Qazaqistan Uyghur tiyatiri artisliri "Muqamlar siri" ni orunlidi

Ixtiyariy muxbirimiz oyghan
2016-06-14
Élxet
Pikir
Share
Print
Quddus ghojamyarof namidiki jumhuriyetlik dölet Uyghur muzikiliq komédiye tiyatirining "Nawa" ansambili körsetken "Muqamlar siri" konsért programmisidin körünüsh. 2016-Yili 28-may, almata.
Quddus ghojamyarof namidiki jumhuriyetlik dölet Uyghur muzikiliq komédiye tiyatirining "Nawa" ansambili körsetken "Muqamlar siri" konsért programmisidin körünüsh. 2016-Yili 28-may, almata.
RFA/Oyghan

Quddus ghojamyarof namidiki jumhuriyetlik dölet Uyghur muzikiliq komédiye tiyatirining "Nawa" ansambili 12-iyunda özining nöwettiki sepirini ayaghlashturdi. Ötken ayning 28-küni bashlan'ghan mezkur seper jeryanida ansambil artisliri Uyghurlar zich olturaqlashqan almata wilayitining panfilof, Uyghur we emgekchiqazaq nahiyiliride "Muqamlar siri" konsért programmisini körsetti.

Igilishimizche, tiyatir artisliri her yili sehne eserliri we konsért programmiliri bilen etraptiki nahiyilerge bérip oyun qoyushni en'enige aylandurghan. Bu qétimqi sepermu köpligen tamashibinlarning könglidin chiqqan.

Uyghur tiyatirining muzika rehbiri niyaz tursunofning éytishiche, mezkur konsért programmisi qazaqistanning xizmet körsetken erbabi yalqunjan shemiyéf teripidin tüzülgen bolup, ussulgha Uyghur élining 1-derijilik artisi küresh rejep rehberlik qilghan. Mezkur programma Uyghur tiyatirida ilgiri 22 qétim körsitilip, bu qétimda uninggha sazendiler, naxshichilar, ussulchilar we bashqilar bolup, qiriqtin oshuq adem qatnashqan. U tiyatirning sehne menzirini yéza medeniyet kulubliridiki shara'itlargha maslashturup, artislar üchün mumkinchiliklerning barliqini yaritishqa tirishqanliqini bildürüp mundaq dédi: "Bolupmu, ussullar yaxshi qoyulghan. Her bir sehnining özining özgirishi bar. Orma ussuli, béliqchiliq, abdureshidxan, amannisaxan, orda körünüshliri, axirida meshrep bilen tügitip, sen'itimizni yene bir qétim yuqiri derijide körsettuq. Bu programmimiz qazaqistan musteqilliqining 25 yilliqigha béghishlandi."

Radiyomiz ziyaritini qobul qilghan panfilof nahiyisining yarkent shehiri turghuni réhimjan toxtaxunofning pikriche, Uyghur tiyatiri artislirining bu sepiri nahayiti netijilik bolup, uningda Uyghur xelqining tarixi, medeniyiti, mung-zari teswirlen'gen on ikki muqam muzika durdanisi xelqning yürikige yetken hemde tamashibinlarda chongqur tesirat qaldurghan. U tiyatir artislirining maharitige toxtilip, mundaq dédi: "Her bir sazendining, ussulchining maharitini biz körduq. Ularning maharitidin tamashibinlar su ichkendek boldi. Zaldiki ademler huzurlinip, her birining kötürenggü keypiyatini ularning chirayliridin körduq. Hemmisi 'nawa' ansambilining bügünki yetken derijisige razi boldi. Asasen rézhissor yalqunjan shemiyéfning oyi meqsitige yetti, dep oylaymen. Ussulchilarning orunlishi tamashibinlarning könglidin chiqti."

N. Tursunoftin égilishimizche, "Muqamlar siri" konsért programmisini élip barghuchi lu'iza rozaxunowa öz sözide qazaqistanning bügünki künde yetken utuqlirini, shu jümlidin Uyghur tiyatirining qolgha keltürgen muwappeqiyetlirini alahide tekitlep ötken. N. Tursunof bash rolda maratjan noruzof, yarkent xanliqining padishahi abdureshidxan rolida nuralim warisof, amannisaxan rolida lu'iza rozaxunowa, shundaqla marat memetbaqiyéf, sahidem meshrepowa qatarliq ataqliq artislarning, alimjan abdullayéf, xalmurat munarof, dilber burhanowa oxshash yash sen'etkarlarning öz hünerlirini namayish qilghanliqini otturigha qoydi.

Uyghur nahiyisi chonja yézisi turghuni gülinur seydullayéwa bu konsért programmisi heqqide öz pikrini mundaq dep bildürdi: "Hemmimiz hayajanlanduq. Konsértni axirighiche chawaklar bilen qarshi élip, yaxshi héssiyat bilen kelduq. Artislarning kiyim-kéchiki, balilarning talanti yaxshi. Biz her da'im konsért yaki oyun bolsun, tashlimay barimiz. Muqamni sehnide birinchi qétim körduq. Marat noruzof, nuralim warisoflargha hemme yarishiptu. Bizge yaqti."

Tiyatirning muzika rehbiri n. Tursunof seperning yene bir alahidiliki, yeni balilar üchün alahide programma teyyarlan'ghanliqini bildürüp, mundaq dédi: "Üch nahiyide mektep mudirliri balilarni kündüzi teyyarlap berdi. Bu yerde tiyatir memuri abdusattar turdibaqiyéfning emgiki chong boldi. Yigit bashliri, nahiye hakimliri, xanim-qizlar, mektep mudirliri arqiliq sepirimizni utuqluq ötep kelduq, dep oylaymen. Xelqimiz "Muqamlar siri" arqiliq sen'itimizning yuqiri derijige kötürülgenlikini bahalidi. Buninggha biz intayin razi. Kélechekke ümidlirimiz chong."

Emdi chélek yézisi turghuni rehim qambarof tiyatir artislirining "Muqam sirliri"gha her xil muqamlardin parchilarni utuqluq tallap, Uyghur xelqining uzun tarixini namayish qilishqa muwappeq bolalighanliqini ilgiri sürüp, mundaq dédi: "Egerde Uyghur xelqi deslepte baturluq bilen öz yérini qoghdighan bolsa, kéyinchirek ular olturaqliship, öz medeniyitini yaritip, égilikning xéli saheliride emgek qilghan. Bizning könglimizge yaqqini sehne menzirisi shundaqla artislarning kiyimi, ularning mahirliqi. Yene bir xushal qilghan nerse, tiyatir guruppiliri yashlar bilen toluqturuluptu."

R. Qambarof tiyatir artislirining her bir nomurining yuqiri derijide orunlan'ghanliqini, artislarning kespiy sewiyisining xéli öskenlikini, bu qétimqi konsértning utuqluq ötüshide, "Nawa" ansambilining kespiy derijisining ösüshide, bolupmu ataqliq kompozitor merhum azad burhanofningmu ülüshi barliqini éytip, yene mundaq dédi: "Tiyatir azad üchün ikkinchi öy bolghan. Ellik yil mabeynide u özining küch-gheyritini ayimidi. Azadning namini ebediyleshtürüsh üchün ansambilni shuning nami bilen atisaq nahayiti yaxshi bolatti."

"Muqamlar siri" konsért programmisi panfilof nahiyisining yarkent shehiri we penjim, alte'öy, köktal, Uyghur nahiyisining chonja, ghaljat, kéngesh, tügmen, charin, emgekchiqazaq nahiyisining chélek, bayséyt, maliway yézilirida körsitildi.

Toluq bet