mehmud qeshqeriyining izdinish usulliri, musheqqetlik hayat sezgüreshtiliri, düshmenlerning her xil suyiqestlirini nahayiti janliq we qiziqarliq shekilde ipadilep bergen.

Türksoyning 2015-yilini “Xaldun taner yili” dep élan qilishi munasiwiti bilen ötküzülgen mezkur musabiqe, türk dunyasida orunlashturulghan tunji tiyatir eserliri musabiqisi bolush alahidilikige ige.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.